କନକ ବ୍ୟୁରୋ : ପ୍ରକୃତିରାଣୀ ଶିମିଳିପାଳ ପାଇଁ ଶୁଭ ସଙ୍କେତ। ଶିମିଳିପାଳକୁ ବଢ଼ୁଛି ପର୍ଯ୍ୟଟକଙ୍କ ଆଗମନ ଏବଂ ଜମୁଛି ରୋଜଗାର । ୨୦୨୪-୨୫ ଆର୍ଥିକ ବର୍ଷରେ ଆସିଛନ୍ତି ସର୍ବାଧିକ ପର୍ଯ୍ୟଟକ । ସର୍ବାଧିକ ଆୟ ବି ହୋଇଛି , ଜାତୀୟ ଉଦ୍ୟାନ ମାନ୍ୟତା ପରେ ପ୍ରାକୃତିକ ସୌନ୍ଦର୍ଯ୍ୟ ସହିତ ଏଠାକାର ନେଚର କ୍ୟାମ୍ପର ମଜା ନେବା ପାଇଁ ଆସୁଛନ୍ତି ଅଧିକ ପର୍ଯ୍ୟଟକ , ବଢ଼ୁଛି ବେପାର ।

Advertisment

ଶିମିଳିପାଳ... ଓଡ଼ିଶାର ଅନ୍ୟତମ ପ୍ରମୁଖ ଜୈବ ବିବିଧତା କ୍ଷେତ୍ର । ନିକଟରେ ରାଷ୍ଟ୍ରୀୟ ଉଦ୍ୟାନ ମାନ୍ୟତା ପାଇବା ପରେ ଶିମିଳିପାଳକୁ ପର୍ଯ୍ୟଟକଙ୍କ ସଂଖ୍ୟା ବଢ଼ିଛି । ଚଳିତବର୍ଷ ଶିମିଳିପାଳ ଜାତୀୟ ଉଦ୍ୟାନରେ ପର୍ଯ୍ୟଟକଙ୍କ ଆଗମନ ବିଗତ ବର୍ଷ ତୁଳନାରେ ୧୫% ବୃଦ୍ଧି ପାଇଛି । ୨୦୨୪-୨୫ ଆର୍ଥିକ ବର୍ଷରେ ଆସିଛନ୍ତି ସର୍ବାଧିକ ପର୍ଯ୍ୟଟକ ।  ମିଳିଛି ସର୍ବାଧିକ ଆୟ ।  ଚଳିତ ବର୍ଷ ଅକ୍ଟୋବର ୧୪ ତାରିଖରୁ ଆରମ୍ଭ ହୋଇଥିବା ପର୍ଯ୍ୟଟନ ଋତୁ ଜୁନ୍ ୩୦ରେ ଶେଷ ହୋଇଛି । ମୋଟ ୩୮ ହଜାର ୪୮୩ ପର୍ଯ୍ୟଟକ ଶିମିଳିପାଳ ବୁଲିଛନ୍ତି। ଏମାନଙ୍କ ମଧ୍ୟରୁ ୧୨ ହଜାର ୩୮୩ ଜଣ ରାଜ୍ୟ ବାହାରୁ ଆସିଛନ୍ତି । ମାତ୍ର ୧୨ଜଣ ବିଦେଶୀ ପର୍ଯ୍ୟଟକ ଅଛନ୍ତି । ପ୍ରବେଶ ପଥରୁ ମିଳିଛି ୨୯ ଲକ୍ଷ ୪୮ ହଜାର ଆୟ । ୩୫ଟି ଖୋଲା ଗାଡ଼ି ନିୟୋଜିତ ହୋଇଥିବା ଜଙ୍ଗଲ ସଫାରିରୁ ୧ କୋଟି ୨୨ଲକ୍ଷ ଟଙ୍କା ଆସିଛି। 

ଶିମିଳିପାଳର ପ୍ରାକୃତିକ ସୌନ୍ଦର୍ଯ୍ୟକୁ ଅତି ନିକଟରୁ ଉପଭୋଗ କରିବା ସହ ନେଚର କ୍ୟାମ୍ପରେ ରାତ୍ରି ରହଣି, ଜଙ୍ଗଲ ସଫାରି ଗାଡ଼ିରେ ବୁଲିବା ପାଇଁ ଛୁଟି ଆସୁଛନ୍ତି ପର୍ଯ୍ୟଟକ । ଘଞ୍ଚ ଜଙ୍ଗଲ, ଝରଣା, ପାହାଡ଼ ଓ ବିଭିନ୍ନ ପ୍ରଜାତିର ପଶୁପକ୍ଷୀ ପର୍ଯ୍ୟଟକଙ୍କୁ ଆକୃଷ୍ଟ କରୁଛି । ଏଠାକାର କଳାବାଘ ପର୍ଯ୍ୟଟକଙ୍କ ପାଇଁ ବିଶେଷ ଆକର୍ଷଣ ପାଲଟିଛି  । ହେଲେ ଗମନାଗମନରେ ସମସ୍ୟା କାରଣରୁ ବିଦେଶୀ ପର୍ଯ୍ୟଟକଙ୍କ ସଂଖ୍ୟା ହ୍ରାସ ପାଉଛି। ତେଣୁ ରେଳବାଇର ବିକାଶ ଓ ଅମର୍ଦା ଏୟାରଷ୍ଟ୍ରିପ୍‌କୁ କାର୍ଯ୍ୟକ୍ଷମ କରିବା ପାଇଁ ଦାବି କରିଛନ୍ତି ପରିବେଶବିତ୍ ଓ ବୁଦ୍ଧିଜୀବୀ । ଶିମିଳିପାଳ ପ୍ରତି ପର୍ଯ୍ୟଟକଙ୍କ ଆଗ୍ରହ ବଢ଼ିବା ଏକ ଶୁଭ ସଙ୍କେତ । ଆଗକୁ ଏହା ବଜାୟ ରହିଲେ ପର୍ଯ୍ୟଟନ ଶିଳ୍ପର ବିକାଶ ହୋଇପାରିବ ।