ତେଲ ଯୋଗାଣକୁ ନେଇ ଆମେରିକା-ଇରାନ ମୁହାଁମୁହିଁ : କଡ଼ା ଜବାବ ରଖିଲା ତେହରାନ

କନକବ୍ୟୁରୋ : ମଧ୍ୟପ୍ରାଚ୍ୟରେ ଦିନକୁ ଦିନ ଘନଉଛି ଯୁଦ୍ଧ। ଆଜିକୁ ୧୧ ଦିନ ହେଲାଣି ଇରାନ୍ ଓ ଆମେରିକା-ଇସ୍ରାଏଲ ମଧ୍ୟରେ ଯୁଦ୍ଧ ଚାଲିଛି। ହଜାର ହଜାର ଜୀବନ ଗଲାଣି। ଏବେ ମଧ୍ୟସ୍ଥତା ପାଇଁ ଆଗେଇ ଆସିଛି ରୁଷ୍। ଯୁଦ୍ଧ ଖତମ୍ କରିବାକୁ ପ୍ରସ୍ତାବ ଦେଇଛନ୍ତି ରୁଷ୍ ରାଷ୍ଟ୍ରପତି ଭ୍ଲାଡିମିର ପୁଟିନ୍। ଫୋନ୍ ଯୋଗେ ଡୋନାଲଡ ଟ୍ରମ୍ପଙ୍କ ସହ କଥା ହୋଇ ଯୁଦ୍ଧ ବନ୍ଦ କରିବା ଉପରେ ଆଲୋଚନା କରିଛନ୍ତି। ୪ ବର୍ଷ ଧରି ରୁଷ-ୟୁକ୍ରେନ୍ ମଧ୍ୟରେ ଯୁଦ୍ଧ ଚାଲିଛି। ଏବେ ଇରାନ୍-ଇସ୍ରାଏଲ୍ ଯୁଦ୍ଧ ବନ୍ଦ କରିବାକୁ ଶାନ୍ତି ଦୂତ ଭାବେ ଆଗେଇ ଆସିଛନ୍ତି ପୁଟିନ୍।

ସେପଟେ ଇରାନର ରାଜଧାନୀ ତେହେରାନରେ ଅନେକଗୁଡ଼ିଏ ବିସ୍ଫୋରଣର ଶଦ୍ଦ ଶୁଣାଯାଇଛି। ତେହେରାନରେ ୨୦ରୁ ଅଧିକ ଶକ୍ତିଶାଳୀ ବିସ୍ଫୋରଣ ଶୁଣାଯାଇଛି, ଯାହା ଫଳରେ ଅନେକ ଲୋକ ନିରାପଦ ସ୍ଥାନକୁ ପଳାୟନ କରିଛନ୍ତି। ମଧ୍ୟରାତ୍ରିରେ ଘଟିଥିବା ଏହି ଆକ୍ରମଣଗୁଡ଼ିକୁ ଯୁଦ୍ଧ ଆରମ୍ଭ ହେବା ପରଠାରୁ ତେହେରାନ ଉପରେ ସବୁଠାରୁ ଘାତକ ବିମାନ ଆକ୍ରମଣ ବୋଲି ବର୍ଣ୍ଣନା କରାଯାଉଛି। ପ୍ରାୟ ଅଧ ଘଣ୍ଟା ଧରି ନିରନ୍ତର ବୋମା ବିସ୍ଫୋରଣ ଏବଂ ଲଢ଼ୁଆ ବିମାନର ଶବ୍ଦ ଶୁଣାଯାଉଥିଲା। ପ୍ରତ୍ୟକ୍ଷଦର୍ଶୀଙ୍କ ଅନୁଯାୟୀ ସହରର ପଶ୍ଚିମ ଭାଗରେ ଅନେକ ବିସ୍ଫୋରଣ ହୋଇଛି। କିଛି ପଡ଼ୋଶୀରେ ବିଦ୍ୟୁତ୍ ବିଚ୍ଛିନ୍ନ ମଧ୍ୟ ହୋଇଛି।