ମାଟି ତଳେ ଦବିଛି ଗାଁ, ଲଜ୍, ହୋଟେଲ୍, ଘର, ବଜାର … ପ୍ରତ୍ୟକ୍ଷଦର୍ଶୀ କହିଲେ କେଦାରନାଥ ପ୍ରଳୟ ମନେ ପକାଇଦେଲା ଉତ୍ତରକାଶୀ ବାଦଲଫଟା ବର୍ଷା

କନକ ବ୍ୟୁରୋ : ଉତ୍ତରାଖଣ୍ଡର ଉତ୍ତରକାଶୀରେ ପୁଣି ଜଳ ପ୍ରଳୟ । ଗଙ୍ଗୋତ୍ରୀ ଧାମ ଓ ମୁଖୱା ନିକଟରେ ବାଦଲ ଫଟା ବର୍ଷା ହେବା ଦ୍ବାରା ଆସିଲା ଜଳ ପ୍ରଳୟ । ବାଦଲ ଫାଟିବା କାରଣରୁ ମଙ୍ଗଳବାର ପାହାଡ଼ ଉପରୁ ଦ୍ରୁତ ଗତିରେ ପାଣି ମାଡ଼ି ଆସିଛି । ଫଳରେ ଅନେକ ଘର ଭାସିଯାଇଛି । ଘଟଣାସ୍ଥଳରେ ଏନଡିଆରଏଫ୍ ଓ ଏସଡିଆରଏଫ୍ ଟିମ୍ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଛନ୍ତି । ଏହା ସହ ଜିଲ୍ଲା ପ୍ରଶାସନ ମଧ୍ୟ ଉଦ୍ଧାର କାର୍ଯ୍ୟରେ ଲାଗିଛି । ଏହି ଅଞ୍ଚଳରେ ଲଗାତାର ବାଦଲ ଫଟା ବର୍ଷା ହେଉଥିବାରୁ ଲୋକଙ୍କୁ ଆଲର୍ଟ ରହିବାକୁ ସତର୍କ କରାଯାଉଛି । 

ଉତ୍ତରକାଶୀ ଜିଲ୍ଲାପାଳ ପ୍ରଶାନ୍ତ ଆର୍ଯ୍ୟ କହିଛନ୍ତି ଯେ ଏହି ଘଟଣାରେ ବର୍ତ୍ତମାନ ପର୍ଯ୍ୟନ୍ତ ୪ ଜଣଙ୍କ ଜୀବନ ଚାଲିଗଲାଣି । ନାଳ ପାଣି ସହ ସାରା ଅଞ୍ଚଳରେ କାଦୁଅ ଭର୍ତ୍ତି ହୋଇରହିଛି । ମାଟି କାଦୁଅ ତଳେ ଅନେକ ଜୀବନ ଦବିଥିବାର ଆଶଙ୍କା କରାଯାଉଛି । ଅଞ୍ଚଳରେ ବର୍ତ୍ତମାନ ପର୍ଯ୍ୟନ୍ତ ବର୍ଷା ଲାଗି ରହିଥିବା ବେଳେ ପୁଣି ବାଦଲ ଫାଟିବାର ସମ୍ଭାବନା ରହିଛି । ତେବେ ଏହି ଘଟଣାରେ ଗୃହମନ୍ତ୍ରୀ ଅମିତ ଶାହ ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମିଙ୍କ ସହ କଥାବାର୍ତ୍ତା କରିଛନ୍ତି । କେନ୍ଦ୍ର ସରକାର ଉତ୍ତରାଖଣ୍ଡକୁ ସହାୟତା କରିବା ପାଇଁ ପ୍ରସ୍ତୁତ ରହିଛି । ପ୍ରଶାସନ ଲୋକଙ୍କୁ ନଦୀ ପାଖକୁ ଯିବାକୁ ବାରଣ କରିଛି । ଜିଲ୍ଲା ପ୍ରଶାସନ ୨ ଟି ହେଲପ୍ ଲାଇନ୍ ନମ୍ବର 01374222126 , 9456556431 ଜାରି କରିଛି । ଅନ୍ୟପକ୍ଷରେ ଜଣେ ସ୍ଥାନୀୟ ବାସିନ୍ଦା କହିଛନ୍ତି ଯେ ଦ୍ବିପ୍ରହର ସାଢ଼େ ଗୋଟାଏ ବେଳେ ବାଦଲଫଟା ବର୍ଷା ଆରମ୍ଭ ହେଲା । ଯେଉଁଥିରେ ୬୦ ରୁ ୭୦ ଜଣ ଲୋକଙ୍କ ପତ୍ତା ମିଳୁନି । ବର୍ଷାରେ ହୋଟେଲରୁ ଆରମ୍ଭ କରି ଲଜ୍ , ବଜାର ଏବଂ କିଛି ଗାଁର ଚିହ୍ନବର୍ଣ୍ଣ ଦେଖାଯାଉନି । ଅନ୍ୟ ଜଣେ ପ୍ରତ୍ୟକ୍ଷଦର୍ଶୀ କହିଛନ୍ତି ଯେ ଧରାଲିରେ ଗତକାଲି ରାତିଠାରୁ ବର୍ଷା ହେଉଛି । କ୍ଷୀରଗଙ୍ଗା ନଦୀରେ ବାଦଲ ଫାଟିବା ଦ୍ବାରା ଭୟଙ୍କର ତାଣ୍ଡବ ରଚିଛି ବର୍ଷା । କେଦାରନାଥ ପ୍ରଳୟ ସମୟ ମନେ ପକାଇଦେଲା ଏ ବାଦଲଫଟା ବର୍ଷା । ଅନେକ ଲୋକ ମାଟି ତଳେ ଦବିଥିବା ବେଳେ ପ୍ରଶାସନ ଉଦ୍ଧାରକାରୀ ଦଳମାନଙ୍କୁ ପଠାଇ ଆମକୁ ସାହାଯ୍ୟ କରୁଛନ୍ତି ।