ଟ୍ରମ୍ପଙ୍କ ପ୍ରତିଶୋଧମୂଳକ ଶୁଳ୍କ ନୀତି: ଭାରତ ସମେତ ୭୦ରୁ ଅଧିକ ଦେଶ ପ୍ରଭାବିତ ହେବାର ଆଶଙ୍କା

କନକ ବ୍ୟୁରୋ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରତିଶୋଧମୂଳକ ଶୁଳ୍କ ନୀତି ଟାରିଫ୍‌ ମାଡ଼ । ଟ୍ରମ୍ପ ଆଜିଠୁ ଲାଗୁ କରିଛନ୍ତି ୨୫% ଟାରିଫ୍। ଟାରିଫ୍‌ ପ୍ରଭାବରେ ଭାରତରୁ ଆମଦାନୀ ହେଉଥିବା ସାମଗ୍ରୀ ମହଙ୍ଗା ହାରରେ ଆମେରିକାରେ ଉପଲବ୍ଧ ହେବ ।  ଖାଲି ଭାରତ ନୁହେଁ  ଟ୍ରମ୍ପଙ୍କ ଏହି କାର୍ଯ୍ୟକାରୀରେ ୭୦ରୁ ଅଧିକ ଦେଶରୁ ଆମଦାନୀ ହେଉଥିବା ସାମଗ୍ରୀ ଉପରେ ୧୦% ରୁ ୪୧% ପର୍ଯ୍ୟନ୍ତ ପ୍ରତିଶୋଧମୂଳକ ଶୁଳ୍କ ଲାଗୁ କରାଯିବ । ଏହି ନୂତନ ନିୟମ ଅଗଷ୍ଟ ୭ରୁ ଲାଗୁ ହେବ ।  ଏହି ପଦକ୍ଷେପ ବିଶ୍ୱ ଅର୍ଥନୀତି ଏବଂ ଆମେରିକାର ଦୀର୍ଘ ଦିନର ସହଯୋଗୀ ଦେଶମାନଙ୍କ ସହ ସମ୍ପର୍କକୁ ପ୍ରଭାବିତ କରିବ ବୋଲି ଆଶଙ୍କା କରାଯାଉଛି । 

ଭାରତ ଉପରେ ପ୍ରଭାବ:
ଏହି ନୂଆ ଶୁଳ୍କ ନୀତି ଅନୁଯାୟୀ, ଆମେରିକାକୁ ରପ୍ତାନି ହେଉଥିବା ଭାରତୀୟ ସାମଗ୍ରୀ ଉପରେ ୨୫% ଶୁଳ୍କ ଲାଗୁ କରାଯିବ । ଟ୍ରମ୍ପ ପ୍ରଶାସନର ଜଣେ ବରିଷ୍ଠ ଅଧିକାରୀଙ୍କ କହିବା ଅନୁଯାୟୀ, ଭାରତ ସହ ବାଣିଜ୍ୟ ଆଲୋଚନାରେ ଅଗ୍ରଗତି ନ ହେବାରୁ ଟ୍ରମ୍ପ ଅସନ୍ତୁଷ୍ଟ ଅଛନ୍ତି। ସେ ଭାରତର ବଜାରକୁ ଏକ ବନ୍ଦ ବଜାର ବୋଲି କହିଛନ୍ତି ଏବଂ ବ୍ରିକ୍ସ ସଦସ୍ୟତା ଓ ଋଷରୁ ତେଲ କିଣିବା ଭଳି ଭୂ-ରାଜନୈତିକ ପ୍ରସଙ୍ଗରେ ମଧ୍ୟ ଚିନ୍ତା ପ୍ରକଟ କରିଛନ୍ତି । ଏହି ନିଷ୍ପତ୍ତି ଭାରତର ବୟନଶିଳ୍ପ, ଫାର୍ମାସ୍ୟୁଟିକାଲ୍ସ, ଏବଂ ଅଟୋ ପାର୍ଟସ୍ ଭଳି କ୍ଷେତ୍ରକୁ ଗୁରୁତର ଭାବେ ପ୍ରଭାବିତ କରିବାର ସମ୍ଭାବନା ରହିଛି ।  ୨୦୨୪ରେ ଭାରତରୁ ଆମେରିକାକୁ ପ୍ରାୟ ୮୭.୪ ବିଲିୟନ ଡଲାରର ସାମଗ୍ରୀ ରପ୍ତାନି ହୋଇଥିଲା । 
ଅନ୍ୟ ଦେଶମାନଙ୍କ ଉପରେ ପ୍ରଭାବ:
ଏହି ନୂତନ ଶୁଳ୍କ ନୀତିରେ ବିଭିନ୍ନ ଦେଶ ପାଇଁ ଭିନ୍ନ ଭିନ୍ନ ହାର ନିର୍ଦ୍ଧାରଣ କରାଯାଇଛି । 
ସିରିଆ: ସର୍ବାଧିକ ୪୧%
ଲାଓସ୍ ଓ ମିଆଁମାର: ୪୦%
ସ୍ୱିଜରଲ୍ୟାଣ୍ଡ: ୩୯%
କାନାଡା: ୩୫%
ପାକିସ୍ତାନ:୧୯%
ଦକ୍ଷିଣ ଆଫ୍ରିକା: ୩୦%
ତାଇୱାନ: ୨୦%
ବ୍ରାଜିଲ ଓ ୟୁନାଇଟେଡ୍ କିଙ୍ଗଡମ୍: ୧୦%

ଯେଉଁ ଦେଶଗୁଡ଼ିକର ନାମ ତାଲିକାରେ ନାହିଁ, ସେମାନଙ୍କ ଉପରେ ୧୦%ର ଡିଫଲ୍ଟ ଶୁଳ୍କ ଲାଗୁ ହେବ । ମେକ୍ସିକୋ ସହିତ ବାଣିଜ୍ୟ ଆଲୋଚନା ପାଇଁ ଟ୍ରମ୍ପ ୯୦ ଦିନର ଅତିରିକ୍ତ ସମୟ ଦେଇଛନ୍ତି ।