୧୯ବର୍ଷରୁ କମ୍‌ କ୍ରିକେଟ୍‌ ବିଶ୍ବକପ୍: ସେମିଫାଇନାଲ୍‌ରେ ଅଷ୍ଟ୍ରେଲିଆ

କନକ ବ୍ୟୁରୋ: ଅଧିନାୟକ ଅଲିଭର ପେକ୍‌ଙ୍କ ୧୦୯ ରନ୍‌ ସହ ଦ୍ରୁତ ବୋଲର ଚାର୍ଲସ ଲାଚମୁଣ୍ଡଙ୍କ ୪ ୱିକେଟ୍‌ ସଫଳତା ବଳରେ ୱେଷ୍ଟଇଣ୍ଡିଜ୍‌କୁ ୨୨ ରନ୍‌ରେ ହରାଇ ଅଷ୍ଟ୍ରେଲିଆ ପ୍ରଥମ ଦଳ ଭାବେ ଚଳିତ ୧୯ବର୍ଷରୁ କମ୍‌ କ୍ରିକେଟ୍‌ ବିଶ୍ବକପ୍‌ର ସେମିଫାଇନାଲ୍‌ର ପ୍ରବେଶ କରିଛି। ଏହି ହାଇସ୍କୋରିଂ ମ୍ୟାଚ୍‌ରେ ୱେଷ୍ଟଇଣ୍ଡିଜ୍‌ ଟସ୍‌ ଜିତି ଅଷ୍ଟ୍ରେଲିଆକୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲା। ହେଲେ ଇଣ୍ଡିଜ୍ ବୋଲର୍‌ମାନେ ଅଷ୍ଟ୍ରେଲିଆକୁ ୩୦୦ ରନ୍‌ ତଳେ ଅଟକାଇବାର ଲକ୍ଷ୍ୟକୁ ହାସଲ କରି ପାରି ନଥିଲେ। ସେମାନଙ୍କ ପ୍ରଭାବହୀନ ବୋଲିଂରୁ ଫାଇଦା ଉଠାଇ ଅଷ୍ଟ୍ରେଲିଆ ନୀତେଶ ସାମୁଏଲ୍‌ (୫୬)ଙ୍କ ଅର୍ଦ୍ଧଶତକ ଏବଂ ପେକ୍‌’ଙ୍କ ଲଢ଼ୁଆ ଶତକ ବଳରେ ନିର୍ଦ୍ଧାରିତ ୫୦ ଓଭରରେ ୭ୱିକେଟ୍‌ ହରାଇ ୩୧୪ ରନ୍‌ କରି ନେଇଥିଲା। 

ଆହୁରି ପଢ଼ନ୍ତୁ... ପଦାରେ ପଡ଼ିଲା ବାଂଲାଦେଶର ଦୋମୁହାଁ ନୀତି, ଭାରତ ଗସ୍ତ ଲାଗି ସୁଟିଂ ଦଳକୁ ଦେଲା ମଞ୍ଜୁରି

ଜବାବରେ ୱେଷ୍ଟଇଣ୍ଡିଜ୍‌ର ଶୀର୍ଷ ୭ ବ୍ୟାଟର୍‌ ଭଲ ଆରମ୍ଭ ପାଇଥିଲେ ମଧ୍ୟ ଏହାକୁ ବଡ଼ ସ୍କୋର୍‌ରେ ରୂପାନ୍ତର କରି ପାରି ନଥିଲେ। ଅଧିନାୟକ ଜୋସୁଆ ଡୋର୍‌ନ ସର୍ବାଧିକ ୬୨ ରନ୍‌ କରିଥିଲେ। ୱେଷ୍ଟଇଣ୍ଡିଜ୍ ୯ ୱିକେଟ୍‌ ବିନିମୟରେ ୨୯୨ ରନ୍‌ କରି ପରାସ୍ତ ହୋଇଥିଲା। ପେକ୍‌’ଙ୍କୁ ଆଶାଜନକ ଭାବେ ତାଙ୍କ ମ୍ୟାଚ୍‌ ବିଜୟୀ ପାଳି ପାଇଁ ଶ୍ରେଷ୍ଠ ଖେଳାଳି ପୁରସ୍କାର ମିଳିଥିଲା। ଭାରତ ମଧ୍ୟ ସେମିଫାଇନାଲ୍‌ ଦୌଡ଼ରେ ରହିଛି। ଟିମ୍‌ ଇଣ୍ଡିଆ ନିଜ ପ୍ରଥମ ତିନିଟି ମ୍ୟାଚ୍‌କୁ ଜିତି ସାରିଥିଲା ବେଳେ ଶେଷ ମ୍ୟାଚ୍‌ରେ ଫେବ୍ରୁଆରି ୧ ତାରିଖରେ ପାରମ୍ପରିକ ପ୍ରତିଦ୍ବନ୍ଦ୍ବୀ ପାକିସ୍ତାନକୁ ଭେଟିବାକୁ ଯାଉଛି।