ଶ୍ରମିକଙ୍କ ଜୀବନ ସହ ସାଂଘାତିକ ଖେଳ । ଗାଈ ଗୋରୁଙ୍କ ପରି ଯାତ୍ରୀ ପରିବହନ

କନକ ବ୍ୟୁରୋ: ବାଜିରେ ଲାଗିଛି ଦାଦନ ଶ୍ରମିକଙ୍କ ଜୀବନ । ଅତି ଅମାନବୀୟ ଢଙ୍ଗରେ ଦାଦନ ଶ୍ରମିକଙ୍କୁ ପରିବହନ କରୁଛି ଘରୋଇ ବସ । ରାଜ୍ୟର ବିଭିନ୍ନ ଜିଲ୍ଲାରୁ ମାଲକାନଗିରି ଦେଇ ହାଇଦ୍ରାବାଦକୁ ପ୍ରତିଦିନ ବହୁ ସ୍ଲିପର ବସ ଯାତ୍ରା କରୁଛି । ତେବେ ଏହାର ପରିବହନ କ୍ଷମତା ୪୦ ରୁ ୫୦ ହୋଇଥିବା ବେଳେ ଏଥିରେ ଗାଈ ଗୋରୁ ପରି ୧୨୦ରୁ ଅଧିକ ଯାତ୍ରୀ ପରିବହନ କରାଯାଉଛି ।

• ଶ୍ରମିକଙ୍କ ଜୀବନ ସହ ସାଂଘାତିକ ଖେଳ
• ଗାଈ ଗୋରୁଙ୍କ ପରି ଯାତ୍ରୀ ପରିବହନ 

ମାଲକାନଗିରି ଦେଇ ହାଇଦ୍ରାବାଦ ଯାଉଥିବା ଲକଜୁରି ଏସି ସ୍ଲିପର ବସରେ ସିଟ୍ ଠାରୁ ଆରମ୍ଭ କରି ପାଦ ଚଲା ରାସ୍ତା ଯାଏଁ କେଉଁଠି ହେଲେ ସୋରିଷ ପକାଇବାକୁ ସ୍ଥାନ ନାହିଁ । ବସ ଗୁଡିକର କ୍ଷମତା ୪୦ ପାସେଞ୍ଜର ହୋଇ ଥିବା ବେଳେ ବସ ଭିତରେ ୧୨୦ ରୁ ୧୫୦ରୁ ଅଧିକ ଶ୍ରମିକଙ୍କୁ ନିୟମିତ ପରିବହନ କରାଯାଉଛି । ବାରମ୍ବାର ଏପରି ଅଭିଯୋଗ ଆସିବା ପରେ ହାଇଦ୍ରାବାଦ ଯାଉଥିବା ଏକ ବସର ରିଆଲିଟି ଚେକ୍ କରିଛି କନକ ନ୍ୟୁଜ । 

ଡବଲ ବର୍ଥରେ ୮ ଯାତ୍ରୀ, ସିଙ୍ଗିଲ ବର୍ଥରେ ୫ । ଚଟ୍ଟାଣ ମଧ୍ୟ ଖାଲି ନାହିଁ । ବିଭିନ୍ନ ଘରୋଇ ବସର ଡବଲ ସ୍ଲିପରରେ ୬ ରୁ ୮ ଯାତ୍ରୀ ଓ ସିଙ୍ଗଲ ସ୍ପିଲର ରେ ୪ ରୁ ୬ ଯାତ୍ରୀ ପରିବହନ କରାଯାଉଥିବା ବେଳେ ମନମୁଖି ଭଡା ମଧ୍ୟ ଆଦାୟ କରାଯାଉଛି । ଲକଜରି ସେବା ନାଁ ରେ ଏକ୍ସପ୍ରେସ ସେବା ବି ପାଇ ପାରୁନାହାନ୍ତି ଶ୍ରମିକ । ବୋରିଗୁମ୍ମାଠାରୁ ମାଲକାନଗିରି ଦେଇ ହାଇଦ୍ରାବାଦର ଦୂରତା ପ୍ରାୟ ୬୭୦ କିମି । ଏକ୍ସପ୍ରେସ ବସ ଭଡା ୯୨ ପଇସା ପ୍ରତି କିଲୋମିଟର ଦର ରେ ୬୧୬ ଟଙ୍କା ଭଡା ହବା କଥା । କିନ୍ତୁ ଆଦାୟ ହେଉଛି ୧୨୦୦ ଟଙ୍କା ।

ସୂଚନାଯୋଗ୍ୟ ଯେ, ମାଲକାନଗିରି ଜିଲ୍ଲାରେ ସରକାରୀ ଲକ୍ଷ୍ମୀ ବସକୁ ତୀବ୍ର ବିରୋଧ କରି ଆସୁଛନ୍ତି ଘରୋଇ ବସ ମାଲିକ ସଂଘ । କିନ୍ତୁ ଏଭଳି ଯାତ୍ରୀ ପରିବହନକୁ ନେଇ ମୁହଁ ଖୋଲୁନାହାନ୍ତି । ତେବେ ଏଥର କାର୍ୟ୍ୟାନୁଷ୍ଠାନର କଥା କହିଛନ୍ତି ପରିବହନ ମନ୍ତ୍ରୀ ।