ଆସନ୍ତାକାଲି ନୂଆପଡାରେ ହେବ ଅସଲ ଲଢ଼େଇ : ମଇଦାନରେ ମୁହାଁମୁହିଁ ହେବେ ତିନି ପ୍ରମୁଖ ଦଳ

କନକବ୍ୟୁରୋ : ଆସନ୍ତାକାଲି ନୂଆପଡ଼ାରେ ସବୁ ଦଳ ଶକ୍ତି ପ୍ରଦର୍ଶନ କରିବେ ।  ଶୋଭାଯାତ୍ରାରେ ଯାଇ ବିଜେପି ଓ କଂଗ୍ରେସ ପ୍ରାର୍ଥୀ ନାମାଙ୍କନ ଭରିବାର କାର୍ଯ୍ୟକ୍ରମ ରହିଛି  ।  ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆ ମଧ୍ୟ ପତିଆରା ଦେଖାଇବାକୁ ରଣନୀତି କରିଛନ୍ତି ।   ନୂଆପଡ଼ାରେ କାଲିଠାରୁ ଆରମ୍ଭ ହେବ ଅସଲ ଲଢ଼େଇ ।  ପ୍ରଚାର ମଇଦାନରେ ମୁହାଁମୁହିଁ ହେବେ ତିନି ପ୍ରମୁଖ ଦଳର ପ୍ରାର୍ଥୀ  ମିଶ୍ରଣ ପର୍ବର  ଆୟୋଜନ କରି ବଳ ବଢ଼ାଉଥିବା  ସବୁ ରାଜନୈତିକ ଦଳ ଆସନ୍ତାକାଲି ନୂଆପଡ଼ାରେ ନିଜ ନିଜର ଦମ୍ ଦେଖାଇବେ ।

ଦଳୀୟ ନେତା ଓ କର୍ମୀଙ୍କ ସହ ବିଶାଳ ଶୋଭାଯାତ୍ରାରେ ଯାଇ ନାମାଙ୍କନ ଭରିବେ ବିଜେପି ପ୍ରାର୍ଥୀ ଜୟ ଢୋଲକିଆ ।  ଘର ଘର ବୁଲି ପ୍ରଚାର କରୁଥିବା କଂଗ୍ରେସ ପ୍ରାର୍ଥୀ ଘାସିରାମ ମାଝୀ ମଧ୍ୟ ଶକ୍ତି ଦେଖାଇବେ । ବିଧିବଦ୍ଧ ଭାବେ ନାମାଙ୍କନ ଭରିବେ।  ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆ ବି ନୂଆପଡ଼ାରେ ଦମ୍‌ ଦେଖାଇବାକୁ ଯୋଜନା କରିଛନ୍ତି ।  ବିଜେପି ପରେ ଆଜି ବିଜେଡି ଷ୍ଟାର ପ୍ରଚାରକ ତାଲିକା ଜାରି କରିଛି ।  

ଗତକାଲି ବିଜେପି ୪୦ଜଣିଆ ନେତାଙ୍କ ତାଲିକା ଘୋଷଣା କରିଥିବା ବେଳେ ଆଜି ବିଜେଡି ୪୦ ଜଣିଆ ଷ୍ଟାର ପ୍ରଚାରକଙ୍କ ସୂଚୀ ଜାରି କରିଛି ।  ବିଜେପି ପ୍ରଚାରକ ତାଲିକାରେ ମୁଖ୍ୟମନ୍ତ୍ରୀ  ମୋହନ ମାଝୀ, ଛତିଶଗଡ଼ ମୁଖ୍ୟମନ୍ତ୍ରୀ ଓ ବହୁ କେନ୍ଦ୍ରମନ୍ତ୍ରୀ ରହିଛନ୍ତି।  ଅନ୍ୟପଟେ ବିଜେଡି ଜାରି କରିଥିବା ତାଲିକାରେ ବବି ଦାସ ପ୍ରଥମ ଥର ପାଇଁ ୮ନମ୍ବର ସ୍ଥାନକୁ ଖସିଛନ୍ତି ।  ଦେବାଶିଷ ସାମନ୍ତରାୟଙ୍କୁ ତାଲିକାରେ ସ୍ଥାନ ମିଳିନାହିଁ  ।  ତେବେ, ୧୬ଜଣ ବିଧାୟକଙ୍କ ସମେତ ବହୁ ଯୁବ ନେତାଙ୍କୁ ଭରସା କରିଛନ୍ତି ନବୀନ ।  ପିସିସି ସଭାପତି ଭକ୍ତ ଦାସ ନିଜେ ପ୍ରଚାରର ମଂଗ ଧରିଛନ୍ତି ।  ନାମାଙ୍କନ ସରିବା ପରେ ପ୍ରଚାର ମଇଦାନରେ ଆହୁରି ଜୋରଦାର ହେବ ଲଢ଼େଇ ।