କନକ ବ୍ୟୁରୋ: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ୟୁରୋପ ଉପରେ ପ୍ରସ୍ତାବିତ ଶୁଳ୍କକୁ ଅସ୍ଥାୟୀ ଭାବରେ ସ୍ଥଗିତ ରଖିଛନ୍ତି । କିନ୍ତୁ ଗ୍ରିନ୍‌ଲାଣ୍ଡକୁ ନେବା ପାଇଁ ତାଙ୍କର ଆଗ୍ରହ ସୁଦୃଢ଼ ରହିଛି । ଶନିବାର, ହ୍ୱାଇଟ୍ ହାଉସ୍ ଏକ ଏଆଇ-ଜେନେରେଟେଡ୍ ଫଟୋ ସେୟାର କରିଛି । ଫଟୋରେ ୭୯ ବର୍ଷୀୟ ଟ୍ରମ୍ପ ଏକ ପେଙ୍ଗୁଇନ୍ ସହିତ ଗ୍ରିନ୍‌ଲାଣ୍ଡ ଆଡକୁ ଚାଲୁଛନ୍ତି। ଫଟୋର କ୍ୟାପସନରେ ଲେଖା ରହିଛି ପେଙ୍ଗୁଇନ୍ କୁ ଆଲିଙ୍ଗନ କର । ଏହି ପୋଷ୍ଟକୁ ନେଇ ପୁଣି ଥରେ ଗ୍ରିନ୍‌ଲାଣ୍ଡ ସମ୍ପର୍କରେ ଆମେରିକାର ଉଦ୍ଦେଶ୍ୟ ବିଷୟରେ ଅନ୍ତର୍ଜାତୀୟ ସ୍ତରରେ ବିତର୍କ ଆରମ୍ଭ ହୋଇଛି । ଡୋନାଲ୍ଡ ଟ୍ରମ୍ପ କିଛି ମାସ ଧରି ସାର୍ବଜନୀନ ଭାବରେ କହିଆସୁଛନ୍ତି ଯେ, ଗ୍ରିନ୍‌ଲାଣ୍ଡ ଆମେରିକାର ଜାତୀୟ ସୁରକ୍ଷା ପାଇଁ ଗୁରୁତ୍ୱପୂର୍ଣ୍ଣ । ସେ ପୂର୍ବରୁ ଡେନମାର୍କକୁ ଚେତାବନୀ ଦେଇଥିଲେ, ଯଦି ଗ୍ରିନ୍‌ଲାଣ୍ଡ ସମ୍ପର୍କରେ କୌଣସି ଚୁକ୍ତି ନହୁଏ, ତେବେ ଆମେରିକା ସାମରିକ ବିକଳ୍ପ ବିଷୟରେ ବିଚାର କରିବ । ଗ୍ରିନ୍‌ଲାଣ୍ଡ ବର୍ତ୍ତମାନ ଡେନମାର୍କ ପ୍ରଶାସନ ଅଧୀନରେ ଏକ ଅର୍ଦ୍ଧ-ସ୍ୱାୟତ୍ତ ଅଞ୍ଚଳ ଭାବେ ରହିଛି । ଟ୍ରମ୍ପଙ୍କ ମନ୍ତବ୍ୟ ପରେ, ଡେନମାର୍କ ଓ ଏହାର ୟୁରୋପୀୟ ସହଯୋଗୀ ଗ୍ରିନ୍‌ଲାଣ୍ଡରେ ସେମାନଙ୍କର ସାମରିକ ଉପସ୍ଥିତି ବୃଦ୍ଧି କରିଥିଲେ । ଏହା ଦ୍ବାରା ଆମେରିକା-ୟୁରୋପୀୟ ସମ୍ପର୍କ ଆହୁରି ବିଗିଡ଼ି ଯାଇଥିଲା ।

Advertisment

ଅଧିକ ପଢନ୍ତୁ:  ଟ୍ରମ୍ପଙ୍କ ବିରୋଧରେ ମେଳି ବାନ୍ଧୁଛନ୍ତି ୟୁରୋପୀୟ ଦେଶ, ଗ୍ରିନ୍‌ଲାଣ୍ଡକୁ ସେନା ପଠାଇବେ ଜର୍ମାନୀ ଓ ଫ୍ରାନ୍ସ

ଗ୍ରିନ୍‌ଲାଣ୍ଡ ବିବାଦ ଯୋଗୁ ଶୁଳ୍କ ସଙ୍କଟ
ଗ୍ରିନ୍‌ଲାଣ୍ଡ ବିବାଦ ନେଇ ଟ୍ରମ୍ପ ସାତଟି ୟୁରୋପୀୟ ସଂଘ ଦେଶ ଓ ଯୁକ୍ତରାଜ୍ୟ ଉପରେ ୧୦ ପ୍ରତିଶତ ଶୁଳ୍କ ଘୋଷଣା କରିବା ପରେ ପରିସ୍ଥିତି ଆହୁରି ଖରାପ ହୋଇଯାଇଥିଲା। ତେବେ ଶୁଳ୍କକୁ ପରେ ପ୍ରତ୍ୟାହାର କରାଯାଇଥିଲା। ସ୍ୱିଜରଲାଣ୍ଡର ଡାଭୋସରେ ବିଶ୍ୱ ଅର୍ଥନୈତିକ ଫୋରମ୍ ସମୟରେ ନାଟୋ ମୁଖ୍ୟ ମାର୍କ ରୁଟ୍ଟଙ୍କ ସହ ସାକ୍ଷାତ କରିବା ପରେ ଟ୍ରମ୍ପ ଏହି ନିଷ୍ପତ୍ତି ନେଇଥିଲେ। ଟ୍ରମ୍ପ ଦାବି କହିଥିଲେ, ଗ୍ରିନ୍‌ଲାଣ୍ଡ ସମ୍ପର୍କରେ ଏକ ଢାଞ୍ଚା ଖୁବ୍ ଶୀଘ୍ର ଉନ୍ମୋଚିତ ହେବ ଯାହା ଆମେରିକା ଓ ୟୁରୋପ ଉଭୟଙ୍କ ପାଇଁ ଲାଭଦାୟକ ହେବ ।

ଏଆଇ ଚିତ୍ର ରଣନୀତି
ଟ୍ରମ୍ପ ପୂର୍ବରୁ ମଧ୍ୟ ଗ୍ରିନ୍‌ଲାଣ୍ଡ ସମ୍ପର୍କରେ ଏଆଇ-ଜେନେରେଟେଡ୍ ଫଟୋ ସେୟାର କରିଛନ୍ତି । ସମ୍ପ୍ରତି, ସେ ଗ୍ରିନ୍‌ଲାଣ୍ଡକୁ ଆମେରିକାର ଅଂଶ ଭାବରେ ଦର୍ଶାଉଥିବା ଆଉ ଏକ ଏଆଇ ଫଟୋ ମଧ୍ୟ ପୋଷ୍ଟ କରିଥିଲେ । ଏହି ଫଟୋରେ ଜେ.ଡି. ଭାନ୍ସ, ମାର୍କୋ ରୁବିଓ ତଥା ଟ୍ରମ୍ପଙ୍କୁ ଆମେରିକୀୟ ପତାକା ଉତ୍ତୋଳନ କରୁଥିବାର ମଧ୍ୟ ଦେଖାଯାଇଛି। ଟ୍ରମ୍ପ ଟ୍ରୁଥ୍ ସୋସିଆଲରେ ଆଉ ଏକ ଏଆଇ ଫଟୋ ସେୟାର କରିଥିଲେ । ଯେଉଁଥିରେ ଗ୍ରିନ୍‌ଲାଣ୍ଡ, କାନାଡା ଓ ଭେନେଜୁଏଲାକୁ ଅନ୍ତର୍ଭୁକ୍ତ କରି ଆମେରିକାର ଏକ ବିସ୍ତାରିତ ମାନଚିତ୍ର ଦର୍ଶାଯାଇଥିଲା । ଏହି ଫଟୋଟି ଅଗଷ୍ଟ ୨୦୨୫ ରେ ୟୁରୋପୀୟ ନେତାମାନଙ୍କ ସହିତ ଏକ ବୈଠକର ଏକ ପ୍ରକୃତ ଫଟୋରୁ ଡିଜିଟାଲ୍ ଭାବରେ ପରିବର୍ତ୍ତନ କରାଯାଇଥିବା ରିପୋର୍ଟ ହୋଇଥିଲା ।

ଗ୍ରିନ୍‌ଲାଣ୍ଡ ପାଇଁ କିଛି ବି ଦେବାକୁ ମନା
କିଛି ଦିନ ତଳେ ଟ୍ରମ୍ପ କହିଥିଲେ, ଗ୍ରିନ୍‌ଲାଣ୍ଡ ପାଇଁ ଆମେରିକାକୁ କୌଣସି ମୂଲ୍ୟ ଦେବାକୁ ପଡ଼ିବ ନାହିଁ । ଏହି ଅର୍ଦ୍ଧ-ସ୍ୱାୟତ୍ତ ଅଞ୍ଚଳ ପାଇଁ ସେ କ’ଣ ଦେବାକୁ ପ୍ରସ୍ତୁତ ଅଛନ୍ତି ବୋଲି ପଚରାଯିବାରୁ, ସେ କହିଥିଲେ ଯେ, କେବଳ ଗୋଲ୍ଡେନ୍ ଡୋମ୍ କ୍ଷେପଣାସ୍ତ୍ର ପ୍ରତିରକ୍ଷା ପ୍ରଣାଳୀ ନିର୍ମାଣ କରିବା ଯଥେଷ୍ଟ ହେବ । ଟ୍ରମ୍ପଙ୍କ ଅନୁଯାୟୀ, ଏହି ଚୁକ୍ତିନାମା ଆମେରିକାକୁ ଗ୍ରିନ୍‌ଲାଣ୍ଡରେ ବିଶେଷକରି ସାମରିକ ଉଦ୍ଦେଶ୍ୟ ପାଇଁ ପୂର୍ଣ୍ଣ ପ୍ରବେଶ ପ୍ରଦାନ କରିବ । ସେ ସରଳ ଭାବରେ କହିଥିଲେ, ଆମେ ଯାହା ଚାହୁଁଛୁ ତାହା ବିନା ମୂଲ୍ୟରେ ପାଇବୁ ।

ୟୁରୋପର ଚିନ୍ତା ବଢ଼ିଲା, ନିବେଶକଙ୍କ ମଧ୍ୟରେ ଅସ୍ଥିରତା
ଟ୍ରମ୍ପଙ୍କ ବାରମ୍ବାର ମନ୍ତବ୍ୟ ଓ ଶୁଳ୍କ ଧମକ ୟୁରୋପରେ ଚିନ୍ତା ସୃଷ୍ଟି କରିଛି । ଗତ ସପ୍ତାହରେ ଟ୍ରମ୍ପ ଆଠଟି ୟୁରୋପୀୟ ଦେଶ ଉପରେ ୧୦ ପ୍ରତିଶତ ଶୁଳ୍କ ଲଗାଇବାକୁ ଧମକ ଦେଇଥିଲେ। ଫଳରେ ବିଶ୍ୱ ବଜାରରେ ଅସ୍ଥିରତା ସୃଷ୍ଟି ହୋଇଥିଲା । ସେ ଡାଭୋସରେ ତାଙ୍କର ଏକ ଘଣ୍ଟାରୁ ଅଧିକ ସମୟର ଭାଷଣ ସମୟରେ ଗ୍ରିନ୍‌ଲାଣ୍ଡ ପ୍ରସଙ୍ଗକୁ ମଧ୍ୟ ଉଠାଇଥିଲେ । ପରେ ଏକ ନୂତନ ଚୁକ୍ତିନାମା ଉପରେ ଆଲୋଚନା ପାଇଁ ନାଟୋ ମୁଖ୍ୟଙ୍କ ସହ ସାକ୍ଷାତ କରିଥିଲେ । ତେବେ ଏହାର ବିବରଣୀ ଏପର୍ଯ୍ୟନ୍ତ ସାର୍ବଜନୀନ କରାଯାଇ ନାହିଁ ।