କନକ ବ୍ୟୁରୋ : ମିଆଁମାରରୁ ଫେରିଲେ ୨ ଯୁବକ, ଫସି ରହିଛନ୍ତି ଆଉ ଦୁଇଜଣ । ଦୀର୍ଘ ୬ମାସ ନିର୍ଯାତନା ସହିବା ପରେ କଟକ ନିଆଳି ଅଂଚଳର ଦୁଇଜଣ ଯୁବକ ମିଆଁମାରରୁ ଘରକୁ ଫେରିଛନ୍ତି । ରାଜ୍ୟ ସରକାରଙ୍କ ଉଦ୍ୟମ ଯୋଗୁଁ ୩୦ ବର୍ଷୀୟ ପ୍ରତ୍ୟୁଷ ସ୍ୱାଇଁ ଓ ୨୭ ବର୍ଷୀୟ ବିଜୟ ନାୟକ ଘରକୁ ଫେରିଛନ୍ତି । ସେମାନଙ୍କ ସହ ଥିବା ଆଉ ୨ ଜଣ ଲକ୍ଷ୍ମୀକାନ୍ତ ପଣ୍ଡା ଓ ସୈାମ୍ୟରଞ୍ଜନ ବିହାରୀ ଏବେ ବି ସେଠାରେ ଫସି ରହିଛନ୍ତି । ମିଆଁମାରରୁ ଫେରିଥିବା ଦୁଇ ଯୁବକ କ୍ୟାମେରା ଆଗରେ ବଖାଣିଛନ୍ତି ସେମାନଙ୍କ ଉପରେ ହୋଇଥିବା ନିର୍ଯାତନାର କାହାଣୀ । 

Advertisment

ନିଆଳି ଅଞ୍ଚଳର ଏହି ୪ ଯୁବକଙ୍କୁ ଫୁଡ୍ ପ୍ୟାକେଜିଂ କମ୍ପାନୀରେ କାମ କରି ଅଧିକ  ରୋଜଗାରର ଲୋଭ ଦେଖାଇ ଜଣେ ଏଜେଣ୍ଟ ଗତ ଫେବୁଆରୀ ମାସରେ ନେଇଯାଇଥିଲା । ମିଆଁମାରରେ ପହଞ୍ଚିବା ପରେ ଓଡ଼ିଶା ଲୋକଙ୍କୁ ସାଇବର ଠକେଇ ଜାଲରେ ଫସେଇବାକୁ ବାଧ୍ୟ କରାଯାଉଥିଲା । ରାଜି ନହେଲେ ଖାଇବା ପିଇବା ବନ୍ଦ କରି ଦିଆଯିବା ସହିତ ଶାରୀରିକ ଓ ମାନସିକ ନିର୍ଯାତନା ଦିଆଯାଉଥିଲା । ଗୋଟିଏ ଘରେ ୧୦ରୁ ୧୫ ଦିନ ବନ୍ଦ କରି ରଖିବା ସହିତ ଦିନକୁ ଥରେ ମାତ୍ର ଖାଇବାକୁ ଦେଉଥିଲେ । ପରିବାର ସହିତ କୌଣସି ପ୍ରକାର ଯୋଗାଯୋଗ କରେଇ ଦେଉନଥିଲେ । ତେବେ ଚତୁରତାର ସହିତ ଜଣେ ଯୁବକ ଏ ସମ୍ପର୍କରେ ଫୋନ କରି ନିଜ ପରିବାରକୁ ଜଣାଇବା ପରେ ପରିବାର ଲୋକେ ପ୍ରଥମେ ଶ୍ରମ କମିସନର ଓ ପରେ ମିଆଁମାର ଦୁତାବାସ ସହିତ ଯୋଗାଯୋଗ କରିଥିଲେ ।