ଶସ୍ତା ହୋଇପାରେ ୨ ଚକିଆ ଯାନ : ଜିଏସଟି ହାରରେ ସମ୍ଭାବ୍ୟ ହ୍ରାସ କାର୍ଯ୍ୟକାରୀ ହେଲେ ମିଳିବ ବଡ଼ ରିହାତି

କନକ ବ୍ୟୁରୋ : ସାମଗ୍ରୀ ଏବଂ ସେବା ଟିକସ ହାରରେ ସମ୍ଭାବ୍ୟ ହ୍ରାସ କାର୍ଯ୍ୟକାରୀ ହେଲେ ଭାରତୀୟ ଅଟୋମୋବାଇଲ ଶିଳ୍ପରେ ଚାହିଦାରେ ଏକ ବିରାଟ ବୃଦ୍ଧି ଘଟିବ ବୋଲି ଆଶା କରାଯାଉଛି । ପ୍ରସ୍ତାବିତ ହାର ପରିବର୍ତ୍ତନ ଆସନ୍ତା ମାସରେ ଘୋଷଣା ହେବାର ସମ୍ଭାବନା ଅଛି । ଘୋଷଣା ପରେ ଦୁଇ ଚକିଆ ଯାନ ଏବଂ ଛୋଟ ଯାତ୍ରୀବାହୀ ଯାନ ସବୁଠାରୁ ଅଧିକ ଲାଭବାନ ହେବାର ସମ୍ଭାବନା ଅଛି । ଅନ୍ତର୍ଜାତୀୟ ଏଜେନ୍ସି ଜେଫେରିଜ୍ ଏହି ଦାବି କରିଛି । ରିପୋର୍ଟ ଅନୁଯାୟୀ, ଜିଏସଟି ହାର ହ୍ରାସ ଅଧିକାଂଶ ଯାନ ପାଇଁ ଟିକସ ସ୍ଲାବ୍ ୨୮ପ୍ରତିଶତରୁ ୧୮ପ୍ରତିଶତ ଏବଂ ଟ୍ରାକ୍ଟର ପାଇଁ ୧୨ପ୍ରତିଶତରୁ ୫ ପ୍ରତିଶତକୁ ହ୍ରାସ କରାଯିବ । ଯାହାଦ୍ବାରା ଯାନବାହନର ମୂଲ୍ୟରେ ୬ରୁ ୮% ହ୍ରାସ ଘଟିବ । ଏହାଦ୍ବାରା ଅଟୋମୋବାଇଲ୍ସ ବଜାର ସୁଲଭତାରେ ଏକ ଗୁରୁତ୍ୱପୂର୍ଣ୍ଣ ଉନ୍ନତି ଆସିବ ଏବଂ ଚାହିଦା ମଧ୍ୟ ବୃଦ୍ଧି ପାଇବ । ଦୁଇଚକିଆ ଯାନ, ଯାହା ଉପରେ ବର୍ତ୍ତମାନ ୨୮-୩୧ ପ୍ରତିଶତ ଟିକସ ଲାଗୁ ହୋଇଛି, ଏବଂ ୪ ମିଟରରୁ କମ୍ କାର, ଯାହା ଉପରେ ପ୍ରାୟ ୨୯-୩୧ ପ୍ରତିଶତ ଟିକସ ଲାଗୁ ହୋଇଛି, ସେଗୁଡ଼ିକ ସବୁଠାରୁ ଅଧିକ ଲାଭବାନ ହେବେ ବୋଲି ଆଶା କରାଯାଉଛି । ବଡ଼ ଏସୟୁଭି, ଯାହା ଉପରେ ବର୍ତ୍ତମାନ ୪୫ ରୁ ୫୦ ପ୍ରତିଶତ ଟିକସ ଲାଗୁ ହୋଇଛି ସେଗୁଡ଼ିକୁ ମଧ୍ୟ କିଛି ଆଶ୍ୱସ୍ତି ମିଳିପାରିବ ଏବଂ ପ୍ରଭାବୀ ହାର ୪୦ ପ୍ରତିଶତକୁ ହ୍ରାସ ପାଇପାରେ ବୋଲି ଆକଳନ କରୁଛନ୍ତି ବିଶେଷଜ୍ଞ । ଅଟୋ ଶିଳ୍ପରେ ଗତ କିଛି ମାସ ମଧ୍ୟରେ ଚାହିଦା ହ୍ରାସ ପାଇଛି, ଏପ୍ରିଲ-ଜୁଲାଇ ମାସରେ ଦୁଇ ଚକିଆ ଏବଂ ଯାତ୍ରୀବାହୀ ଯାନ ପଞ୍ଜିକରଣ ବର୍ଷ-ବର୍ଷ ତୁଳନାରେ କେବଳ ୨ ରୁ ୩ ପ୍ରତିଶତ ବୃଦ୍ଧି ପାଇଛି । ତଥାପି ଆକଳନ କରାଯାଉଛି ଯେ ଆୟକର ହ୍ରାସ, ନଗଦ ପ୍ରବାହ ସହଜ କରିବା ଏବଂ ସମ୍ଭାବ୍ୟ ଜିଏସଟି ହ୍ରାସ ମଧ୍ୟରେ ଉତ୍ସବ ଋତୁରେ ଗ୍ରାହକଙ୍କୁ ସୁହାଇବ । 

 
ଜିଏସଟି ହାରରେ ସମ୍ଭାବ୍ୟ ହ୍ରାସ କାର୍ଯ୍ୟକାରୀ ହେଲେ ଅଟୋମୋବାଇଲ୍ସ କ୍ଷେତ୍ରକୁ ଫାଇଦା
ପ୍ରସ୍ତାବିତ ହାର ପରିବର୍ତ୍ତନ ଆସନ୍ତା ମାସରେ ଘୋଷଣା ହେବାର ସମ୍ଭାବନା
ଦୁଇ ଚକିଆ ଯାନ ଏବଂ ଛୋଟ ଯାତ୍ରୀବାହୀ ଯାନର ଦର କମିବା ନେଇ ଆକଳନ
ଟିକସ ସ୍ଲାବ୍ ୨୮ପ୍ରତିଶତରୁ ୧୮ପ୍ରତିଶତ ୧୨ପ୍ରତିଶତରୁ ୫ ପ୍ରତିଶତକୁ ହ୍ରାସ କରାଯିବ
ଯାନବାହନର ମୂଲ୍ୟରେ ୬ରୁ ୮% ହ୍ରାସ ଘଟିବ