କନକ ବ୍ୟୁରୋ: ୧୮୫୭ରେ ଭାରତୀୟ ସ୍ୱାଧୀନତା ସଂଗ୍ରାମର ମୂଳଦୁଆ ପଡ଼ିଥିଲା । ସ୍ୱରାଜ୍ୟ ସ୍ୱପ୍ନ ନେଇ ଅନେକ ସ୍ୱାଧୀନତା ସଂଗ୍ରାମୀ ଏହି ଲଢ଼େଇ ବଳିଦାନ ଦେଇଥିଲେ । ସ୍ୱାଧୀନତା ସଂଗ୍ରାମର ଓଡ଼ିଶାର ଅବଦାନ କମ ନଥିଲା । ପାଇକ ବିଦ୍ରୋହ ପରେ ବିଭିନ୍ନ ପ୍ରାନ୍ତରେ ଇଂରେଜମାନଙ୍କ ବିରୁଦ୍ଧରେ ସ୍ୱର ଉତ୍ତୋଳନ ହେବାକୁ ଲାଗିଥିଲା । ଏହି ମହାନ ସଂଗ୍ରାମରେ ଅବିଭକ୍ତ ସମ୍ବଲପୁର ଜିଲ୍ଲାର ଭୂମିକା ସର୍ବଦା ସ୍ମରଣୀୟ । ଏ ଲଢ଼େଇରେ ଅନେକ ଜମିଦାର, ଗୌନ୍ତିଆ ଓ ଗ୍ରାମ୍ୟ ମୁଖ୍ୟମାନେ ନିରନ୍ତର ନିଃସ୍ୱାର୍ଥପର ଭାବେ ସମର୍ଥନ ଦେଇ ଆସୁଥିଲେ । ସେମାନଙ୍କ ମଧ୍ୟରୁ ଅନ୍ୟତମ ଥିଲେ ସହିଦ ମାଧୋ ସିଂ । 

Advertisment

ବରଗଡ଼ ଜିଲ୍ଲା ଘେଁସର ଜମିଦାର ସହିଦ ମାଧୋ ସିଂ ଥିଲେ ଏହି ରକ୍ତାକ୍ତ ବିପ୍ଲବର କର୍ଣ୍ଣଧାର । ସେ ସ୍ୱାଧୀନତା ସଂଗ୍ରାମୀ  ବୀର ସୁରେନ୍ଦ୍ର ସାଏଙ୍କ ଏକାନ୍ତ ସହଯୋଗୀ ଓ ବିଶ୍ୱସ୍ତ ଥିଲେ । ମାଧୋ ସିଂ ଥିଲେ  ବିଞ୍ଝାଲ ସମ୍ପ୍ରଦାୟର ଜମିଦାର । ତାଙ୍କ ଅଧୀନରେ ୨୫ ଖଣ୍ଡ ଗ୍ରାମ ରହିଥିଲା । ଜଣେ ପରୋପକାରୀ ଜମିଦାର ଅନେକ ଖ୍ୟାତି ବି ଅର୍ଜନ କରିଥିଲେ । ଇଂରେଜଙ୍କ ସମସ୍ତ ନୀତିକୁ ସେ ରୋକଠୋକ ବିରୋଧ କରୁଥିଲେ । ମାଧୋ ସିଂଙ୍କୁ ଇଂରେଜ ସରକାର ତତ୍କାଳୀନ ଡେପୁଟି କମିସନର ୩୫୬ ଟଙ୍କାର ରାଜସ୍ୱ ଦେବାକୁ କହିଥିଲେ । ହେଲେ ସେ ଏହି ନିର୍ଦ୍ଦେଶକୁ ସଫାସଫା ଅବମାନନା କରିଥିଲେ । ଇଂରେଜଙ୍କୁ ଖୁସି କରିବାକୁ ନୀରିହ ଲୋକଙ୍କ ଉପରେ ଦାଉ ସାଧିବାକୁ ଉଚିତ ମନେ କରୁନଥିଲେ । ଏହାପରେ ଇଂରେଜ ସରକାରଙ୍କ ସହ ମାଧୋ ସିଂଙ୍କ ମନୋମାଳିନ୍ୟ ଆରମ୍ଭ ହୋଇଯାଇଥିଲା । ଏହି କ୍ରମରେ ଗୋରା ସରକାର ଜମିଦାର ନାରାୟଣ ସିଂଙ୍କୁ ଅତି ନିର୍ମମ ଭାବେ ହତ୍ୟା କରିଥିଲେ । ଯାହାକୁ ସହ୍ୟ କରିପାରିନଥିଲେ ମାଧୋ ସିଂ । ଏହାପରେ ସେ ଅସ୍ତ୍ର ଧାରଣ କରିବା ସହ ଏହି ଜଘନ୍ୟକାଣ୍ଡର ପ୍ରତିଶୋଧ ନେବାକୁ ବାହାରିଥିଲେ ।

ଇଂରେଜ ସରକାରର ଅବସାନ ଘଟାଇବାକୁ ବିରାଟ ଶୋଭାଯାତ୍ରାରେ ବାହାରି ସମ୍ବଲପରୁ ବ୍ରହ୍ମପୁରା ମନ୍ଦିରରେ ଗ୍ରହଣ କରିଥିଲେ ବଜ୍ର ଶପଥ । ଏହି ଅଞ୍ଚଳରେ ଯେଉଁଠି ଇଂରେଜ ସୈନିକ ଦେଖୁଥିଲେ ଘନଘନ ଆକ୍ରମଣ କରୁଥିଲେ । ମାଧୋ ସିଂଙ୍କ ପରାକ୍ରମରେ ଇଂରେଜମାନଙ୍କ ନିଦ ହଜି ଯାଇଥିଲା । କୌଣସି ମତେ ତାଙ୍କୁ ନିୟନ୍ତ୍ରଣ କରି ପାରୁନଥିଲେ ଇଂରେଜ ସୈନ୍ୟ । ଜଙ୍ଗଲରେ ଗୁମ୍ଫା ଭିତରେ ରହି ଗରିଲା ଯୁଦ୍ଧ କରୁଥିଲେ ମାଧୋ ସିଂ ।  ଏହି ଯୁଦ୍ଧରେ ଭରପୂର ସାଥ୍‌ ଦେଉଥିଲେ ତାଙ୍କ ପୁତ୍ରମାନେ । ଶେଷରେ ତାଙ୍କୁ ତାଙ୍କ ଅଧିକାର ପ୍ରଦାନ କରିବେ ବୋଲି ମିଥ୍ୟା ପ୍ରତିଶ୍ରୁତି ପ୍ରଦାନ କରିଥିଲେ ଇଂରେଜ । କ୍ୟାପ୍‌ଟେନ୍‌ ଇଜି ଉଡ୍‌ବ୍ରିଜ୍‌ଙ୍କୁ ମସ୍ତକ ଛେଦନ କରିଦେଇଥିଲେ ମାଧୋ ସିଂ । ଏହାପରେ ସେ ମାଟିଆ ଭାଟୀ ଗ୍ରାମରେ ବିଶ୍ରାମ ନେଉଥିବା ବେଳେ ୧୮୫୮ ମସିହା ଡିସେମ୍ବର ୩୧ରେ ଇଂରେଜ ସୈନ୍ୟମାନେ ତାଙ୍କୁ ଧରିଥିଲେ । ତାଙ୍କର କୌଣସି ବିଚାର କରନଯାଇ ତାଙ୍କୁ ପାଶୀ ଦିଆଯାଇଥିଲା  । ମାଧୋ ସିଂଙ୍କ ଭଳି ସ୍ୱାଧୀନତା ସଂଗ୍ରାମୀଙ୍କ ଯୋଗୁଁ ସ୍ୱାଧୀନ ଭାରତ ଆଜି ଆମକୁ ଉପହାର ସ୍ୱରୂପ ମିଳିଛି କହିଲେ ଭୁଲ ହେବନି ।