କନକ ବ୍ୟୁରୋ: ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଲୋକସଭାରେ ଅପରେସନ୍‌ ସିନ୍ଦୂର ଉପରେ ବିତର୍କ ଆରମ୍ଭ କରିବା ପରେ ବିରୋଧୀ ଦଳ ପକ୍ଷରୁ ପ୍ରଥମେ କଂଗ୍ରେସ ସାଂସଦ ଗୌରବ ଗୋଗଇ ଆଲୋଚନାରେ ଭାଗନେଇ ସରକାରଙ୍କୁ ଘେରିଥିଲେ । ପହଲଗାମ ଆତଙ୍କବାଦୀ ଆକ୍ରମଣକୁ ରୋକିବାରେ ସରକାର ବିଫଳ ହୋଇଥିବା ସେ ଅଭିଯୋଗ କରିଥିଲେ । ସରକାର ନିଜର ବିଫଳତାକୁ ସ୍ବୀକାର କରିବା ପରିବର୍ତ୍ତେ ଟୁର୍‌ ଅପରେଟରଙ୍କୁ ଦୋଷ ଦେଉଥିବାରୁ ସେ ଏହାର ସମାଲୋଚନା କରିଥିଲେ । ବିଦେଶ ଗସ୍ତରୁ ଫେରି ପ୍ରଧାନମନ୍ତ୍ରୀ ପହଲଗାମ ନଯିବାକୁ ମଧ୍ୟ ଗୋଗଇ ସମାଲୋଚନା କରିଥିଲେ । 

Advertisment

ଗୋଗୋଇ କହିଥିଲେ ଯେ ଅପରେସନ ସିନ୍ଦୂର ସମୟରେ ଏପରି ଏକ ପରିବେଶ ସୃଷ୍ଟି ହୋଇଥିଲା ଯେ ଦେଶ ଯେକୌଣସି ମୂଲ୍ୟ ଦେବାକୁ ପ୍ରସ୍ତୁତ ଥିଲା । ସେ ଆହୁରି ମଧ୍ୟ କହିଛନ୍ତି ଯେ ବିରୋଧୀ ଦଳ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହିତ ଥିଲେ, କିନ୍ତୁ ମେ ୧୦ରେ ଅସ୍ତ୍ରବିରତି ଘୋଷଣା କରାଯାଇଥିଲା । ସେ ପଚାରିଥିଲେ ଯେ ବାଧ୍ୟବାଧକତା କ’ଣ ଥିଲା? ପ୍ରଧାନମନ୍ତ୍ରୀ ମୋଦି କାହା ନିକଟରେ ଆତ୍ମସମର୍ପଣ କରିଥିଲେ?
ସେ କହିଥିଲେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦାବି କରୁଛନ୍ତି ୫ରୁ ୬ ଜେଟ୍‌ ନଷ୍ଟ ହୋଇଛି । ଗୋଟିଏ ଜେଟ୍‌ର ମୂଲ୍ୟ ବହୁତ । ତେଣୁ ପ୍ରତିରକ୍ଷା ମନ୍ତ୍ରୀ ସତ କ’ଣ କୁହନ୍ତୁ । କେତୋଟି ଜେଟ୍‌ ନଷ୍ଟ ହୋଇଛି ବୋଲି ସେ ସ୍ପଷ୍ଟ କରନ୍ତୁ । ସତ ଶୁଣିବାକୁ ଭାରତର ସାହସ ଅଛି ବୋଲି ସେ କହିଥିଲେ । 

ଇଣ୍ଡୋନେସିଆରେ କାର୍ଯ୍ୟରତ କ୍ୟା‌ପଟେନ ଶିବ କୁମାର ଦାବି କରିଥିଲେ ଯେ ଅପରେସନ୍‌ ସିନ୍ଦୂରରେ ଭାରତୀୟ ବାୟୁସେନା ଲଢ଼ୁଆ ବିମାନ ହରାଇଥିଲା । ସରକାର କେବଳ ଆତଙ୍କବାଦୀ ଆଡ୍ଡା ନଷ୍ଟ ପାଇଁ ନିର୍ଦ୍ଦେଶ ଦେଇଥିଲେ । ସାମରିକ ପ୍ରତିଷ୍ଠାନ ଏବଂ ସେମାନଙ୍କର ବାୟୁ ପ୍ରତିରକ୍ଷା ବ୍ୟବସ୍ଥା ଉପରେ ଆକ୍ରମଣ କରିବାକୁ ବାରଣ କରାଯାଇଥିବାରୁ ଏପରି ହେଲା ବୋଲି କ୍ୟା‌ପଟେନ କୁମାରଙ୍କ ମନ୍ତବ୍ୟକୁ ଉଦ୍ଧାର କରି ଗୋଗଇ କହିଥିଲେ । ଏଥିସହିତ ଗୋଗଇ ଏହା ମଧ୍ୟ କହିଥିଲେ ଯେ ସରକାର ଆତଙ୍କବାଦୀ ଟାର୍ଗେଟ ସଂଖ୍ୟା ୨୧ରୁ ୯କୁ କମାଇଥିଲେ । ଟାର୍ଗେଟ ସଂଖ୍ୟା ହ୍ରାସ କରିବାର ରାଜନୈତିକ କାରଣ କ’ଣ ବୋଲି ଗୋଗଇ ସରକାରଙ୍କୁ ପଚାରିଥିଲେ । 

ଆତଙ୍କବାଦ ବିରୋଧୀ କାର୍ଯ୍ୟାନୁଷ୍ଠାନକୁ ସମାଲୋଚନା କରି ଗୋଗଇ ଅପରେସନ୍‌ ସିନ୍ଦୂର ପଛର ଉଦ୍ଦେଶ୍ୟ ଉପରେ ପ୍ରଶ୍ନ ଉଠାଇଥିଲେ । ଭାରତ କୌଣସି ଅଞ୍ଚଳ ଅଧିଗ୍ରହଣ କିମ୍ବା ଯୁଦ୍ଧ ପାଇଁ ଅପରେସନ୍‌ କରି ନଥିଲା ବୋଲି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଦେଇଥିବା ମନ୍ତବ୍ୟକୁ ସମାଲୋଚନା କରି ଗୋଗଇ କହିଥିଲେ ଯଦି ଏବେ ଆମେ ପାକ୍‌ ଅଧିକୃତ କାଶ୍ମୀର ଦାବ କରିବା ନାହିଁ ତା’ହେଲେ କେବେ କରିବା ବୋଲି ପ୍ରଶ୍ନ କରିଥିଲେ । ଅତୀତରେ ଉରି ଏବଂ ପୁଲୱାମା ଆକ୍ରମଣ ସମୟରେ ମୋଦୀ ସରକାର ପାକିସ୍ତାନକୁ ଶିକ୍ଷା ଦିଆଯାଇଛି ଏବଂ ସେହି ଦେଶ ଆଉ ଆକ୍ରମଣ କରିବାକୁ ସାହସ କରିବ ନାହିଁ ବୋଲି କହିଥିଲେ । କିନ୍ତୁ ପୁଣି ପହଲଗାମ ଆକ୍ରମଣ ହେଲା । ୨୦୧୬ରେ ରାଜନାଥ କହିଥିଲେ ଆମ ଆକ୍ରମଣରେ ପାକିସ୍ତାନରେ ଆତଙ୍କବାଦୀ ଆଡ୍ଡା ନଷ୍ଟ ହେବ । ୨୦୧୯ରେ ମଧ୍ୟ ସେ ସେହି ସମାନ ଦାବି କରିଥିଲେ । କିନ୍ତୁ ଆଜି ବି ଲକ୍ଷ୍ୟ ହାସଲ ହୋଇନାହିଁ । କାରଣ ରାଜନାଥ ଏବେ ବି କହୁଛନ୍ତି ପାକିସ୍ତାନ ଭବିଷ୍ୟତରେ ପୁଣି ଆକ୍ରମଣ କରିପାରେ । କେତେ କାଳ ଏଭଳି କାର୍ଯ୍ୟ ଚାଲିଥିବ ବୋଲି ଗୋଗଇ ପ୍ରଶ୍ନ କରିଥିଲେ । 

ମେ’ ୧୦ ତାରିଖରେ ରାଷ୍ଟ୍ରଦୂତ କହିଥିଲେ ଭାରତ ଜବାବ ଦେବ । କିନ୍ତୁ ସେହିଦିନ ସନ୍ଧ୍ୟା ସୁଦ୍ଧା ଅସ୍ତ୍ରବିରତି ରାଜିନାମା ଘୋଷଣା ହୋଇଗଲା । ଯଦି ପାକିସ୍ତାନ ଆଣ୍ଠେଇ ପଡ଼ିଥିଲା ତା’ହେଲେ ଆମେ କାହିଁକି ଅପରେସନ ବନ୍ଦ କରିଦେଲେ । କାହା ପାଖରେ ଆମେ ନଇଁଗଲେ ବୋଲି ଗୋଗଇ ପ୍ରଶ୍ନ କରିଛନ୍ତି । ଆମେରିକା ରାଷ୍ଟ୍ରପତି ଟ୍ରମ୍ପ ଅସ୍ତ୍ରବିରତିର ଶ୍ରେୟ ପ୍ରଚାର କରୁଛନ୍ତି । ଦେଶର ଲୋକମାନଙ୍କୁ ସତ ଜାଣିବାର ହକ୍‌ ରହିଛି । ରାଜନାଥ ଏ ନେଇ ସ୍ପଷ୍ଟ କରନ୍ତୁ ।