ଖେଳୁଥିବା ବେଳେ କେନାଲରେ ଭାସିଗଲେ ଦୁଇ ନାବାଳକ । ୪ ଘଣ୍ଟା ପରେ ଉଦ୍ଧାର ହେଲା ମୃତଦେହ

କନକ ବ୍ୟୁରୋ : ଖେଳୁଥିବା ବେଳେ କେନାଲରେ ଭାସିଗଲେ ଦୁଇ ନାବାଳକ । ବାଲେଶ୍ବର ସୋର ବ୍ଲକ ଗୋପୀନାଥପୁର ପଞ୍ଚାୟତ ବରିସାହିରେ ଘଟିଛି ଏହି ଦୁଃଖଦ ଘଟଣା । ଦୁଇ ନାବାଳକ ହେଲେ ୧୦ ବର୍ଷୀୟ ସାଇ ମହେଶ ନାୟକ ଓ ୧୩ ବର୍ଷୀୟ ହରିହର ଦାସ। ଅଲିପୁର ଗାଁର ହରିହର ଦୁଇ ଦିନ ତଳେ ମାମୁ ଘରକୁ ବୁଲିବାକୁ ଆସିଥିଲେ ।  ସାଇ ମହେଶଙ୍କ ସହ ସାଙ୍ଗ ହୋଇ ନିକଟରେ ଥିବା ସାଳନ୍ଦୀ କେନାଲକୁ ଖେଳିବାକୁ ଯାଇଥିଲେ । ଏହି ସମୟରେ କେନାଲରେ ଲାଗିଥିବା  ଶିଉଳିରେ ଗୋଡ଼ ଖସିଯିବାରୁ ଦୁଇ ଜଣଯାକ ଭାସିଯାଇଥିଲେ ।  ଅଗ୍ନିଶମ କର୍ମଚାରୀ ପ୍ରାୟ ୪ ଘଣ୍ଟା ଖୋଜାଖୋଜି କରିବା ପରେ ଉଭୟଙ୍କ ମୃତଦେହ ଉଦ୍ଧାର କରିଥିଲେ। ମେଡିକାଲକୁ ନେଇଥିବା ବେଳେ ଡାକ୍ତର ମୃତ ଘୋଷଣା କରିଥିଲେ ।