ନିର୍ବାଚନ ପୂର୍ବରୁ ବିହାରକୁ ବଡ଼ ଭେଟି; ଭଣ୍ଡାର ଖୋଲିଲେ ମୋଦୀ ସରକାର

କନକ ବ୍ୟୁରୋ: ବିହାର ନିର୍ବାଚନ ପୂର୍ବରୁ, ମୋଦୀ ସରକାରର ବିହାରକୁ ବଡ଼ ଭେଟି । ବୁଧବାର କେନ୍ଦ୍ର କ୍ୟାବିନେଟ ବିହାର ଏବଂ ପଡ଼ୋଶୀ ରାଜ୍ୟଗୁଡ଼ିକରେ ସଂଯୋଗୀକରଣ ଏବଂ ଆର୍ଥିକ କାର୍ଯ୍ୟକଳାପକୁ ପ୍ରୋତ୍ସାହିତ କରିବା ପାଇଁ ୭,୬୧୬ କୋଟି ଟଙ୍କାର ଦୁଇଟି ପ୍ରମୁଖ ପ୍ରକଳ୍ପକୁ ମଞ୍ଜୁରୀ ଦେଇଛନ୍ତି । ଏହାସହ ମୋଦୀ ସରକାର ବିହାର ପାଇଁ ୧୧ ଲକ୍ଷ କୋଟି ଟଙ୍କାର ପ୍ରସ୍ତାବକୁ ଅନୁମୋଦନ କରିଛନ୍ତି ।

କ୍ୟାବିନେଟ ବୈଠକରେ ନିଆଯାଇଥିବା ନିଷ୍ପତ୍ତି ସମ୍ପର୍କରେ ସୂଚନା ଦେଇ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ, ଭାଗଲପୁର-ଡୁମକା-ରାମପୁରହାଟ ରେଳ ଲାଇନର ଦୋହରୀକରଣ ପାଇଁ ୩,୧୬୯ କୋଟି ଟଙ୍କା ମଞ୍ଜୁର କରାଯାଇଛି । ଏହା ବ୍ୟତୀତ ବକ୍ସର-ଭାଗଲପୁର ହାଇ-ସ୍ପିଡ୍ କରିଡରର ଚାରି ଲେନ୍ ବିଶିଷ୍ଟ ମୋକାମା-ମୁଙ୍ଗେର ସେକ୍ସନର ନିର୍ମାଣ ପାଇଁ ୪,୪୪୭ କୋଟି ଟଙ୍କା ଅନୁମୋଦନ କରାଯାଇଛି । କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି, ଏହା ବକ୍ସରରୁ ଭାଗଲପୁର କରିଡରର ଏକ ଅଂଶ ।  ଏହା ଦକ୍ଷିଣ ବିହାରର ଏକ ଗୁରୁତ୍ୱପୂର୍ଣ୍ଣ ପ୍ରକଳ୍ପ । ଏହାର ଲମ୍ବ ମୋକାମାରୁ ମୁଙ୍ଗେର ପର୍ୟ୍ୟନ୍ତ ୮୨ କିଲୋମିଟର ରହିବ । 

କେନ୍ଦ୍ରମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ, ଭାଗଲପୁର-ଡୁମକା-ରାମପୁରହାଟ ରେଳ ଲାଇନ ସେକ୍ସନର ପୁନଃନିର୍ମାଣକୁ କ୍ୟାବିନେଟ ଅନୁମୋଦନ କରିଛି, ଯାହାର ମୋଟ ମୂଲ୍ୟ ୩,୧୬୯ କୋଟି ଟଙ୍କା । ଏହା ବିହାର, ଝାଡ଼ଖଣ୍ଡ ଏବଂ ପଶ୍ଚିମବଙ୍ଗକୁ ସଂଯୋଗ କରୁଥିବା ଏକ ଗୁରୁତ୍ୱପୂର୍ଣ୍ଣ ପ୍ରକଳ୍ପ । ସ୍ୱାଧୀନତା ପରେ, ରେଳବାଇ ମାଲ ପରିବହନ ନିରନ୍ତର ହ୍ରାସ ପାଉଥିଲା । ୨୭ ପ୍ରତିଶତ ସର୍ବନିମ୍ନ ସ୍ତରରେ ପହଞ୍ଚିବା ପରେ, ଏହା ଏବେ ବୃଦ୍ଧି ପାଇବା ଆରମ୍ଭ କରିଛି । ଜାଣିରଖିବା ଉଚିତ ଯେ, ଚଳିତ ବର୍ଷ ଶେଷ ସୁଦ୍ଧା ବିହାରରେ ବିଧାନସଭା ନିର୍ବାଚନ ହେବାକୁ ଯାଉଛି । ଆଉ ଏହା ପୂର୍ବରୁ ମୋଦୀ କ୍ୟାବିନେଟ୍ ବିହାର ପାଇଁ କରିଛନ୍ତି ଏମିତି କିଛି ବଡ଼ ଘୋଷଣା ।