କନକ ବ୍ୟୁରୋ :   ପହଲଗାମରେ ଗତ ଏପ୍ରିଲ ୨୨ ତାରିଖରେ ଆତଙ୍କବାଦୀଙ୍କ ଆକ୍ରମଣରେ ୨୬ ଜଣ ପ୍ରାଣ ହରାଇଥିଲେ। ଯାହାର ପ୍ରତିଶୋଧ ନେବାକୁ ମେ’ ୭ ତାରିଖ ରାତିରେ ଭାରତ ଆରମ୍ଭ କରିଥିଲା ଅପରେସନ ସିନ୍ଦୂର । ପାକିସ୍ତାନ ଓ ପାକିସ୍ତାନ ଅଧିକୃତ କାଶ୍ମୀରରେ ଅନେକ ଆତଙ୍କୀ ଆଡ୍ଡାକୁ ଧ୍ୱଂସ କରି ଦିଆଯାଇଥିଲା । ୪ ଦିନ ପରେ ଉଭୟ ପାକିସ୍ତାନ ଓ ଭାରତ ଯୁଦ୍ଧବିରତି ଘୋଷଣା କରିଥିଲେ। ତେବେ ଯୁଦ୍ଧ ଭିତରେ ୫ଟି ଜେଟ୍ ବିମାନକୁ ଗୁଳିକରି ଖସାଇ ଦିଆଯାଇଥିଲା ବୋଲି ଆମେରିକା ରାଷ୍ଟ୍ରପତି ଟ୍ରମ୍ପ୍ କହିଛନ୍ତି ।

Advertisment

ହ୍ୱାଇଟ୍ ହାଉସରେ ଶୁକ୍ରବାର ରିପବ୍ଲିକାନ ସାଂସଦମାନଙ୍କ ସହ ଏକ ରାତ୍ରିଭୋଜନ ପାର୍ଟିରେ ଟ୍ରମ୍ପ ଏହା କହିଛନ୍ତି । କିନ୍ତୁ କେଉଁ ଦେଶର ଜେଟ୍ ବିମାନ ଖସିଛି ? ଏବଂ କିଏ ଖସାଇଲା ? ତାହା ଟ୍ରମ୍ପ୍ ସ୍ପଷ୍ଟ କରିନାହାନ୍ତି। ଅପରେସନ ସିନ୍ଦୂରରେ ଭାରତର କୌଣସି ବିମାନ ନଷ୍ଟ ହୋଇନାହିଁ ବୋଲି ଭାରତ ପୂର୍ବରୁ କହିସାରିଛି । କିନ୍ତୁ ଯୁଦ୍ଧ ସମୟରେ ୫ଟି ଜେଟ୍ ବିମାନ ଖସିଥିବା ନେଇ ଡୋନାଲ୍ଡ ଟ୍ରମ୍ପଙ୍କ ବୟାନକୁ ନେଇ ପୁଣି ଆରମ୍ଭ ହୋଇଛି ଚର୍ଚ୍ଚା ।

ଯୁଦ୍ଧବିରତି ପରେ ପରେ ଟ୍ରମ୍ପ୍ ଦାବି କରିଥିଲେ, ତାଙ୍କ ହସ୍ତକ୍ଷେପ ଯୋଗୁ ଯୁଦ୍ଧ ବନ୍ଦ ହୋଇଛି । କିନ୍ତୁ ଏହାକୁ ଭାରତ ଖଣ୍ଡନ କରିଥିଲା। ଭାରତ ଓ ପାକିସ୍ତାନର ସାମରିକ ଅଧିକାରୀଙ୍କ ମଧ୍ୟରେ କଥାବାର୍ତ୍ତା ପରେ ଯୁଦ୍ଧ ବନ୍ଦ ହୋଇଥିଲା ବୋଲି କହିଥିଲା ଭାରତ ।