ଆମେରିକା ଯାତ୍ରା ପାଇଁ ଯୋଜନା କରୁଥିବା ଭାରତୀୟମାନଙ୍କ ପାଇଁ ଗୁରୁତ୍ବପୂର୍ଣ୍ଣ ଖବର

କନକ ବ୍ୟୁରୋ :ଆମେରିକା ଯାତ୍ରା ପାଇଁ ଯୋଜନା କରୁଥିବା ଭାରତୀୟମାନଙ୍କ ପାଇଁ ଏକ ଗୁରୁତ୍ବପୂର୍ଣ୍ଣ ଖବର । ଆମେରିକାର ଷ୍ଟେଟ ଡିପାର୍ଟମେଣ୍ଟ ଭିସା ସାକ୍ଷାତକାର ନୀତିରେ ବଡ଼ ଧରଣର ପରିବର୍ତ୍ତନ ଘୋଷଣା କରିଛି ।  ଯାହା ସେପ୍ଟେମ୍ବର ୨, ୨୦୨୫ରୁ ଲାଗୁ ହେବ । ଏହି ନୂଆ ନିୟମ ଅନୁଯାୟୀ, ଅଧିକାଂଶ ଅଣ-ପ୍ରବାସୀ ଭିସା ଆବେଦନକାରୀଙ୍କ ପାଇଁ ବ୍ୟକ୍ତିଗତ ସାକ୍ଷାତକାର ବାଧ୍ୟତାମୂଳକ କରାଯାଇଛି ।  ଏହାଦ୍ବାରା ପୂର୍ବରୁ ସାକ୍ଷାତକାରରୁ ଛାଡ଼ ପାଉଥିବା ଅନେକ ଆବେଦନକାରୀ ପ୍ରଭାବିତ ହେବେ । 

ମୁଖ୍ୟ ପରିବର୍ତ୍ତନଗୁଡ଼ିକ କ'ଣ ?
ଏହି ନୂତନ ନୀତିର ସବୁଠାରୁ ବଡ଼ ପରିବର୍ତ୍ତନ ହେଉଛି ଯେ ପୂର୍ବରୁ ଭିସା ସାକ୍ଷାତକାରରୁ ଛାଡ ଦିଆଯାଉଥିଲା ।  ବର୍ତ୍ତମାନ  ଆବେଦନକାରୀଙ୍କୁ  ବାଧ୍ୟତାମୂଳକ ଭାବେ ସାକ୍ଷାତକାର ଦେବାକୁ ପଡ଼ିବ । ପୂର୍ବରୁ ଥିବା କୋହଳ ନୀତିକୁ ବଦଳାଇ ସୁରକ୍ଷା ବ୍ୟବସ୍ଥାକୁ ଅଧିକ କଡ଼ାକଡ଼ି କରିବା ପାଇଁ ଏହି ପଦକ୍ଷେପ ନିଆଯାଇଛି । 

କେଉଁମାନେ ପ୍ରଭାବିତ ହେବେ ?
ଶିଶୁ ଓ ବରିଷ୍ଠ ନାଗରିକ: ୧୪ ବର୍ଷରୁ କମ୍ ବୟସର ପିଲା ଏବଂ ୭୯ ବର୍ଷରୁ ଅଧିକ ବୟସର ବରିଷ୍ଠ ନାଗରିକମାନଙ୍କୁ ପୂର୍ବରୁ ସାଧାରଣତଃ ସାକ୍ଷାତକାରରୁ ଛାଡ଼ ମିଳୁଥିଲା । କିନ୍ତୁ ନୂଆ ନିୟମ ଅନୁସାରେ ଏବେ ସେମାନଙ୍କୁ ମଧ୍ୟ ବ୍ୟକ୍ତିଗତ ଭାବେ ସାକ୍ଷାତକାର ପାଇଁ ଉପସ୍ଥିତ ହେବାକୁ ପଡ଼ିବ । 
ବିଭିନ୍ନ ଭିସା ବର୍ଗ: ଏହି ନିୟମ ପର୍ଯ୍ୟଟକ ଓ ବ୍ୟବସାୟିକ ଭିସା (B-1/B-2), ଛାତ୍ର ଭିସା (F ଏବଂ M), କାର୍ଯ୍ୟ ଭିସା (H-1B), ଏବଂ ଏକ୍ସଚେଞ୍ଜ ଭିଜିଟର ଭିସା (J) ସମେତ ଅଧିକାଂଶ ଅଣ-ପ୍ରବାସୀ ଭିସା ବର୍ଗ ଉପରେ ଲାଗୁ ହେବ । 
ଯେଉଁମାନେ ନିଜର B1/B2 ଭିସା ନବୀକରଣ କରିବାକୁ ଚାହୁଁଛନ୍ତି, ସେମାନଙ୍କ ପାଇଁ ସାକ୍ଷାତକାର ଛାଡ଼ ପାଇବାକୁ ହେଲେ କିଛି କଡ଼ା ସର୍ତ୍ତ

ପୂରଣ କରିବାକୁ ପଡ଼ିବ:
ପୂର୍ବ ଭିସାର ବୈଧତା ଶେଷ ହେବାର ୧୨ ମାସ ମଧ୍ୟରେ ଆବେଦନ କରିବାକୁ ପଡ଼ିବ, ଯାହା ପୂର୍ବରୁ ୪୮ ମାସ ଥିଲା । 
ଆବେଦନକାରୀଙ୍କୁ ନିଜ ଦେଶ କିମ୍ବା ବାସସ୍ଥାନରୁ ଆବେଦନ କରିବାକୁ ହେବ । 
ପୂର୍ବ ଭିସା ପ୍ରଦାନ ସମୟରେ ଆବେଦନକାରୀଙ୍କ ବୟସ ଅତି କମରେ ୧୮ ବର୍ଷ ହୋଇଥିବା ଆବଶ୍ୟକ। 
ସେମାନଙ୍କର ଭିସା ଆବେଦନ ପୂର୍ବରୁ କେବେବି ଅଗ୍ରାହ୍ୟ ହୋଇନଥିବ (ଯଦି ଏହା ପରେ ମଞ୍ଜୁର ହୋଇନଥାଏ) ।
ଆବେଦନକାରୀଙ୍କର କୌଣସି ସମ୍ଭାବ୍ୟ ଅଯୋଗ୍ୟତା ନଥିବା ଆବଶ୍ୟକ ।
ଏହା ସତ୍ତ୍ୱେ, କନସୁଲାର ଅଧିକାରୀଙ୍କ ପାଖରେ ଯେକୌଣସି ଆବେଦନକାରୀଙ୍କୁ ସାକ୍ଷାତକାର ପାଇଁ ଡାକିବାର ଅଧିକାର ରହିବ ।