କନକ ବ୍ୟୁରୋ: କେନ୍ଦ୍ର ବଜେଟ୍ ନେଇ ଭିଡ଼ିଓ ବାର୍ତ୍ତା ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ପ୍ରଧାନମନ୍ତ୍ରୀ ମୋଦୀ କହିଛନ୍ତି, ଆଜି ଭାରତର ବିକାଶ ଯାତ୍ରାରେ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟକୁ ଛୁଇଁଛି । ଏହି ବଜେଟରେ ୧୪୦ କୋଟି ଭାରତୀୟଙ୍କ ଆକାଂକ୍ଷା ପ୍ରତିଫଳିତ ହୋଇଛି ଏବଂ ପ୍ରତ୍ୟେକ ନାଗରିକଙ୍କ ସ୍ୱପ୍ନ ପୂରଣ ହୋଇଛି । ସେ ଦର୍ଶାଇଛନ୍ତି ଯେ ଯୁବକମାନଙ୍କ ପାଇଁ ବଜେଟରେ ଅନେକ କ୍ଷେତ୍ର ଓ ସୁଯୋଗ ଖୋଲାଯାଇଛି ଏବଂ ସାଧାରଣ ନାଗରିକଙ୍କୁ ଏହା ବିକଶିତ ଭାରତ ଯାତ୍ରାରେ ସାମିଲ କରିବ । ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଛନ୍ତି ଯେ, ଏହି ବଜେଟ୍ ହେଉଛି ଏକ ବୃହତ ଶକ୍ତି, ଯାହା ସଞ୍ଚୟ, ବିନିଯୋଗ, ବ୍ୟବହାର ଏବଂ ଅଭିବୃଦ୍ଧି କରିବ । ସେ କେନ୍ଦ୍ର ଅର୍ଥ ଓ କର୍ପୋରେଟ୍ ବ୍ୟାପାର ମନ୍ତ୍ରୀ ନିର୍ମଳା ସୀତାରମଣ ଏବଂ ତାଙ୍କ ଟିମକୁ ଏହି ‘ଲୋକଙ୍କ ବଜେଟ୍' ପାଇଁ ଅଭିନନ୍ଦନ ଜଣାଇଛନ୍ତି ।
ପ୍ରଧାନମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ, ସାଧାରଣତଃ ସରକାରଙ୍କ ଟ୍ରେଜେରୀକୁ କିପରି ପୂରଣ କରାଯିବ ତାହା ଉପରେ ବଜେଟରେ ଧ୍ୟାନ ଦିଆଯାଇଥାଏ । କିନ୍ତୁ ଏହି ବଜେଟରେ ନାଗରିକଙ୍କ ପକେଟ କିପରି ପୂରଣ କରାଯିବ, ସଞ୍ଚୟ ବୃଦ୍ଧି ପାଇବ ଏବଂ ଦେଶର ବିକାଶରେ ସେମାନଙ୍କୁ ଅଂଶୀଦାର କରାଯିବ ସେଥ୍ ନିମନ୍ତେ ଧ୍ୟାନ ଦିଆଯାଇଛି । ଏହି ବଜେଟରେ ସଂସ୍କାର ଆଣିବା ପାଇଁ ଗୁରୁତ୍ୱପୂର୍ଣ୍ଣ ପଦକ୍ଷେପ ନିଆଯାଇଛି ବୋଲି ମୋଦୀ କହିଛନ୍ତି ଏବଂ ଆଣବିକ ଶକ୍ତିରେ ଘରୋଇ କ୍ଷେତ୍ରକୁ ପ୍ରୋତ୍ସାହିତ କରିବା ପାଇଁ ନିଆଯାଇଥିବା ଐତିହାସିକ ନିଷ୍ପତ୍ତି ଉପରେ ଆଲୋକପାତ କରିଛନ୍ତି । ବେସାମରିକ ପରମାଣୁ ଶକ୍ତି ଭବିଷ୍ୟତରେ ଦେଶର ବିକାଶରେ ଏକ ମହତ୍ୱପୂର୍ଣ୍ଣ ଅବଦାନକୁ ନିଶ୍ଚିତ କରିବ ।
ବଜେଟରେ ସମସ୍ତ ନିଯୁକ୍ତି କ୍ଷେତ୍ରକୁ ପ୍ରାଥମିକତା ଦିଆଯାଇଛି ବୋଲି ସେ ଗୁରୁତ୍ୱାରୋପ କରିଛନ୍ତି । ଦୁଇଟି ପ୍ରମୁଖ ସଂସ୍କାର ଯାହା ଆଗାମୀ ସମୟରେ ଗୁରୁତ୍ୱପୂର୍ଣ ପରିବର୍ତ୍ତନ ଆଣିବ ବୋଲି ସୂଚାଇ ମୋଦୀ କହିଛନ୍ତି ଯେ ଜାହାଜ ନିର୍ମାଣକୁ ଭିଭିଭୂମି ମାନ୍ୟତା ପ୍ରଦାନ କରିବା ଦ୍ୱାରା ଭାରତରେ ବୃହତ ଜାହାଜ ନିର୍ମାଣ ବୃଦ୍ଧି ପାଇବ, ଆତ୍ମନିର୍ଭର ଭାରତ ଅଭିଯାନ ତ୍ୱରାନ୍ୱିତ ହେବ ଏବଂ ଭିଭିଭୂମି ବର୍ଗ ଅନ୍ତର୍ଗତ ୫୦ ଟି ପର୍ଯ୍ୟଟନ ସ୍ଥଳରେ ହୋଟେଲ ସ୍ଥାପନା ଦ୍ଵାରା ପର୍ଯ୍ୟଟନ କ୍ଷେତ୍ର ସମୃଦ୍ଧ ହେବ । ଏହାଦ୍ଵାରା ପର୍ଯ୍ୟଟନ କ୍ଷେତ୍ର ଯଥେଷ୍ଟ ବୃଦ୍ଧି ପାଇବ, ଆତିଥ୍ୟ କ୍ଷେତ୍ରକୁ ନୂତନ ଶକ୍ତି ମିଳିବ, ଯାହାକି ସବୁଠାରୁ ବଡ଼ ରୋଜଗାର କ୍ଷେତ୍ର । ପ୍ରଧାନମନ୍ତ୍ରୀ କହିଛନ୍ତି ଯେ "ବିକାଶ ଭୀ, ବୀରାସତ ଭୀ (ବିକାଶ ଏବଂ ଐତିହ୍ୟ) ମନ୍ତ୍ର ସହିତ ଦେଶ ଅଗ୍ରଗତି କରୁଛି। ଜ୍ଞାନ ଭାରତମ୍ ମିଶନର ଶୁଭାରମ୍ଭ ମାଧ୍ୟମରେ ଏକ କୋଟି ପାଣ୍ଡୁଲିପି ସଂରକ୍ଷଣ ପାଇଁ ଏହି ବଜେଟରେ ଗୁରୁତ୍ୱପୂର୍ଣ୍ଣ ପଦକ୍ଷେପ ନିଆଯାଇଥିବା ସେ ଉଲ୍ଲେଖ କରିଛନ୍ତି । ଏହା ସହିତ, ଭାରତୀୟ ଜ୍ଞାନ ପରମ୍ପରା ଦ୍ୱାରା ଅନୁପ୍ରାଣିତ ଏକ ଜାତୀୟ ଡିଜିଟାଲ୍ ସଂଗ୍ରହାଳୟ ସୃଷ୍ଟି ହେବ ।
କୃଷକମାନଙ୍କ ପାଇଁ ବଜେଟରେ ଦିଆଯାଇଥିବା ଘୋଷଣା କୃଷି କ୍ଷେତ୍ର ତଥା ସମଗ୍ର ଗ୍ରାମୀଣ ଅର୍ଥନୀତିରେ ଏକ ନୂତନ ବିପ୍ଳବର ମୂଳଦୁଆ ପକାଇବ ବୋଲି ସ୍ମରଣ କରି ମୋଦୀ ଦର୍ଶାଇଛନ୍ତି ଯେ ପ୍ରଧାନମନ୍ତ୍ରୀ ଧନ-ଧାନ୍ୟ କୃଷି ଯୋଜନା ଅଧୀନରେ ୧୦୦ଟି ଜିଲ୍ଲାରେ ଜଳସେଚନ ଏବଂ ଭିଭିଭୂମି ବିକାଶ ହେବ । ସେ ଗୁରୁତ୍ୱାରୋପ କରିଛନ୍ତି ଯେ କିଷାନ କ୍ରେଡିଟ କାର୍ଡର ସୀମା ୩ ଲକ୍ଷରୁ ୫ ଲକ୍ଷକୁ ବୃଦ୍ଧି କରିବା ଦ୍ବାରା କୃଷକମାନଙ୍କୁ ଅଧିକ ସହାୟତା ମିଳିବ । ବଜେଟରେ ୧୨ ଲକ୍ଷ ଟଙ୍କା ପର୍ଯ୍ୟନ୍ତ ଆୟକୁ ଟିକସରୁ ମୁକ୍ତ କରାଯାଇଛି ବୋଲି ଦର୍ଶାଇ ପ୍ରଧାନମନ୍ତ୍ରୀ କହିଛନ୍ତି ଯେ ସମସ୍ତ ଆୟ ଗୋଷ୍ଠୀ ପାଇଁ ଟିକସ ହ୍ରାସ କରାଯାଇଛି, ଯାହା ମଧ୍ୟବିତ୍ତ ତଥା ନୂତନ ଭାବରେ ନିଯୁକ୍ତି ପାଇଥିବା ଲୋକଙ୍କୁ ବହୁତ ଲାଭଦାୟକ ହେବ ।
ଉଦ୍ୟୋଗୀ, ଏମଏସଏମଇ ଏବଂ କ୍ଷୁଦ୍ର ବ୍ୟବସାୟକୁ ମଜବୁତ କରିବା, ନୂତନ ନିଯୁକ୍ତି ସୃଷ୍ଟି କରିବା ପାଇଁ ବଜେଟରେ ୩୬୦ ଡିଗ୍ରୀ ଧ୍ୟାନ ରହିଛି ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଛନ୍ତି । ସ୍ୱଚ୍ଛ ବୈଷୟିକ ଜ୍ଞାନ, ଚମଡା, ଜୋତା ଏବଂ ଖେଳନା ଶିଳ୍ପ ପରି କ୍ଷେତ୍ରଗୁଡିକ ଜାତୀୟ ଉତ୍ପାଦନ ମିଶନ ଅଧୀନରେ ବିଶେଷ ସହାୟତା ପାଇଛି । ରାଜ୍ୟଗୁଡ଼ିକରେ ଏକ ଉତ୍ସାହଜନକ ଏବଂ ପ୍ରତିଯୋଗିତାମୂଳକ ପୁଞ୍ଜି ବିନିଯୋଗ ପରିବେଶ ସୃଷ୍ଟି କରିବା ଉପରେ ବଜେଟରେ ବିଶେଷ ଗୁରୁତ୍ୱ ଦିଆଯାଉଛି ବୋଲି ଏମଏସଏମଇ ଏବଂ ଷ୍ଟାର୍ଟଅପ୍ ପାଇଁ ଋଣ ଗ୍ୟାରେଣ୍ଟି ଦ୍ୱିଗୁଣିତ କରିବାକୁ ଘୋଷଣା ଉପରେ ଆଲୋକପାତ କରିଥିଲେ । ଏସସି, ଏସଟି ଏବଂ ନୂଆ ମହିଳା ଉଦ୍ୟୋଗୀମାନଙ୍କ ପାଇଁ ଗ୍ୟାରେଣ୍ଟି ବିନା ୨ କୋଟି ଟଙ୍କା ପର୍ଯ୍ୟନ୍ତ ଋଣ ଯୋଗାଇବା ପାଇଁ ସେ ଏକ ଯୋଜନା ପ୍ରଣୟନ ବିଷୟରେ ଉଲ୍ଲେଖ କରିଛନ୍ତି । ପ୍ରଧାନମନ୍ତ୍ରୀ ଶେଷରେ କହିଛନ୍ତି ଯେ ଏହି ବଜେଟ୍ କେବଳ ଦେଶର ସାମ୍ପ୍ରତିକ ଆବଶ୍ୟକତାକୁ ନୁହେଁ ବରଂ ଦେଶକୁ ଭବିଷ୍ୟତ ପାଇଁ ପ୍ରସ୍ତୁତି କରିବାରେ ମଧ୍ୟ ସହାୟକ ହେବ ।