କନକ ବ୍ୟୁରୋ: କିନ୍ନର ହେଲେ ବି ଏମାନଙ୍କ କଳା ପ୍ରତିଭା କିଛି କମ୍ ମୁହେଁ । ଅନ୍ୟ କଳାକାରଙ୍କ ପରି ଏମାନେ ଅଭିନୟ କରି ଲୋକଙ୍କ ମନୋରଞ୍ଜନ କରୁଛନ୍ତି । ପାରମ୍ପରିକ ଦଣ୍ଡଯାତ୍ରା ସେମାନଙ୍କୁ କଳା ପ୍ରଦର୍ଶନର ସୁଯୋଗ ଦେବା ସହିତ ରୋଜଗାର ଦେଇଛି। ଚୈତ୍ରମାସର ଟାଇଁଟାଇଁ ଖରାରେ ମାନସିକଙ୍କ କଷ୍ଟଦାୟକ ଧୂଳିଦଣ୍ଡ ବେଳେ କିନ୍ନରମାନେ ଅଭିନୟ କରି  ଓ ମଜାଳିଆ ସଂଳାପ କହି ଦଣ୍ଡୁଆ ଓ ଦେଖଣାହାରୀଙ୍କ ମନୋରଞ୍ଜନ କରିଥାନ୍ତି। ଦଣ୍ଡଯାତ୍ରାରେ ସାମିଲ ହୋଇ ସେମାନେ ନିଜକୁ ଧନ୍ୟ ମନେ କରୁଛନ୍ତି।

Advertisment


ପୂର୍ବରୁ ଧୂଳିଦଣ୍ଡ ସମୟରେ ଦଣ୍ଡୁଆମାନେ ନାରୀ ବେଶରେ ନୃତ୍ୟ ପରିବେଷଣ କରୁଥିଲେ । ଏବେ କିଛି ବର୍ଷ ହେଲା କିନ୍ନରମାନେ ଦଣ୍ଡଯାତ୍ରାରେ ସାମିଲ ହୋଇ ନାରୀ ଭୂମିକାରେ ଅଭିନୟ କରୁଛନ୍ତି । ତେବେ କିଛି କିନ୍ନର ମନୋରଞ୍ଜନ ନାଁରେ ଥଟ୍ଟାମଜାରେ ଅଶାଳୀନ ଭାଷା ପ୍ରୟୋଗ କରୁଥିବାରୁ ପରିବାର ସହ ବସି ଦଣ୍ଡଯାତ୍ରା ଦେଖିବା ସମ୍ଭବ  ହେଉନାହିଁ । କିନ୍ନରମାନେ ଏଥିରୁ ନିବୃତ୍ତ ରହି କଳା ପ୍ରଦର୍ଶନ କଲେ ସଂସ୍କୃତିର ସୁରକ୍ଷା ସହ ସମସ୍ତେ ଆଗ୍ରହର ସହ ଦଣ୍ଡଯାତ୍ରା ଦେଖିପାରିବେ ।