ଉତ୍ତରାଖଣ୍ଡରେ ଆଜି ବି ପ୍ରକୃତିର ତାଣ୍ଡବ !  ପ୍ରବଳ ବର୍ଷା ନେଇ ଆଲର୍ଟ ଜାରି

କନକ ବ୍ୟୁରୋ:  ଉତ୍ତରାଖଣ୍ଡରେ ଜାରି ରହିଛି ପ୍ରକୃତିର ତାଣ୍ଡବ  । କେବେ ଲଗାଣ ବର୍ଷା ଯୋଗୁଁ  ହାଇ ଆଲର୍ଟ ଜାରି କରାଯାଉଛି ତ ଆଉ କେବେ ପ୍ରଳୟଙ୍କାରୀ ବନ୍ୟା ଧନ ଜୀବନ ଭସାଇ  ନେଉଛି । ଥମିବାର ନାଁ ନେଉ ନାହିଁ ବର୍ଷା । ଭାରତୀୟ ପାଣିପାଗ ବିଭାଗ ଦେଇଥିବା ସୂଚନା ଅନୁଯାୟୀ, ଦେହେରାଡୁନ୍, ହରିଦ୍ୱାର, ପୌଡି ଗଡୱାଲ୍, ନୈନିତାଲ  ଏବଂ ଉଧମସିଂହ ନଗର ସମେତ ଅନେକ ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି। ଏହି ପରିସ୍ଥିତିକୁ ଦୃଷ୍ଟିରେ ରଖି ରାଜ୍ୟ ସରକାର ଏବଂ ସ୍ଥାନୀୟ ପ୍ରଶାସନ ଉଚ୍ଚ ସତର୍କତା ଅବଲମ୍ବନ କରିଛନ୍ତି । 

ଜିଲ୍ଲାର ଏକ ଅଂଶ ନନ୍ଦ ନଗରରେ ପ୍ରବଳ ବର୍ଷା ଯୋଗୁଁ ବହୁତ କ୍ଷତି ହୋଇଛି। କୁନ୍ତରୀ ଗାଁର ଅନେକ ଘର ପାଣିରେ ବୁଡ଼ି ରହିଛି ।  କିଛି ଲୋକ ଏବେ ବି ନିଖୋଜ ଅଛନ୍ତି । ପାଣିପାଗ ବିଭାଗ ଆଗାମୀ ତିନି ଘଣ୍ଟା ମଧ୍ୟରେ ଉତ୍ତରାଖଣ୍ଡର ଅନେକ ଜିଲ୍ଲାରେ ବର୍ଷା ହେବ ବୋଲି ପୂର୍ବାନୁମାନ କରିଛି । ଚାମୋଲିରେ, ପ୍ରାଥମିକ ସୂଚନା ଅନୁଯାୟୀ ନନ୍ଦ ନଗରର ପଞ୍ଚାୟତର ଏକ ୱାର୍ଡ କୁନ୍ତାରି ଲଗାଫାଲିରେ ପ୍ରବଳ ବର୍ଷା ଯୋଗୁଁ ୬ଟି ଘର ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଛି । ଏହି ଘଟଣାରେ ୭ଜଣ ନିଖୋଜ ଅଛନ୍ତି ଏବଂ ୨ ଜଣଙ୍କୁ ଉଦ୍ଧାର କରାଯାଇଛି ।  

ମଙ୍ଗଳବାର ଦିନ, ମେଘ ଫାଟି ଏବଂ ପ୍ରବଳ ବର୍ଷା ରାଜଧାନୀ ଡେରାଡୁନ ସମେତ ରାଜ୍ୟର ଅନେକ ସ୍ଥାନରେ ତାଣ୍ଡବ ସୃଷ୍ଟି କରିଥିଲା । ନଦୀ ଫୁଲିବା ଫଳରେ କୋଠା, ରାସ୍ତା ଏବଂ ପୋଲ ସବୁ ଭାସି ଯାଇଥିଲା । ଫଳରେ ୨୩ ଜଣଙ୍କର ମୃତ୍ୟୁ ହୋଇଥିଲା । ୧୬ ଜଣ ନିଖୋଜ ହୋଇଥିଲେ ଏବଂ ରାଜ୍ୟର ବିଭିନ୍ନ ସ୍ଥାନରେ ପ୍ରାୟ ୯୦୦ ଲୋକ ଫସି ରହିଥିଲେ ।  ସେହିପରି ରାଜସ୍ଥାନରେ ମଧ୍ୟ ଲଗାଣ ବର୍ଷା ଜାରି ରହିଛି।  ୧୮/୧୯ ଯାଏ ରାଜ୍ୟର ୭ଟି ଜିଲ୍ଲାକୁ ବର୍ଷା ନେଇ ଆଲର୍ଟ ଜାରି କରାଯାଇଛି ।