ଗ୍ରାମାଞ୍ଚଳରେ ଗୁଣାତ୍ମକ ସ୍ୱାସ୍ଥ୍ୟସେବା ପାଇଁ ଟିପିଏନଓଡ଼ିଏଲ ସମ୍ମାନୀତ

କନକ ବ୍ୟୁରୋ:  ଗ୍ରାମାଞ୍ଚଳରେ ଗୁଣାତ୍ମକ ସ୍ୱାସ୍ଥ୍ୟ ସେବା ଯୋଗାଣ ତଥା ସାମାଜିକ ଦାୟିତ୍ଵବୋଧତା କ୍ଷେତ୍ରରେ ଉଲ୍ଲେଖନୀୟ ଯୋଗଦାନ ପାଇଁ ଟିପି ନର୍ଦର୍ଣ୍ଣ ଓଡ଼ିଶା ଡିଷ୍ଟ୍ରିବ୍ୟୁସନ ଲିମିଟେଡ(ଟିପିଏନଓଡିଏଲ)କୁ “ବେଷ୍ଟ ହେଲ୍ଥ କେୟାର ଫେସିଲିଟି ଏଟ୍ ଦ ଡୋର ଷ୍ଟେପ ଇନ୍ ରୁରାଲ ଏରିଆ“ ସମ୍ମାନରେ ସମ୍ମାନୀତ କରାଯାଇଛି ।  ଭୁବନେଶ୍ବରରେ ସିଏସଆର ଫୋରମ ପକ୍ଷରୁ ଆୟୋଜିତ ‘ଓଡ଼ିଶା ସିଏସଆର ଏବଂ ଏଚଆର ଲିଡରସିପ ସମ୍ମିଳନୀ-୨୦୨୫’ରେ ଟିପିଏନଓଡ଼ିଏଲକୁ  ପୁରସ୍କୃତ କରାଯାଇଛି । ଓଡିଶା ବିଧାନସଭାର ବାଚସ୍ପତି ସୁରମା ପାଢୀଙ୍କ ଠାରୁ ଟିପିଏନଓଡିଏଲ ବାଣିଜ୍ୟିକ ଓ ସିଏସଆର ପ୍ରମୁଖ ଜୟଦୀପ ରୟ, ସିଏସଆର ମୁଖ୍ୟ ରଞ୍ଜନ ଶର୍ମା, ଦିଲ୍ଲୀପ ସାହୁ, ଦୀପଞ୍ଜନ ଦାସ ଓ ହିମାଂଶୁ ନାୟକ ପ୍ରମୁଖ ଉପସ୍ଥିତ ରହି ଏହି ପୁରସ୍କାର ଗ୍ରହଣ କରିଥିଲେ ।  

ସାମାଜିକ ବିକାଶ ଏବଂ ସଶକ୍ତିକରଣ କ୍ଷେତ୍ରରେ ଏହି ସ୍ୱୀକୃତି ଟିପିଏନଓଡିଏଲର ପ୍ରତିବଦ୍ଧତାକୁ ସୁଦୃଢ଼ କରିବା ସହ  ସମାଜ ଉପରେ ଏକ ସକରାତ୍ମକ ପ୍ରଭାବ ସୃଷ୍ଟି କ୍ଷେତ୍ରରେ କାର୍ଯ୍ୟରତ ଅଧିକାରୀଙ୍କୁ ପ୍ରେରଣା ଦେବ ବୋଲି ବାଣିଜ୍ୟିକ ଓ ସିଏସଆର ପ୍ରମୁଖ ଶ୍ରୀ ରୟ ନିଜ ଅଭିଭାଷଣରେ କହିଥିଲେ । ସୂଚନାଥାଉକି, ନିଜର ଉପଭୋକ୍ତାମାନଙ୍କୁ ଗୁଣାତ୍ମକ ବିଜୁଳି ସେବା ଯୋଗାଇବା ଦିଗରେ ସର୍ବଦା ଗୁରୁତ୍ଵ ଦେବା ସହ ଅଞ୍ଚଳର ସାମାଜିକ ବିକାଶ କ୍ଷେତ୍ରରେ ମଧ୍ୟ ‘ଟିପିଏନଓଡିଏଲ’ ଗୁରୁଦାୟିତ୍ଵ ବହନ କରୁଛି ।

ଟିପିଏନଓଡିଏଲ ପକ୍ଷରୁ ନିଃଶୁଳ୍କ ମୋବାଇଲ ସ୍ୱାସ୍ଥ୍ୟ  ସେବା ନିମିତ୍ତ ଭ୍ରାମ୍ୟମାଣ ଆମ୍ବୁଲାନ୍ସ ବାଲେଶ୍ଵର ଜିଲ୍ଲା ସମେତ ଯାଜପୁର, କେନ୍ଦୁଝର, ଭଦ୍ରକ, ଓ ମୟୂରଭଞ୍ଜ ଜିଲ୍ଲାର ବିଦ୍ୟୁତ ଉପଭୋକ୍ତାଙ୍କ ପାଇଁ ଆରମ୍ଭ କରାଯାଇଛି । ପ୍ରତ୍ଯେକ ଜିଲ୍ଲା ପାଇଁ ଗୋଟିଏ ଲେଖାଏଁ ମୋଟ ୫ଟି ଭ୍ରାମ୍ୟମାଣ ଆମ୍ବୁଲାନ୍ସ ଉପଲବ୍ଧ କରାଯାଇଥିବା ବେଳେ ଏହି ଆମ୍ବୁଲାନ୍ସ ଉପାନ୍ତ ଓ ଗ୍ରାମାଞ୍ଚଳ ଗସ୍ତ କରି ଲୋକଙ୍କ ସ୍ୱାସ୍ଥ୍ୟ ପରୀକ୍ଷା କରିବା ସହ ସ୍ୱାସ୍ଥ୍ୟ ସେବା ଯୋଗାଉଛି । ଆମ୍ବୁଲାନ୍ସଗୁଡିକରେ ଅତ୍ୟାବଶ୍ୟକୀୟ ଚିକିତ୍ସା ଉପକରଣ ଓ ଔଷଧ ସହ ଜଣେ ଲେଖାଏଁ ଡାକ୍ତର, ଫାର୍ମାସିଷ୍ଟ, ଏବଂ ଏଏନଏମ ନିୟୋଜିତ ହୋଇଛନ୍ତି । ମୌଳିକ ଚିକିତ୍ସା ସେବା ସହିତ ଲୋକଙ୍କୁ ସ୍ୱାସ୍ଥ୍ୟ ସମ୍ପର୍କିତ ବିଭିନ୍ନ ସଚେତନ କରିବା ଦିଗରେ ମଧ୍ୟ ଏହି ଆମ୍ବୁଲାନ୍ସ କାର୍ଯ୍ୟରତ ରହିଛି ।