କନକ ବ୍ୟୁରୋ : ସ୍ୱପ୍ନ ଦେଖାଇ ଭାଙ୍ଗିଦେଲେ ସରକାର । ବ୍ରହ୍ମପୁରବାସୀ ଗ୍ରିନ୍‌ଫିଲ୍ଡ ବିମାନବନ୍ଦର ଲାଗି ଦାବି କରୁଥିବାବେଳେ ରାଜ୍ୟ ସରକାର, ଆନ୍ଧ୍ର କୋର୍ଟକୁ ବଲ ଫିଙ୍ଗିଛନ୍ତି । କେନ୍ଦ୍ର-ଆନ୍ଧ୍ର ଚାହିଁଲେ ବ୍ରହ୍ମପୁରକୁ ମିଳିପାରେ ବଡ଼ ଭେଟି । ଯାହାକୁ ନେଇ ବ୍ରହ୍ମପୁରରେ ଦେଖିବାକୁ ମିଳିଛି ତୀବ୍ର ପ୍ରତିକ୍ରିୟା ।

Advertisment

ତିନି ଦିନ ତଳେ ରାଜ୍ୟ ପରିବହନ ମନ୍ତ୍ରୀ ବିଭୂତି ଜେନା ବିବୃତିର ଦୁଇପଦ କଥା ବ୍ରହ୍ମପୁର ପାଣିପାଗକୁ ସରଗରମ କରିଛି । ବ୍ରହ୍ମପୁରରେ ଗ୍ରିନ୍‌ଫିଲ୍ଡ ଏୟାରପୋର୍ଟ ପାଇଁ ଦାବି ଦୀର୍ଘଦିନର । ହେଲେ ଆନ୍ଧ୍ର ପାଖେ ରାଜ୍ୟ ସରକାର କାନି ପତାଇବାକୁ ଗ୍ରହଣ କରିପାରିନାହାନ୍ତି ବ୍ରହ୍ମପୁରବାସୀ । ମନ୍ତ୍ରୀଙ୍କ କହିବା କଥା ବାରୁଆ-ପଲାସା ପାଖେ ଆନ୍ଧ୍ର କରୁଛି ବିମାନବନ୍ଦର । କେନ୍ଦ୍ର-ଆନ୍ଧ୍ର ଚାହିଲେ ତାହା ସୁବାଣିକୁ ଆସିବ । ସୁମାଣ୍ଡି ପାଖରେ ରହିଛି ୪ ହଜାର ଏକର ଜମି । ସୀମାନ୍ତରେ ହେଲେ ଉପକୃତ ହେବେ ଦୁଇ ରାଜ୍ୟ । ଡବଲ ଇଞ୍ଜିନ ସରକାର ଥାଇ ବି ବ୍ରହ୍ମପୁରରେ ନିଜ ଦମରେ ଗ୍ରିନ୍‌ଫିଲ୍ଡ ବିମାନବନ୍ଦର ନ କରି ସରକାରୀ ପ୍ରତାରଣାର ଏ କି ଚିତ୍ର ବୋଲି ପଚାରିଛନ୍ତି ବ୍ରହ୍ମପୁରବାସୀ ।

ରଙ୍ଗେଇଲୁଣ୍ଡା ଏୟାରଷ୍ଟ୍ରିପ୍ କାମ ସରୁନାହିଁ କାହିଁକି ? କାହିଁକି ଆନ୍ଧ୍ର ପାଖେ ହାତ ପତାଉଛି ରାଜ୍ୟ ? ଗ୍ରିନ୍‌ଫିଲ୍ଡ ବିମାନବନ୍ଦର ପାଇଁ ସାହସ ହେଉନି କି ? ବିମାନବନ୍ଦର ରାଜନୀତି ଭିତରେ ପରିବହନ ମନ୍ତ୍ରୀଙ୍କୁ ଘେରିଛି ବିଜେଡି । ନିର୍ବାଚନ ପୂର୍ବରୁ ପ୍ରତିଶ୍ରୁତିର ଇମାରତ ତୋଳି, ଜିତିଯିବା ପରେ ଭୁଲିଯିବା ବିଜେପିର ଅଭ୍ୟାସ ବୋଲି କହିଛନ୍ତି ପୂର୍ବତନ ବିଧାୟକ ବିକ୍ରମ ପଣ୍ଡା ।

ଗତ ମେ ୨ ତାରିଖରେ ରାଜ୍ୟରେ ବିମାନବନ୍ଦର ଭିତ୍ତିଭୂମି ନେଇ ସମୀକ୍ଷା କରିଥିଲେ ମୁଖ୍ୟମନ୍ତ୍ରୀ । ରାଜ୍ୟରେ ୧୪ ଜିଲ୍ଲାରେ ହେଲିପୋର୍ଟ କରିବା ପାଇଁ ଏହି ବୈଠକରେ ନିଷ୍ପତ୍ତି ହୋଇଥିଲା । ଏଥିସହ ପୁରୀ ଓ ପାରାଦୀପରେ ଗ୍ରୀନ୍ ଫିଲ୍ଡ ବିମାନବନ୍ଦର ସହିତ ରାଉରକେଲା ବିମାନ ବନ୍ଦରର ଉନ୍ନୟନ ନେଇ ବି ଆଲୋଚନା ହୋଇଥିଲା । ରାଜ୍ୟରେ ଉଡ଼ାନ ଯୋଜନାରେ ଝାରସୁଗୁଡ଼ା, ଜୟପୁର, ରାଉରକେଲା ଓ ଉତ୍କେଲା ଏୟାରଷ୍ଟ୍ରିପ୍‌ର ବିକାଶ କରାଯାଇଥିବା ବେଳେ ରଙ୍ଗେଇଲୁଣ୍ଡା ଓ ମାଲକାନଗିରିରୁ ବିମାନ ଉଡ଼ିପାରିନି । ତେଣୁ ରାଜ୍ୟରେ ଥିବା ମୋଟ ୧୮ଟି ବିମାନ ଘାଟିର ପୁନଃରୁଦ୍ଧାର ନେଇ ଦାବି ଜୋର ଧରିଛି ।