ହମାସକୁ ୭୨ ଘଣ୍ଟାର ମହଲତ

କନକ ବ୍ୟୁରୋ : ଦୀର୍ଘଦିନ ହେଲା ଗାଜା ଉପରେ ଆକ୍ରମଣ କରୁଛି ଇସ୍ରାଏଲ । ହମାସର ମୂଳପୋଛ ପାଇଁ ଘନଘନ ଆକ୍ରମଣ ସାଙ୍ଗକୁ ଗାଜାଷ୍ଟ୍ରିପକୁ ସମ୍ପୂର୍ଣ୍ଣ ଦଖଲ କରିବା ପାଇଁ ଆଗକୁ ବଢୁଛି ଆଇଡିଏଫ୍ । ଇସ୍ରାଏଲ ଓ ହମାସ ମଧ୍ୟରେ ଚାଲିଥିବା ସଂଘର୍ଷରେ ହଜାର ହଜାର ନିରୀହ ଲୋକଙ୍କ ଜୀବନ ଯାଉଛି । ଏବେ ଏହି ଯୁଦ୍ଧ ରୋକିବାକୁ ଆଗେଇ ଆସିଛି ଆମେରିକା । ସୋମବାର ୱାସିଂଟନରେ ବସିଥିଲା ଡୋନାଲ୍ଡ ଟ୍ରମ୍ପ ଓ ବେଞ୍ଜାମିନ ନେତାନ୍ୟାହୁଙ୍କ ମଧ୍ୟରେ ବୈଠକ । ଯେଉଁଥିରେ ବାହାରିଛି ୨୧ ସୂତ୍ରୀ ଯୋଜନା ।

Advertisment

ଆମେରିକା ମଧ୍ୟସ୍ଥତା କରି ହମାସ ଓ ଇସ୍ରାଏଲ ନିକଟରେ କିଛି ସର୍ତ୍ତ ରଖିଛି । ଯଦି ଉଭୟ ପକ୍ଷ ପ୍ରସ୍ତାବ ଗ୍ରହଣ କରନ୍ତି, ତେବେ ଗାଜାରେ ଯୁଦ୍ଧ ବିରତି ହେବ । କିନ୍ତୁ ହମାସ ଯଦି ନମାନେ, ତେବେ ଇସ୍ରାଏଲ ସହ ମିଶି ହମାସକୁ ମୂଳପୋଛ କରିବାକୁ କହିଛି ଆମେରିକା । ମିଳିଥିବା ସୂଚନା ଅନୁସାରେ ଆମେରିକାର ପ୍ରସ୍ତାବ ଉପରେ ଇସ୍ରାଏଲ ସହମତି ପ୍ରକାଶ କରିବା ସହ ହମାସକୁ ଦିଆଯାଇଛି ୭୨ ଘଣ୍ଟାର ସମୟ ।

ଟ୍ରମ୍ପଙ୍କ ଶାନ୍ତି ପ୍ରସ୍ତାବରେ କ’ଣ ରହିଛି?

ତୁରନ୍ତ ଯୁଦ୍ଧବିରତି
୭୨ ଘଣ୍ଟାରେ ବନ୍ଧକଙ୍କୁ ମୁକ୍ତ କରିବା
ଗାଜାରେ ବନ୍ଦୀ ଥିବା ଇସ୍ରାଏଲ ନାଗରିକଙ୍କୁ ମୁକ୍ତ କରିବା
ଅସ୍ତ୍ରଶସ୍ତ୍ର ସହ ହମାସର ଆତ୍ମସମର୍ପଣ
ଗାଜାରେ ଅନ୍ତର୍ଜାତୀୟ ସୁରକ୍ଷା ବାହିନୀ ମୁତୟନ
ପରବର୍ତ୍ତୀ କ୍ଷମତା ପାଲେଷ୍ଟାଇନ୍ କର୍ତ୍ତୃପକ୍ଷଙ୍କୁ ହସ୍ତାନ୍ତର

ଆମେରିକା ଏକଥା ମଧ୍ୟ ସ୍ପଷ୍ଟ କରିଛି ଯେ ଏହି ପ୍ରସ୍ତାବ ଗ୍ରହଣ ହେବା ପରେ, ଗାଜା ଷ୍ଟ୍ରିପକୁ ସମ୍ପୂର୍ଣ୍ଣ ସହାୟତା ତୁରନ୍ତ ପଠାଯିବ । ସେପଟେ ଟ୍ରମ୍ପଙ୍କ ଏହି ନିଷ୍ପତ୍ତିକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସ୍ୱାଗତ କରିଛନ୍ତି । ମୋଦୀ ଏକ୍ସରେ ପୋଷ୍ଟ କରି କହିଛନ୍ତି ଯେ ଗାଜା ବିବାଦର ଅନ୍ତ ପାଇଁ ଟ୍ରମ୍ପଙ୍କ ବ୍ୟାପକ ଯୋଜନାକୁ ସ୍ୱାଗତ କରୁଛୁ । ଏହା ପାଲେଷ୍ଟାଇନ ଏବଂ ଇସ୍ରାଏଲ ଲୋକଙ୍କ ପାଇଁ ଶୁଭଙ୍କର । ଦୀର୍ଘକାଳୀନ ଏବଂ ସ୍ଥାୟୀ ଶାନ୍ତି, ସୁରକ୍ଷା ଏବଂ ବିକାଶ ପାଇଁ ଏକ ସକାରାତ୍ମକ ପଦକ୍ଷେପ ।