କନକ ବ୍ୟୁରୋ: ଜାତିସଂଘ ସୁରକ୍ଷା ପରିଷଦ(UNSC)ର ପ୍ରତିବନ୍ଧକ ତଦାରଖକାରୀ ଟିମ୍‌ ଏକ ବଡ଼ ଖୁଲାସା କରିଛି । ଜମ୍ମୁ-କଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣକୁ ନେଇ ଏକ ବିସ୍ତୃତ ରିପୋର୍ଟ ଜାରି କରିଛି । ଯେଉଁଥିରେ ସାମ୍ନାକୁ ଆସିଛିଅନେକ ଆଶ୍ଚର୍ଯ୍ୟଜନକ ତଥ୍ୟ । ରିପୋର୍ଟ ଅନୁଯାୟୀ, ଆତଙ୍କବାଦୀ ସଂଗଠନ 'ଦି ରେଜିଷ୍ଟାନ୍ସ ଫ୍ରଣ୍ଟ' (TRF) କେବଳ ଦୁଇଥର ଏହି ଆକ୍ରମଣ ପାଇଁ ନିଜକୁ ଦାୟୀ କରିନାହିଁ, ବରଂ ଘଟଣାସ୍ଥଳର ଏକ ଫଟୋ ମଧ୍ୟ ସେୟାର କରିଥିଲା । ଏହି ରିପୋର୍ଟରେ ଦାବି କରାଯାଇଛି ଯେ ପାକିସ୍ତାନରେ ଥିବା ଆତଙ୍କବାଦୀ ସଂଗଠନ ଲସ୍କର-ଏ-ତୋଇବା(LeT)ର ସମର୍ଥନ ବିନା ଏହି ଆକ୍ରମଣ ସମ୍ଭବ ନଥିଲା ।

Advertisment

ଇସ୍‌ଲାମିକ ଷ୍ଟେଟ, ଅଲ-କାଏଦା ଏବଂ ଏ ସମ୍ପର୍କିତ ସଂଗଠନଗୁଡ଼ିକ ଉପରେ ବିଶ୍ଳେଷଣାତ୍ମକ  ସପୋର୍ଟ ମନିଟରିଂ ଟିମ ଗତ ମଙ୍ଗଳବାର ଦିନ ପ୍ରକାଶ କରିଛି ଏକ ରିପୋର୍ଟ । ଏହି ରିପୋର୍ଟରେ ଗତ ଏପ୍ରିଲ ୨୨ ତାରିଖରେ ଜମ୍ମୁ-କଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର ଉଲ୍ଲେଖ କରାଯାଇଛି । ଏହି ଆକ୍ରମଣରେ ୨୬ ଜଣଙ୍କର ମୃତ୍ୟୁ ହୋଇଥିଲା । ରିପୋର୍ଟରେ କୁହାଯାଇଛି, "୫ ଜଣ ଆତଙ୍କବାଦୀ ଜମ୍ମୁ-କଶ୍ମୀରର ପହଲଗାମରେ ଥିବା ପର୍ଯ୍ୟଟନ ସ୍ଥଳୀ ଉପରେ ଆକ୍ରମଣ କରିଥିଲେ । TRF ସେହି ଦିନ ହିଁ ଏହି ଆକ୍ରମଣ ପାଇଁ ନିଜକୁ ଦାୟୀ କରିଥିଲା ଏବଂ ଘଟଣାସ୍ଥଳର ଏକ ଫଟୋ ମଧ୍ୟ ସେୟାର କରିଥିଲା।"

'ଲସ୍କରର ସହାୟତା ବିନା ଆକ୍ରମଣ ସମ୍ଭବ ନଥିଲା'
ରିପୋର୍ଟରେ ଏକ ସଦସ୍ୟ ଦେଶର କଥାକୁ ଭିତ୍ତି କରି କୁହାଯାଇଛି, "ଏହି ଆକ୍ରମଣ ପାକିସ୍ତାନ ସ୍ଥିତ ଲସ୍କର-ଏ-ତୋଇବାର ସମର୍ଥନ ବିନା ସମ୍ଭବ ନଥିଲା ଏବଂ TRF ତଥା ଲସ୍କର ମଧ୍ୟରେ ସମ୍ପର୍କ ରହିଛି । ଅନ୍ୟ ଏକ ସଦସ୍ୟ ଦେଶ କହିଛି ଯେ ଏହି ଆକ୍ରମଣ TRF ଦ୍ୱାରା କରାଯାଇଥିଲା, ଯାହାକି ଲସ୍କରର ଅନ୍ୟ ଏକ ନାମ ।" ତେବେ, ଅନ୍ୟ ଏକ ସଦସ୍ୟ ଦେଶ ଏହି ଦାବିକୁ ଖାରଜ କରି କହିଛି ଯେ ଲସ୍କର-ଏ-ତୋଇବା ବର୍ତ୍ତମାନ ନିଷ୍କ୍ରିୟ ହୋଇଯାଇଛି।

ପାକିସ୍ତାନର ଚାପରେ TRFର ନାମ ନେଇନଥିଲା ଜାତିସଂଘ ! 
ରିପୋର୍ଟରେ ଏହା ମଧ୍ୟ କୁହାଯାଇଛି ଯେ ଜମ୍ମୁ କାଶ୍ମୀରରେ ଆଞ୍ଚଳିକ ସ୍ଥିତି ବର୍ତ୍ତମାନ ମଧ୍ୟ ସମ୍ବେଦନଶୀଳ ରହିଛି ଏବଂ "ଆଶଙ୍କା କରାଯାଉଛି ଯେ ଆତଙ୍କବାଦୀ ସଂଗଠନଗୁଡ଼ିକ ଏହି ସମ୍ବେଦନଶୀଳ ସ୍ଥିତିର ଫାଇଦା ଉଠାଇ ପାରନ୍ତି ।" ଆମେରିକା ଚଳିତ ମାସରେ TRFକୁ ଏକ ବିଦେଶୀ ଆତଙ୍କବାଦୀ ସଂଗଠନ ଏବଂ ବିଶେଷ ଭାବେ ନାମିତ ବୈଶ୍ୱିକ ଆତଙ୍କବାଦୀ ଭାବରେ ତାଲିକାଭୁକ୍ତ କରିଛି । ପହଲଗାମ ଆକ୍ରମଣ ପରେ ଏପ୍ରିଲ ୨୫ରେ ଜାତିସଂଘ ସୁରକ୍ଷା ପରିଷଦ ଏକ ବିବୃତି ଜାରି କରି କହିଥିଲା ଯେ ଏଭଳି ଘୃଣ୍ୟ ଆତଙ୍କବାଦୀ କାର୍ଯ୍ୟକଳାପ ପାଇଁ ଦାୟୀ ଅପରାଧୀ ଏବଂ ପ୍ରାୟୋଜକମାନଙ୍କୁ ନ୍ୟାୟ ପରିସରକୁ ଆଣିବା ଜରୁରୀ । ତେବେ ପାକିସ୍ତାନର ଚାପରେ ସେହି ବିବୃତିରେ TRFର ନାମ ସାମିଲ କରାଯାଇ ନଥିଲା ।