‘ଆଜି ଯୁଦ୍ଧ ପାଲଟିଛି ଖେଳ ଓ ଖେଳ ପାଲଟିଛି ଯୁଦ୍ଧ’

କନକବ୍ୟୁରୋ :  “ଆଜିର ଦିନରେ ଯୁଦ୍ଧସବୁ ଖେଳ ଭଳି ଲଢ଼ାଯାଉଛି ଏବଂ ଖେଳସବୁ ଯୁଦ୍ଧ ଭଳି ଖେଳାଯାଉଛି  । ୱାର୍ଲ୍ଡ ଫୋରମ୍ ପକ୍ଷରୁ ଗୁରୁବାର ‘କ୍ରୀଡ଼ାରେ ନୈତିକତା ଓ ନେତୃତ୍ୱ’ ଶୀର୍ଷକରେ ସ୍ୱିଜରଲ୍ୟାଣ୍ଡର ଭୋଲ୍କସ୍ୱାସ୍ ବାସିଲଠାରେ ଆୟୋଜିତ ସପ୍ତମ ବୈଶ୍ୱିକ ସମ୍ମିଳନୀରେ ନିଜ ଉଦଘାଟନୀ ଅଭିଭାଷଣରେ ଏକଥା କହିଛନ୍ତି ଗୁରୁଦେବ ଶ୍ରୀ ଶ୍ରୀ ରବିଶଙ୍କର  ।  ବର୍ତ୍ତମାନ କ୍ରୀଡ଼ା ଏପରି ସ୍ତରରେ ପହଞ୍ଚି ଯାଇଛି ଯେ, ଏଥିରେ ବିଜୟ ହିଁ ସବୁକିଛି ଏବଂ ବିଜୟୀ ପ୍ରତିଯୋଗୀ ହିଁ ସବୁ ଶ୍ରେୟର ଅଧିକାରୀ ହେଉଛନ୍ତି ।

ରେକର୍ଡ ଏବଂ ସୁନାମ ପଛରେ ପାଗଳ କ୍ରାଡ଼ାବିତମାନଙ୍କର ଅଣଖେଳୁଆଡ୍ ମନୋଭାବ ଗଭୀର ଚିନ୍ତାର ବିଷୟ ପାଲଟିଛି । ଅପରପକ୍ଷେ, ବର୍ତ୍ତମାନ ମଧ୍ୟ ଏପରି କ୍ରୀଡ଼ାବିତ୍ ଅଛନ୍ତି, ଯେଉଁମାନେ କ୍ରୀଡ଼ାରେ ଉତ୍ତମ ଆଚରଣ, ଉତ୍କୃଷ୍ଟ କ୍ରୀଡ଼ା ପ୍ରଦର୍ଶନ, କ୍ରୀଡ଼ାରେ ନୈତିକତାପୂର୍ଣ୍ଣ ବ୍ୟବହାର ଏବଂ ସମ୍ପୂର୍ଣ୍ଣ ଖେଳୁଆଡ୍ ମନୋଭାବ ପ୍ରଦର୍ଶନ କରିଥା’ନ୍ତି । ସେହିପରି ଖେଳାଳି ସମ୍ପୂର୍ଣ୍ଣ ପିଢ଼ିକୁ ପ୍ରେରିତ କରିପାରନ୍ତି । ନିଜ ଭାଷଣରେ ଶ୍ରୀ ଶ୍ରୀ ରବିଶଙ୍କର ଏକଥା ମଧ୍ଯ କହିଛନ୍ତି ।

ସମ୍ମିଳନୀରେ କ୍ରୀଡ଼ାକୁ ଶାନ୍ତିପୂର୍ଣ୍ଣ ସହାବସ୍ଥାନର ମାନଦଣ୍ଡ ଭାବରେ ବ୍ୟବହାର କରାଯିବା ନେଇ ଚର୍ଚ୍ଚା ହୋଇଥିଲା  ।  ଏଥିସହ ଲିଙ୍ଗଗତ ପାରଦର୍ଶିତା, କ୍ରୀଡ଼ାବିତମାନଙ୍କ ମାନସିକ ସ୍ୱାସ୍ଥ୍ୟ, ସେମାନଙ୍କ ସର୍ବଶ୍ରେଷ୍ଠ ଓ ଦୀର୍ଘସ୍ଥାୟୀ ପ୍ରଦର୍ଶନକୁ ନେଇ ମଧ୍ୟ ଗୁରୁତ୍ୱପୂର୍ଣ୍ଣ ଚର୍ଚ୍ଚା ହୋଇଥିଲା ।  ଖାଲି ସେତିକି ନୁହେଁ, କ୍ରୀଡ଼ାରୁ କିଭଳି ନ୍ୟାୟସଙ୍ଗତ ଭାବରେ ଖେଳିବା, ଦଳୀୟ ଏକତା ରକ୍ଷା ସହ ଧୈର୍ଯ୍ୟ ବଜାୟ ରଖିବା, ସର୍ବୋପରି ରାଜନୀତି ଓ ବ୍ୟବସାୟରେ ଏହା କିପରି ନୈତିକ ମୂଲ୍ୟବୋଧଯୁକ୍ତ ନେତୃତ୍ୱ ଗଠନ କରିଥାଏ, ତାହା ଶିଖିବାକୁ ମିଳିଥାଏ ବୋଲି ସମ୍ମିଳନୀରେ ଆଲୋଚନା ହୋଇଥିଲା ।

ଏହି ଅବସରରେ ଗୁରୁଦେବ ଶ୍ରୀ ଶ୍ରୀ ରବିଶଙ୍କର ଆହୁରି କହିଥିଲେ, ଖେଳରେ ଆପଣ ନିଜେ ଜିତିବେ, କିମ୍ବା ପ୍ରତିପକ୍ଷ ଜିତିବେ । ତେବେ ଫଳାଫଳ ଯାହା ବି ହେଉନା କାହିଁକି, ଉଭୟ ପକ୍ଷ ଖୁସିରେ ରହିବା ଆବଶ୍ୟକ । ଉଭୟ କ୍ରୀଡ଼ାର ଆନନ୍ଦ ଅନୁଭବ କରିବା କଥା । ଆମେ ଏହା ବୁଝିପାରିଲେ, କ୍ରୀଡ଼ା ସ୍ୱାଭାବିକ ଭାବରେ ନୀତି ନୈତିକତା ମୂଲ୍ୟବୋଧଯୁକ୍ତ ହୋଇପାରିବ, ନତୁବା ଏହା ଆନନ୍ଦଦାୟୀ ନ ହୋଇ ଏକ ହିଂସାତ୍ମକ ମଞ୍ଚ ପାଲଟିଯିବ ।

ମାନସିକ ସ୍ୱାସ୍ଥ୍ୟ ଉପରେ ଆଲୋଚନା କରି ଗୁରୁଦେବ କହିଲେ, "ଶିଶୁଟିଏ ଚାଲିବା ପୂର୍ବରୁ ଖେଳିବା ଆରମ୍ଭ କରେ । ଏହା ପ୍ରତ୍ୟେକଙ୍କ ଜୀବନରେ ଏକ ସ୍ୱାଭାବିକ ପ୍ରକ୍ରିୟା । ତେବେ ଏହି ସ୍ୱାଭାବିକ ପ୍ରକ୍ରିୟାର ଅନୁସରଣ କରୁ କରୁ ଆମର ଭୁଲ୍ କେଉଁଠି ରହିଯାଏ ? କାହିଁକି ସଂଗୀତ ଓ କ୍ରୀଡ଼ା ପରି ଚିତ୍ତ ବିନୋଦନକାରୀ ଉପକରଣ ଥିବା ସତ୍ତ୍ୱେ ବିଶ୍ୱର ଏକ ତୃତୀୟାଂଶ ଲୋକ ନିଃସଙ୍ଗ, ଉଦାସୀନ ଓ ଅସନ୍ତୁଷ୍ଟ ବୋଧ କରୁଛନ୍ତି ? ବର୍ତ୍ତମାନ ଏ ବିଷୟରେ ଚିନ୍ତା କରିବାର ସମୟ ଆସିଛି । ଯଦି ଆମେ ଜୀବନକୁ ଏକ ଖେଳ ଭାବରେ ଗ୍ରହଣ କରୁ, ତେବେ ଦୁନିଆରେ ଯୁଦ୍ଧ, ଶୋକ, ଦୁଃଖ ଏବଂ ଅବିଶ୍ୱାସ ଭଳି ନକାରାତ୍ମକ ବିଷୟଗୁଡ଼ିକ ରହିବ ନାହିଁ ।"

ଏହି ବିଶ୍ୱସ୍ତରୀୟ ସମ୍ମିଳନୀରେ ଅନ୍ୟ ବିଶିଷ୍ଟ ବକ୍ତାମାନଙ୍କ ମଧ୍ୟରେ ସାତଟି ମହାଦେଶର ସର୍ବୋଚ୍ଚ ଶୃଙ୍ଗଗୁଡ଼ିକୁ ଆରୋହଣ କରିସାରିଥିବା 17 ବର୍ଷ ବୟସ୍କା ପର୍ବତାରୋହୀ କାମ୍ୟା କାର୍ତ୍ତିକେୟନ, ଅଲିମ୍ପିକ୍ ସ୍ୱର୍ଣ୍ଣ ବିଜେତା ତଥା ପୂର୍ବତନ 400 ମିଟର ହର୍ଡଲ୍ସ ବିଶ୍ୱ ରେକର୍ଡଧାରୀ କେବିନ୍ ୟଙ୍ଗ୍, ୟୁକ୍ରେନୀୟ ସାଂସଦ ସ୍ୱିୟାଟୋସ୍ଲାଭ୍ ୟୁରାଶ୍, ପାଲେଷ୍ଟିନୀୟ ଫୁଟବଲର୍ ହନି ଥାଲିଜେହ, ୟୁରୋ 96 ଚାମ୍ପିଅନ୍ ତଥା ଟେଲିଭିଜନ୍ ବ୍ୟକ୍ତିତ୍ୱ ଟମାସ୍ ହେଲମାର୍ ଏବଂ ଏସିଆନ୍ ଗେମ୍ସରେ ଭାରତର ପ୍ରଥମ ମହିଳା ସ୍ୱର୍ଣ୍ଣ ବିଜେତା ଦିବ୍ୟକ୍ରିତି ସିଂହ, ‘ୱାର୍ଲ୍ଡ ଫୋରମ୍ ଫର୍ ଏଥିକ୍ସ ଇନ୍ ବିଜନେସ୍’ର ପ୍ରେସିଡେଣ୍ଟ ଡ. ସଞ୍ଜୟ ପ୍ରଧାନ ପ୍ରମୁଖ ନିଜ ନିଜ ବକ୍ତବ୍ୟ ରଖିଥିଲେ ।

କ୍ରୀଡ଼ା ହିଁ ଦେଶ ଦେଶ ମଧ୍ୟରେ ଭେଦଭାବକୁ ଦୂରୀଭୂତ କରିପାରିବ ସହ ସାମ୍ପ୍ରଦାୟିକ ଘୃଣାଭାବ ଦୂର କରିବାରେ ସହାୟକ ହୋଇପାରିବ ବୋଲି ହନି ଥାଲିଜେହ୍ କହିଥିଲେ । କେବଳ ମେଡାଲ୍ ବା ପଦକ ଜିତିବା ହିଁ ସଫଳତା ନୁହେଁ, ବରଂ ସାମାଜିକ ଜୀବନଯାତ୍ରାରେ ଏହା ପ୍ରତିଫଳିତ ହେବା ଆବଶ୍ୟକ ବୋଲି ସେ କହିଥିଲେ । ଏଥିସହ ଉନ୍ନତ ମାନର ପ୍ରଦର୍ଶନ ପାଇଁ କିଭଳି ଔଷଧ ଇତ୍ୟାଦିକୁ ଗୁରୁତ୍ୱ ଦିଆଯାଉଛି, ତାହା ଉପରେ ମଧ୍ୟ ଉକ୍ତ ସମ୍ମିଳନୀରେ ଆଲୋଚନା ହୋଇଥିଲା । କେହି କେହି ଏହାକୁ ସମର୍ଥନ କରିଥିବା ବେଳେ ଆଉ କେହି ଏହା କ୍ରୀଡ଼ାର ନୈତିକ ପତନ ବୋଲି ଅଭିହିତ କରିଥିଲେ ।

କ୍ରୀଡ଼ାରେ ନୈତିକତା ଓ ନେତୃତ୍ୱର ମାନଦଣ୍ଡକୁ ଦୃଢ଼ ଭାବରେ ପ୍ରଦର୍ଶିତ କରିଥିବା ବ୍ୟକ୍ତିବିଶେଷଙ୍କୁ ପୁରସ୍କାରପ୍ରଦାନ ପୂର୍ବକ ସମ୍ମାନିତ କରାଯାଇଥିଲା । ଆନ୍ତର୍ଜାତିକ ଫୁଟବଲ୍ ଖେଳାଳି ଝେ୍ରଦାନ ଶାକିରୀଙ୍କୁ ଦୀର୍ଘ ସମୟ ଧରି କ୍ରୀଡ଼ା ପ୍ରତି ତାଙ୍କର ପ୍ରତିବଦ୍ଧତା ଏବଂ ଶାନ୍ତି ପ୍ରତିଷ୍ଠା ଦିଗରେ କ୍ରୀଡ଼ା କ୍ଷେତ୍ରରେ କାର୍ଯ୍ୟ ପାଇଁ ବ୍ୟକ୍ତିଗତ ପୁରସ୍କାର ପ୍ରଦାନ କରାଯାଇଥିଲା । କ୍ରୀଡ଼ାରେ ମାନସିକ ସ୍ୱାସ୍ଥ୍ୟ ପ୍ରତି ଅଭୂତପୂର୍ବ ଯୋଗଦାନ ନିମନ୍ତେ ସ୍ୱିସ୍ ନୌଚାଳିକା ଜେନି ମେଲିନଙ୍କୁ ମଧ୍ୟ ପୁରସ୍କୃତ କରାଯାଇଥିଲା ।

ମିଳିତ ଜାତିସଂଘ ସ୍ୱତନ୍ତ୍ର ପରାମର୍ଶଦାତା ଭାବରେ ଗ୍ରହଣ କରିଥିବା “ୱାର୍ଲ୍ଡ ଫୋରମ୍ ଫର୍ ଏଥିକ୍ସ ଇନ୍ ବିଜନେସ୍ (ଡବ୍ଲୁଏଫଇବି)” ଦୁଇ ଦଶନ୍ଧି ଧରି କ୍ରୀଡ଼ାରେ ନୈତିକତା ଅଭିଯାନର ମଙ୍ଗୁଆଳ ଭୂମିକା ତୁଲାଇ ଆସିଛି । ଗୁରୁଦେବ ଶ୍ରୀ ଶ୍ରୀ ରବିଶଙ୍କରଙ୍କ ନେତୃତ୍ୱରେ ‘ଡବ୍ଲୁଏଫଇବି’ ୟୁରୋପୀୟ ସଂସଦ, ଫିଫା, ମାକ୍ସ ପ୍ଲାଙ୍କ୍ ଇନଷ୍ଟିଚ୍ୟୁଟ୍ ଏବଂ ଜେନିଭାସ୍ଥିତ ଜାତିସଂଘ ସହ ମିଶି ଏହି ବାର୍ତ୍ତା ପ୍ରଚାର କରି ଆସିଛି ଯେ, କ୍ରୀଡ଼ାରେ ‘ମୂଲ୍ୟବୋଧ’ ଓ ‘ପ୍ରଦର୍ଶନ’ ପରସ୍ପର ବିରୋଧୀ ନୁହେଁ, ବରଂ ପରସ୍ପରର ପରିପୂରକ । ବିଶ୍ୱ ସମୁଦାୟର କ୍ରୀଡ଼ାବିତମାନେ ଏକଥାକୁ ବୁଝିପାରିବେ ବୋଲି ସମ୍ମିଳନୀରେ ଆଶା ପ୍ରକାଶ ପାଇଥିଲା ।