କନକ ବ୍ୟୁରୋ: ଶ୍ରାବଣ ମାସ ସରିବାକୁ ବସିଲାଣି। ହେଲେ ରାଜ୍ୟର ବିଭିନ୍ନ ଜିଲ୍ଲାରୁ ଆସିଛି ନିଅଣ୍ଟିଆ ବର୍ଷାର ଚିତ୍ର । କେଉଁଠି ମୌସୁମୀଜନିତ ବର୍ଷା, ବନ୍ୟାସ୍ଥିତି ଆଣିଛି ତ କେଉଁଠି ଚାଷ ପାଇଁ ପାଣି ଟୋପାଏ ବି ନାହିଁ। ବିଶେଷକରି ଉପକୂଳର କିଛି ସ୍ଥାନରେ ସ୍ଥିତି ସଙ୍ଗିନ। ପୁରୀ ଜିଲ୍ଲା ଅସ୍ତରଙ୍ଗ-କାକଟପୁରରେ ନିଅଣ୍ଟିଆ ବର୍ଷା ଚାଷୀଙ୍କ ମୁଣ୍ଡରେ ଚଡ଼କ ପକାଇଛି। ଫାଟି ଆଁ କରିଛି ଜମି। ତଳି ପକାଇବାକୁ ଅପେକ୍ଷା କରିଛନ୍ତି ଚାଷୀ, କିନ୍ତୁ ବର୍ଷାର ଦେଖା ନାହିଁ। 

Advertisment

ପାଣିପାଗ ବିଭାଗର ତଥ୍ୟ ଅନୁସାରେ, ଜୁଲାଇ ମାସରେ ପୁରୀ ଜିଲ୍ଲାରେ ୩୬ ପ୍ରତିଶତ କମ୍ ବର୍ଷା ହୋଇଛି। କେବଳ ମୌସୁମୀ ଋତୁରେ ନିଅଣ୍ଟିଆ ବର୍ଷା ଯୋଗୁଁ ୧୫ ପ୍ରତିଶତ ଜମିରେ ଧାନ ରୁଆ ହୋଇଥିବା ବେଳେ ୮୫ ପ୍ରତିଶତ ଜମି ପଡ଼ିଆ ପଡ଼ିଛି।

କେବଳ ପୁରୀ ନୁହେଁ, ଖୋର୍ଦ୍ଧା ଓ ଗଞ୍ଜାମ ଜିଲ୍ଲାରେ ମଧ୍ୟ ସମାନ ସ୍ଥିତି। ଅଭାବୀ ବର୍ଷା ଅଦିନିଆ ମରୁଡ଼ିକୁ ଡାକି ଆଣିଛି। ଖୋର୍ଦ୍ଧା ଜିଲ୍ଲା ବୋଲଗଡ଼, ବେଗୁନିଆ ବ୍ଲକରେ ବର୍ଷାର ଅଭାବ ଯୋଗୁଁ ମଟର ସହାୟତାରେ ପାଣି ମଡ଼ାଇ ତଳି ପକାଉଛନ୍ତି ଚାଷୀ। ଗଞ୍ଜାମ ଦିଗପହଣ୍ଡିରେ ମଧ୍ୟ ପାଣି ଅଭାବରୁ ଗଜା ମରୁଡ଼ି ସ୍ଥିତି ଉପୁଜିଛି। ଆଗାମୀ ୫ରୁ ୧୦ ଦିନରେ ବର୍ଷା ନହେଲେ, ଧାନ ତଳି ଗାଈ ଖାଇବ ବୋଲି କ୍ଷୋଭର ସହ କହିଛନ୍ତି ଚାଷୀ। ମରୁଡ଼ି ଆଶଙ୍କା ଭିତରେ କ’ଣ କରିବେ ଚାଷୀ, ସେନେଇ ଗୁରୁତ୍ବପୂର୍ଣ୍ଣ ପରାମର୍ଶ ଦେଇଛନ୍ତି ଓୟୁଏଟି କୃଷି ବୈଜ୍ଞାନିକ।

ଜୁନ୍ ୧ରୁ ଏପର୍ଯ୍ୟନ୍ତ ରାଜ୍ୟରେ ମୌସୁମୀଜନିତ ବର୍ଷା ସ୍ବାଭାବିକ ଠାରୁ ଅଧିକ ହୋଇଥିଲେ ବି କିଛି ସ୍ଥାନରେ କମ୍ ବର୍ଷା ମରୁଡ଼ି ସମ୍ଭାବନା ସୃଷ୍ଟି କରିଛି। ଅଗଷ୍ଟ ମାସ ପାଇଁ ଆଇଏମ୍‌ଡି ପୂର୍ବାନୁମାନ କରିଛି ଯେ, ଏଇ ମାସରେ ନିଅଣ୍ଟିଆ ବର୍ଷା ରହିବ।