ସ୍କୁଲ ଭ୍ୟାନ ଉପରେ ମାଡିଗଲା ଟ୍ରେନ : ୩ ମୃତ୍ୟୁ ଅନେକ ଆହତ

କନକବ୍ୟୁରୋ : ତାମିଲନାଡ଼ୁରେ ଆଜି ଏକ ସ୍କୁଲ ଭ୍ୟାନ୍‌  ଉପରେ ଟ୍ରେନ୍‌ ମାଡ଼ିଯିବାରୁ  ୩ ଜଣ ଛାତ୍ରଙ୍କର ମୃତ୍ୟୁ ହୋଇଯାଇଛି ଏବଂ ଆହୁରି ଅନେକ ଛାତ୍ର ଆହତ ହୋଇଛନ୍ତି।  କୁଡ଼‌ାଲୋର ନିକଟସ୍ଥ ସୀମଙ୍କୁପ୍ପମରେ  ଏହି ଦୁର୍ଘଟଣା ହୋଇଛି ।  ଦୁର୍ଘଟଣା ସମୟରେ ସ୍କୁଲ ଭ୍ୟାନ୍‌ରେ ୫ ଜଣ ଛାତ୍ର ଏବଂ ଡ୍ରାଇଭର ଥିଲେ । ମିଳିଥିବା ସୂଚନାନୁଯାୟୀ ସ୍କୁଲ୍‌ ଭ୍ୟାନ୍‌ଟି ଏକ ଖୋଲା ରେଲୱେ ଗେଟ୍‌ ଅତିକ୍ରମ କରୁଥିବାବେଳେ ଏହାକୁ  ଟ୍ରେନ୍‌ ଧକ୍କା ଦେଇଥିଲା ଏବଂ ପ୍ରାୟ ୫୦ ମିଟର ପର୍ଯ୍ୟନ୍ତ ଘୋଷାଡ଼ି ନେଇଥିଲା ।  

ସ୍ଥାନୀୟ ବାସିନ୍ଦାମାନେ ରେଳ ଧାରଣାରେ ୨ ଜଣ ଛାତ୍ରଙ୍କ ମୃତଦେହ ପାଇବାପରେ ତୁରନ୍ତ କର୍ତ୍ତୃପକ୍ଷମାନଙ୍କୁ ଜଣାଇଥିଲେ ।  ଅନ୍ୟ ଜଣେ ଛାତ୍ରଙ୍କର ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଯାଇଛି ।    ରେଳବାଇ ବିଭାଗ  ଏବଂ ସ୍ଥାନୀୟ ପୁଲିସ ଅଧିକାରୀ ଉକ୍ତ ଘଟଣାର ତଦନ୍ତ ଆରମ୍ଭ କରିଛନ୍ତି ।  ରେଳବାଇ ପକ୍ଷରୁ ଜାରି ହୋଇଥିବା ବିବୃତି ଅନୁଯାୟୀ ଭ୍ୟାନ୍‌ଟି ଏକ ମାନବ ପରିଚାଳିତ ଟ୍ରାକ୍‌ ଅତିକ୍ରମ କରୁଥିବା ସମୟରେ ଏହାକୁ ଟ୍ରେନ୍‌ ନମ୍ବର ୫୬୮୧୩ ଧକ୍କା ଦେଇଥିଲା  ।  ମେଡିକାଲ ଉପକରଣ ସହ ଏକ ରିଲିଫ୍‌ ଟ୍ରେନ୍‌କୁ ଉକ୍ତ ସ୍ଥଳକୁ ପଠାଯାଇଥିଲା। ଏଥିସହ ଡିଆରଏମ୍‌ (ଡିଭିଜନାଲ ‌ରେଲୱେ ମ୍ୟାନେଜର) ଏବଂ ବ୍ରାଞ୍ଚ୍‌ ଅଫିସରମାନେ ଘଟଣାସ୍ଥଳରେ ପହଞ୍ଚିଥିଲେ।