କନକ ବ୍ୟୁରୋ: ଭାରତ ଉପରେ ଆମେରିକାର ୫୦ ପ୍ରତିଶତ ଟାରିଫ୍ ପରେ ଖସିଲା ଟଙ୍କାର ମୂଲ୍ୟ । ଏକ ଡଲାର ହେଲା ୮୭.୯୭ ଟଙ୍କା । ପ୍ରଥମ ଥର ପାଇଁ ଏତେ ତଳକୁ ଖସିଛି ଟଙ୍କା । ତେବେ କେବଳ ଡଲାର ନୁହେଁ ଚୀନର ୟାନ୍ ତୁଳନାରେ ବି ଖସିଛି ଟଙ୍କାର ମୂଲ୍ୟ । ଶୁକ୍ରବାର ଭାରତୀୟ ଟଙ୍କା ଆମେରିକୀୟ ଡଲାର ତୁଳନାରେ ଏକ ରେକର୍ଡ ସଂଖ୍ୟକ ନିମ୍ନସ୍ତରକୁ ଖସି ୮୭.୯୬୫୦ରେ ପହଞ୍ଚିଛି ।  ଭାରତୀୟ ସାମଗ୍ରୀ ଉପରେ ଆମେରିକାର ଉଚ୍ଚ ଶୁଳ୍କ ଯୋଗୁଁ ନିବେଶକମାନଙ୍କ ମଧ୍ୟରେ ଆତଙ୍କ ସୃଷ୍ଟି ହୋଇଛି ।  ଓ୍ଵାସିଂଟନ ନିକଟରେ ଅତିରିକ୍ତ ୨୫ ପ୍ରତିଶତ ଶୁଳ୍କ ଲାଗୁ କରିଛି, ଯାହା ଭାରତର ମୋଟ ଶୁଳ୍କକୁ ଦୁଇଗୁଣ କରି ୫୦ ପ୍ରତିଶତ କରିଛି । ଯାହାଦ୍ବାରା ବଜାରରେ ତୀବ୍ର ପ୍ରତିକ୍ରିୟା ଦେଖାଯାଇଛି । କେବଳ ଡଲାର ନୁହେଁ ଚୀନର ୟାନ୍ ତୁଳନାରେ ଟଙ୍କା ଆହୁରି ଅଧିକ ଖସିଛି । ଏକ ୟାନ ୧୨.୩୪ ପ୍ରତିଶତରେ ପହଞ୍ଚିଛି । ସପ୍ତାହେ ଭିତରେ ଟଙ୍କାର ମୂଲ୍ୟ ୧.୨ ପ୍ରତିଶତ ଖସିଛି ଏବଂ ମାସକ ମଧ୍ୟରେ ୧.୬ ପ୍ରତିଶତ ହ୍ରାସ ପାଇଛି । ଗତ ଚାରି ମାସରେ ଟଙ୍କା ୟାନ ତୁଳନାରେ ପ୍ରାୟ ୬ ପ୍ରତିଶତ ହ୍ରାସ ପାଇଛି । ଅର୍ଥନୀତିଜ୍ଞଙ୍କ କହିବା ଅନୁସାରେ, ଭାରତ ଓ ଚୀନ୍‌ ପାଇଁ ଆମେରିକାର ଭିନ୍ନ ଭିନ୍ନ ଟାରିଫ୍‌ ନୀତି ଯୋଗୁ ଏଭଳି ପରିବର୍ତ୍ତନର ଘଟିଛି । ଭାରତୀୟ ରପ୍ତାନୀ ଉପରେ ୫୦ ପ୍ରତିଶତ ଶୁଳ୍କ ଲାଗୁ ହୋଇଥିବା ବେଳେ ଚୀନ ସାମଗ୍ରୀ ଉପରେ ୩୦ ପ୍ରତିଶତ ଶୁଳ୍କ ଲାଗୁ ହୋଇଛି । ଏହି ଶୁଳ୍କ ଅସମାନତା ଯୋଗୁଁ ଭାରତୀୟ ଟଙ୍କାର ମୂଲ୍ୟ ଚୀନ୍ ମୁଦ୍ରା ୟାନ୍‌ ତୁଳନାରେ ହ୍ରାସ ପାଇଛି । ଯାହା ଆମେରିକା ବଜାରରେ ଚୀନ୍‌ ସହିତ ପ୍ରତିଯୋଗିତା କରୁଥିବା ଟେକ୍ସଟାଇଲ୍‌, ଇଞ୍ଜିନିୟରିଂ ସାମଗ୍ରୀ ଓ ରାସାୟନିକ ପଦାର୍ଥ ଭଳି କ୍ଷେତ୍ରଗୁଡ଼ିକୁ ସିଧାସଳଖ ପ୍ରଭାବିତ କରିଛି ବୋଲି ଆଇଡିଏଫ୍‌ସି ଫାଷ୍ଟ୍‌ ବ୍ୟାଙ୍କର ଅର୍ଥନୀତିବିଦ୍‌ ଗୌରା ସେନ୍‌ ଗୁପ୍ତା ରଏଟର୍ସ ସମ୍ବାଦ ସଂସ୍ଥାକୁ କହିଛନ୍ତି ।