ଭାରତ ସହ ପଙ୍ଗା ପାକିସ୍ତାନ ପାଇଁ ସାଜିବ କାଳ! ଲାଗିପାରେ କୋଟି କୋଟି ଟଙ୍କାର ଜରିମାନା

କନକ ବ୍ୟୁରୋ: ଅନ୍ତର୍ଜାତୀୟ କ୍ରିକେଟ୍ ଜଗତରେ ଏକ ବଡ଼ ଧରଣର ହଲଚଲ ସୃଷ୍ଟି ହୋଇଛି । ଆସନ୍ତା ୨୦୨୬ ଆଇସିସି ପୁରୁଷ ଟି-୨୦ ବିଶ୍ୱକପ୍‌ରେ ଭାରତ ବିପକ୍ଷ ହାଇ-ଭୋଲଟେଜ୍ ମ୍ୟାଚ୍‌କୁ ବର୍ଜନ କରିବାକୁ ପାକିସ୍ତାନ ସରକାର ଘୋଷଣା କରିଛନ୍ତି । ଫେବ୍ରୁଆରି ୧୫ ତାରିଖରେ କଲୋମ୍ବୋର ଆର. ପ୍ରେମଦାସା ଷ୍ଟାଡିୟମରେ ହେବାକୁ ଥିବା ଏହି ମୁକାବିଲାକୁ ନେଇ ସାରା ବିଶ୍ୱର ନଜର ଥିବାବେଳେ, ପାକିସ୍ତାନର ଏହି ନିଷ୍ପତ୍ତି କ୍ରିକେଟ ପ୍ରେମୀଙ୍କୁ ସ୍ତବ୍ଧ କରିଦେଇଛି ।

ବାଂଲାଦେଶକୁ ବିଶ୍ୱକପ୍‌ରୁ ବାଦ୍ ଦିଆଯିବା ପ୍ରତିବାଦରେ ପାକିସ୍ତାନ ଏହି କଠୋର ପଦକ୍ଷେପ ନେଇଥିବା କୁହାଯାଉଛି । ସୁରକ୍ଷା କାରଣ ଦର୍ଶାଇ ବାଂଲାଦେଶ ଭାରତ ବଦଳରେ ଶ୍ରୀଲଙ୍କାରେ ନିଜର ମ୍ୟାଚ୍ ଖେଳିବାକୁ ଦାବି କରିଥିଲା । ମାତ୍ର ଆଇସିସି ଏହି ଦାବିକୁ ପ୍ରତ୍ୟାଖ୍ୟାନ କରି ବାଂଲାଦେଶ ସ୍ଥାନରେ ସ୍କଟଲ୍ୟାଣ୍ଡକୁ ଟୁର୍ଣ୍ଣାମେଣ୍ଟରେ ସାମିଲ କରିଛି । ଏହାର ପ୍ରତିକ୍ରିୟାରେ ପାକିସ୍ତାନ ସରକାର କେବଳ ଭାରତ ବିପକ୍ଷ ମ୍ୟାଚ୍ ନଖେଳିବାକୁ ନିଷ୍ପତ୍ତି ନେଇଛନ୍ତି, ଯଦିଓ ଅନ୍ୟ ସମସ୍ତ ମ୍ୟାଚ୍ ଖେଳିବାକୁ ଦଳକୁ ଅନୁମତି ମିଳିଛି ।

ଆଇସିସି ଏହି ଘଟଣାକୁ ଅତ୍ୟନ୍ତ ଗୁରୁତର ସହ ନେଇ ପାକିସ୍ତାନକୁ କଡ଼ା ଚେତାବନୀ ଦେଇଛି । ଯଦି ପାକିସ୍ତାନ ଭାରତ ବିପକ୍ଷ ମ୍ୟାଚ୍ ଖେଳିବାକୁ ମନା କରେ, ତେବେ ପାକିସ୍ତାନ କ୍ରିକେଟ୍ ଉପରେ ବଡ଼ ସଙ୍କଟ ଦେଖାଦେଇପାରେ-

ଆହୁରି ପଢ଼ନ୍ତୁ... ଭାରତ ବିପକ୍ଷ ଏହି ମ୍ୟାଚ୍‌କୁ ଏପର୍ଯ୍ୟନ୍ତ ବର୍ଜନ କରିନାହିଁ ପାକିସ୍ତାନ

ଆଇସିସି ବିଦେଶୀ ଖେଳାଳିଙ୍କୁ ଏନଓସି ଦେବା ବନ୍ଦ କରିବା ସହ ପାକିସ୍ତାନ ସୁପର ଲିଗ୍‌ର ସ୍ୱୀକୃତି ରଦ୍ଦ କରିପାରେ।
ପାକିସ୍ତାନ କ୍ରିକେଟ୍ ବୋର୍ଡକୁ ଆଇସିସି ପକ୍ଷରୁ ମିଳୁଥିବା କୋଟି କୋଟି ଟଙ୍କାର ପାଣ୍ଠି ରୋକାଯାଇପାରେ।
ପାକିସ୍ତାନକୁ ଏସିଆ କପ୍ ଭଳି ବଡ଼ ଟୁର୍ଣ୍ଣାମେଣ୍ଟରୁ ବାଦ୍ ଦିଆଯାଇପାରେ ଏବଂ ୱାର୍ଲ୍ଡ ଟେଷ୍ଟ ଚାମ୍ପିୟନସିପ୍ ପଏଣ୍ଟ କଟାଯାଇପାରେ।
ଅନ୍ୟ ଦେଶମାନଙ୍କ ସହ ପାକିସ୍ତାନର କ୍ରିକେଟ୍ ସମ୍ପର୍କ ଛିନ୍ନ ହୋଇପାରେ।
ଭବିଷ୍ୟତରେ କୌଣସି ବଡ଼ ଆଇସିସି ଟୁର୍ଣ୍ଣାମେଣ୍ଟ ଆୟୋଜନ କରିବାର ଅଧିକାର ପାକିସ୍ତାନ ହରାଇପାରେ।

ଭାରତ-ପାକିସ୍ତାନ ମ୍ୟାଚ୍‌ରୁ ପ୍ରାୟ ୨୦୦ରୁ ୨୫୦ କୋଟି ଟଙ୍କାର ରାଜସ୍ୱ ମିଳିଥାଏ। ୧୦ ସେକେଣ୍ଡର ବିଜ୍ଞାପନ ପାଇଁ ୪୦ ଲକ୍ଷ ଟଙ୍କା ପର୍ଯ୍ୟନ୍ତ ଦର ରହିଥାଏ । ଯଦି ପାକିସ୍ତାନ ଫେବ୍ରୁଆରି ୧୫ରେ ପଡ଼ିଆକୁ ନଆସେ, ତେବେ ଭାରତୀୟ ଅଧିନାୟକ ସୂର୍ଯ୍ୟକୁମାର ଯାଦବ ଟସ୍ ପାଇଁ ଆସିବେ ଏବଂ ବିଜୟୀ ଭାବେ ଭାରତକୁ ୨ ପଏଣ୍ଟ ମିଳିବ ।

ପାକିସ୍ତାନର ଏହି ଆଭିମୁଖ୍ୟ ବିଶ୍ୱ କ୍ରିକେଟର ସ୍ଥିରତାକୁ ବିପଦରେ ପକାଇଥିବା ବେଳେ, ପିସିବି ଅଧ୍ୟକ୍ଷ ମୋହସିନ ନକଭିଙ୍କ ସ୍ପଷ୍ଟୀକରଣକୁ ଏବେ ସମସ୍ତେ ଅପେକ୍ଷା କରିଛନ୍ତି । ଯଦି ପାକିସ୍ତାନ ନିଜ ନିଷ୍ପତ୍ତିରେ ଅଟଳ ରହେ, ତେବେ ଏହା ପାକ୍ କ୍ରିକେଟ୍‌ର ବିନାଶର କାରଣ ସାଜିପାରେ ।

କ୍ରିକେଟ୍ ହେଉଛି ଏକ ସେତୁ ଯାହା ଦୁଇ ଦେଶକୁ ଯୋଡ଼ିଥାଏ । ପାକିସ୍ତାନ ପାଇଁ ବର୍ତ୍ତମାନ ସମୟ ହେଉଛି ବୁଦ୍ଧିମାନର ସହ ନିଷ୍ପତ୍ତି ନେବା । କେବଳ ଆବେଗରେ ନିଷ୍ପତ୍ତି ନେଇ ଭାରତ ଭଳି ଏକ ବଡ଼ ଶକ୍ତି ସହ ମ୍ୟାଚ୍ ବନ୍ଦ କରିବା ପାକିସ୍ତାନ ପାଇଁ 'ନିଜ ଗୋଡ଼ରେ ନିଜେ କୁରାଢ଼ୀ ମାରିବା' ସଦୃଶ ହେବ। କ୍ରିକେଟର ବିକାଶ ଏବଂ ଆର୍ଥିକ ସ୍ଥିତିକୁ ଦୃଷ୍ଟିରେ ରଖି ପାକିସ୍ତାନକୁ ନମନୀୟ ହେବାକୁ ପଡ଼ିବ, ନଚେତ୍ ପାକିସ୍ତାନ କ୍ରିକେଟ୍‌ର ଅନ୍ଧକାରମୟ ଭବିଷ୍ୟତ ସୁନିଶ୍ଚିତ।