ଦିନେ ସେଞ୍ଚୁରି ମାରୁଥିଲା । ଏବେ କ୍ଷେତରେ ପଚୁଛି   ।

କନକ ବ୍ୟୁରୋ: କ୍ଷେତରେ ଶଢୁଛି କୁଇଣ୍ଟାଲ କୁଇଣ୍ଟାଲ ଟମାଟୋ । ଦିନେ ଶହେ ଛୁଇଁଥିବା ଟମାଟୋ ଦର ଏବେ ଏତେ କମିଯାଇଛି ଯେ, ଖର୍ଚ୍ଚ ଉଠୁ ନଥିବାରୁ ଚାଷୀ ଅମଳ ନକରି ବିଲରେ ଛାଡ଼ି ଦେଇଛନ୍ତି । ଆଗକୁ ସାଇତି ରଖିବା ପାଇଁ ଶୀତଳଭଣ୍ଡାର ମଧ୍ୟ ନାହିଁ। ଟମାଟୋ ଦର କମିଥିବା ବେଳେ ଅନ୍ୟ ପନିପରିବାକୁ ମଧ୍ୟ ଅଦିନିଆ ବର୍ଷା ଓ କୁହୁଡ଼ି କାଳ ସାଜିଛି । 

ଚଳିତବର୍ଷ ରାଜ୍ୟର ବିଭିନ୍ନ ଜିଲ୍ଲାରେ ଭଲ ଟମାଟୋ ଫସଲ ହୋଇଥିଲା । କିନ୍ତୁ କିଛିଦିନ ତଳେ ଏହାର ଦର ଶହେ ଟଙ୍କା ଛୁଇଁ ଥିବା ବେଳେ ଏବେ ବହୁତ୍ କମିଯାଇଛି । କେନ୍ଦ୍ରାପଡାରେ  ଅମଳ ଖର୍ଚ୍ଚ ଉଠୁ ନଥିବାରୁ ଚାଷୀ ଟମାଟୋ ତୋଳୁ ନାହାନ୍ତି କି ବିକିବା ପାଇଁ ଆଗ୍ରହ ପ୍ରକାଶ କରୁନାହାନ୍ତି । ଟମାଟୋ ବିଲରେ ପଡ଼ି ନଷ୍ଟ ହେଉଛି । ଶୀତଳଭଣ୍ଡାର ଅଭାବରୁ ଚାଷୀ ଟମାଟୋ ସଂରକ୍ଷଣ କରି ରଖି ପାରୁନଥିବା ବେଳେ ବେପାରୀ କିଲୋ ପିଛା ୫ରୁ ୮ ଟଙ୍କାରେ କିଣି ନେଉଛନ୍ତି । 
 
ଟମାଟୋରୁ ଚାଷୀ ଭଲ ପଇସା ରୋଜଗାର ପାଇଁ ଆଶା ରଖିଥବା ବେଳେ ସ୍ଥିତି ଠିକ୍ ବିପରୀତ ହୋଇଛି ।  ଦର ବହୁତ୍ କମିଯିବା ଫଳରେ ଚାଷୀ ମୁଣ୍ଡରେ ହାତ ଦେଇ ବସିଛନ୍ତି । ଟମାଟୋ ଚାଷ ପାଇଁ ଆବଶ୍ୟକ ମଞ୍ଜି, ସାର ଏବଂ ଔଷଧ ଖର୍ଚ୍ଚକୁ ମିଶାଇଲେ କିଛି ଲାଭ ମିଳୁନାହିଁ । କେବଳ ଟମାଟୋ ଚାଷରେ କ୍ଷତି ହୋଇନାହିଁ, ଅଦିନିଆ ବର୍ଷା ଓ କୁହୁଡ଼ି ଫଳରେ ରୋଗପୋକ ଲାଗି ଅନ୍ୟ ପନିପରିବା ମଧ୍ୟ ନଷ୍ଟ ହୋଇଛି । ରାଜ୍ୟର ବିଭିନ୍ନ ସ୍ଥାନରେ ଶୀତଳଭଣ୍ଡାର ଖୋଲିବା ପାଇଁ ସରକାର ଯୋଜନା କରୁଛନ୍ତି । ଏହାଶୀଘ୍ର କାର୍ୟ୍ୟକାରୀ ହେଲେ, ଚାଷୀ ଉପକୃତ ହୋଇପାରିବେ ।