କନକ ବ୍ୟୁରୋ: କିଛିଦିନ ପୂର୍ବରୁ ମୁଖ୍ୟ ଶାସନ ସଚିବଙ୍କ ଚିଠିକୁ ନେଇ ପାଓ୍ୱାର କରିଡରରେ ହଲଚଲ ହୋଇଥିଲା । କାରଣ ଚିଠିରେ ଅପାରଗ ଅଧିକାରୀଙ୍କ ତାଲିକା ପ୍ରସ୍ତୁତି ପାଇଁ କଡ଼ା ନିର୍ଦ୍ଦେଶ ରହିଥିଲା । ହେଲେ ଆଜି ବସିଥିବା ସଚିବସ୍ତରୀୟ ବୈଠକରେ ଅପାରଗ ଅଧିକାରୀଙ୍କ ପ୍ରସଙ୍ଗରେ ଆହୁରି କଠୋର ହୋଇଛନ୍ତି ମୁଖ୍ୟ ଶାସନ ସଚିବ । ସୂଚନା ଅନୁସାରେ ଭଲ ପ୍ରଦର୍ଶନ କରୁନଥିବା ଅଧିକାରୀଙ୍କ ଉପରେ ନଜର ରଖିବାକୁ କୁହାଯାଇଛି । ସେମାନଙ୍କ କାର୍ଯ୍ୟର ସମୀକ୍ଷା କରିବାକୁ ଦିଆଯାଇଛି ନିର୍ଦ୍ଦେଶ । ସୁଧାର ନଆସିଲେ ବାଧ୍ୟତାମୂଳକ ଅବସର ଦେବାକୁ କୁହାଯାଇଛି ।

ସଚିବସ୍ତରୀୟ ବୈଠକରେ ଅସନ୍ତୋଷ ଝାଡ଼ିଥିଲେ ମୁଖ୍ୟ ଶାସନ ସଚିବ ମନୋଜ ଆହୁଜା । ମୁଖ୍ୟମନ୍ତ୍ରୀଙ୍କ ଅଫିସରୁ ଆସୁଥିବା ୟୁଆଇ ନୋଟ୍‌ ଉପରେ ତୁରନ୍ତ ପଦକ୍ଷେପ ନେବା ଉପରେ ଗୁରୁତ୍ୱ ଦେଇଛନ୍ତି । ଅନକେ କ୍ଷେତ୍ରରେ ବାବୁ ଏହାକୁ ଅବହେଳା କରୁଥିବା ଅଭିଯୋଗ ଆସୁଛି । ତେଣୁ ଅମାନିଆ ଅଧିକାରୀଙ୍କ ଉପରେ କଡ଼ା ନଜର ରଖିବେ ସରକାର । କେଉଁ ଅଧିକାରୀ କାମ କରୁଛନ୍ତି, କେଉଁ ଅଧିକାରୀ ଅବହେଳା କରୁଛନ୍ତି ତାର ତର୍ଜମା କରାଯିବ । ପ୍ରଥମେ ଖାରବେଳ ଭବନ ଓ ଲୋକସେବା ଭବନରେ ଏଆଇ କ୍ୟାମେରା ଲଗାଯିବ । ପରବର୍ତ୍ତୀ ପର୍ଯ୍ୟାୟରେ ଜିଲ୍ଲାସ୍ତରର ସବୁ ଅଫିସରେ ଲାଗିବ ସିସିଟିଭି କ୍ୟାମେରା । ଦେଖନ୍ତୁ କିଭଳି ଅଫିସର ସରକାରଙ୍କ ନିର୍ଦ୍ଦେଶ ମାନୁନଥିବା ଅଭିଯୋଗ କରୁଛନ୍ତି ଶାସକ ଦଳର ବିଧାୟକ । 

ଅନେକ ବିଭାଗରେ ଖର୍ଚ୍ଚ ଆଶାନୁରୂପକ ହୋଇପାରିନି । ସେମାନଙ୍କ ବିଭାଗର ଖର୍ଚ୍ଚ ବଢ଼ାଇବାକୁ ନିର୍ଦେଶ ଦେଇଛନ୍ତି ମୁଖ୍ୟ ଶାସନ ସଚିବ । ସେପଟେ ପ୍ରେତ୍ୟକ କେନ୍ଦ୍ରୀୟ ଅନୁଦାନର ସମୀକ୍ଷା ପ୍ରତି ମାସର ୭ତାରିଖରେ କରିବାକୁ କୁହାଯାଇଛି ।