ଆମେରିକାରେ ଚୋରି କରି ଧରା ପଡ଼ିଲେ ଭାରତୀୟ, ଏମିତି କାମ କଲେ ଭିସା ରଦ୍ଦ ଚେତାବନୀ ଦେଲା ଆମେରିକୀୟ ଦୂତାବାସ

କନକ ବ୍ୟୁରୋ: ଆମେରିକାରେ ଥିବା ପ୍ରବାସୀ ଭାରତୀୟଙ୍କ ପାଇଁ ଚେତାବନୀ ଜାରି କଲା ଭାରତରେ ଅବସ୍ଥିତ ଆମେରିକୀୟ ଦୂତାବାସ । ଆମେରିକାରେ କୌଣସି ଆପରାଧିକ କାର୍ଯ୍ୟକଳାପରେ ଲିପ୍ତ ରହିଲେ ସେମାନଙ୍କ ଭିସା ରଦ୍ଦ ହୋଇପାରେ । ଆମେରିକା ଇଲିନୋଇସରେ ଥିବା ଟାର୍ଗେଟ୍‌ ନାମକ ଷ୍ଟୋର୍‌ରୁ ଜଣେ ଭାରତୀୟ ମହିଳା ଚୋରି କରି ଧରା ପଡ଼ିବା ପରେ ଏଭଳି ଚେତାବନୀ ଦେଇଛି ଆମେରିକା ଦୂତାବାସ । ଭାରତୀୟ ମହିଳା ଜଣକ ପ୍ରାୟ ୧ ଲକ୍ଷ ଟଙ୍କାରୁ ଅଧିକ ମୂଲ୍ୟର ସାମଗ୍ରୀ ଚୋରି କରିଥିବା ସୂଚନା ମିଳିଛି । ସେ ନିଜ ପରିବାରକୁ ଭେଟିବାକୁ ଆମେରିକା ଯାଇଥିଲେ । 

ମହିଳା ଜଣକ ଚୋରି କରୁଥିବା ଅନେକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଭାରତୀୟ ମହିଳା ଜଣକ ଟାର୍ଗେଟ ଷ୍ଟୋରରେ ୭ ଘଣ୍ଟାରୁ ଅଧିକ ସମୟ ବିତାଇ ପ୍ରାୟ ୧,୩୦୦ ଡଲାର ମୂଲ୍ୟର ଜିନିଷ ଉଠାଇଥିଲେ । ଭାରତରେ ଏହାର ମୂଲ୍ୟ ୧.୧ ଲକ୍ଷ ଟଙ୍କା ହେବ । ଜିନିଷ ଉଠାଇବା ପରେ ସେ ଟଙ୍କା ନଦେଇ ଚାଲିଯିବାକୁ ଚେଷ୍ଟା କରିଥିଲେ । ଗତ ମେ ୧ ତାରିଖରେ ଏହି ଘଟଣା ଘଟିଥିବା ନେଇ ସ୍ଥାନୀୟ ମିଡିଆ ରିପୋର୍ଟରୁ ଜଣା ପଡ଼ିଛି । ମହିଳା ଜଣକ ଧରା ପଡ଼ିବା ପରେ ନିଜ ପାଇଁ ପୁଲିସ ନିକଟରେ ସଫେଇ ଦେଉଥିବା ଦେଖିବାକୁ ମିଳିଥିଲା । 

ଏହି ଘଟଣା ପରେ ଭାରତରେ ଅବସ୍ଥାନ କରିଥିବା ଆମେରିକୀୟ ଦୂତାବାସ ପକ୍ଷରୁ ଚେତାବନୀ ଜାରି କରାଯାଇଛି । ଆମେରିକୀୟ ଦୂତାବାସ କହିଛି, 'ଆମେରିକାରେ ଆକ୍ରମଣ, ଚୋରି କିମ୍ବା ଏଭଳି କୌଣସି କାର୍ଯ୍ୟ କରିବା ଦ୍ୱାରା କେବଳ ଆଇନଗତ ସମସ୍ୟା ହେବ ତାହା ନୁହେଁ, ଏହା ଆପଣଙ୍କ ଭିସା ବାତିଲର କାରଣ ହୋଇପାରେ ।  ଭବିଷ୍ୟତରେ ଆମେରିକୀୟ ଭିସା ପାଇଁ ଆପଣ ଅଯୋଗ୍ୟ ବିବେଚିତ ହୋଇପାରନ୍ତି । ଆମେରିକାରେ ଆଇନ ଏବଂ ଶୃଙ୍ଖଳାକୁ ମୂଲ୍ୟବୋଧତା ରହିଛି । ବିଦେଶୀ ପର୍ଯ୍ୟଟକମାନେ ସମସ୍ତ ଆମେରିକୀୟ ଆଇନ ପାଳନ କରିବା ଉଚିତ । ଆଗାମୀ ଦିନରେ ପର୍ଯ୍ୟଟକମାନେ ଆଇନ ଅନୁପାଳନ କରିବେ ବୋଲି ଆଶା କରାଯାଉଛି ।'