ପୃଥିବୀର ବିଭିନ୍ନ ପ୍ରାନ୍ତରେ ଜଳୁଥିବା ଯୁଦ୍ଧର ନିଆଁ ଏବଂ ବୃହତ ଶକ୍ତିମାନଙ୍କ ମଧ୍ୟରେ ବଢ଼ୁଥିବା ତିକ୍ତତା ମହାବିନାଶର ସ୍ପଷ୍ଟ ସଙ୍କେତ ଦେଉଛି

 କନକ ବ୍ୟୁରୋ:  ବିଶ୍ବ ଏବେ ଯୁଦ୍ଧ ମୁହାଁ ବୋଲି ଯାହା ବର୍ତ୍ତମାନର ପରିସ୍ଥିତି ରୁ ଜଣାପଡୁଛି । ଆଜିର ଭୂ-ରାଜନୈତିକ ପରିସ୍ଥିତିକୁ ଦେଖିଲେ ମନେହୁଏ ଯେମିତି 'ତୃତୀୟ ବିଶ୍ୱଯୁଦ୍ଧ' ଏକକାଳୀନ ଆରମ୍ଭ ନହୋଇ ବିଭିନ୍ନ 'କିସ୍ତି' ବା ପର୍ଯ୍ୟାୟରେ ଆରମ୍ଭ ହୋଇସାରିଛି । ପୃଥିବୀର ବିଭିନ୍ନ ପ୍ରାନ୍ତରେ ଜଳୁଥିବା ଯୁଦ୍ଧର ନିଆଁ ଏବଂ ବୃହତ ଶକ୍ତିମାନଙ୍କ ମଧ୍ୟରେ ବଢ଼ୁଥିବା ତିକ୍ତତା ମହାବିନାଶର ସ୍ପଷ୍ଟ ସଙ୍କେତ ଦେଉଛି  ବୋଲି ଅନୁମାନ କରାଯାଉଛି । କାରଣ ଭେନେଜୁଏଲାର ରାଷ୍ଟ୍ରପତି ମାଦୁରୋଙ୍କୁ ଆମେରିକା ଉଠାଇନେବା  ପରେ ବିଶ୍ବର ଅନେକ ଦେଶ  ଟ୍ରମ୍ପ ସରକାରଙ୍କ ଏହି  କାର୍ଯ୍ୟକୁ ନିନ୍ଦା କରୁଛନ୍ତି । ଖାଲି ସେତିକି ନୁହେଁ ଭେନେଜୁଏଲାର ତେଲ ପାଇଁ ମଧ୍ୟ ଟଣାଓଟରା ପରିସ୍ଥିତି ଲାଗିଣାଲି ।  ଆମେରିକା ଏବଂ ଋଷ୍ ମଧ୍ୟରେ ଉତ୍ତେଜନା ବୃଦ୍ଧ ପାଇଛି । ଭେନେଜୁଏଲା ନିକଟରେ ରୁଷ ତେଲ ଜାହାଜକୁ କବଜା କରିଛି ଆମେରିକା ନୈାସେନା । ଯେଉଁଥିପାଇଁ ସାରା ବିଶ୍ୱରେ ହଇଚଇ ସୃଷ୍ଟି  ହୋଇଛି  ।   
 
ଏପଟେ  ଗତ ଦୁଇ ବର୍ଷରୁ ଅଧିକ ସମୟ ଧରି ଚାଲିଥିବା ରୁଷ ଏବଂ ୟୁକ୍ରେନ ଯୁଦ୍ଧ କେବଳ ଦୁଇଟି ଦେଶ ମଧ୍ୟରେ ସୀମିତ ନାହିଁ। ଏହା ପରୋକ୍ଷରେ ରୁଷ ଏବଂ ନାଟୋ (NATO) ବା ପାଶ୍ଚାତ୍ୟ ଶକ୍ତିମାନଙ୍କ ମଧ୍ୟରେ ଏକ ମହାସଂଗ୍ରାମ ପାଲଟିଛି । ଆମେରିକା ଏବଂ ୟୁରୋପୀୟ ଦେଶଗୁଡ଼ିକ ୟୁକ୍ରେନକୁ ଅସ୍ତ୍ରଶସ୍ତ୍ର ଯୋଗାଇ ଚାଲିଥିବା ବେଳେ ରୁଷ ମଧ୍ୟ ପଛକୁ ହଟିବାକୁ ପ୍ରସ୍ତୁତ ନୁହେଁ । ପରମାଣୁ ଅସ୍ତ୍ର ବ୍ୟବହାର କରିବାର ବାରମ୍ବାର ଧମକ ବିଶ୍ୱକୁ ଏକ ଭୟଙ୍କର ବିନାଶ ଆଡ଼କୁ ଟାଣି ନେଉଛି । ଅନ୍ୟପଟେ ମଧ୍ୟପ୍ରାଚ୍ୟରେ ପରିସ୍ଥିତି ଅଣାୟତ୍ତ ହେବାରେ ଲାଗିଛି । ଇସ୍ରାଏଲ ଏବଂ ହାମାସ ମଧ୍ୟରେ ଆରମ୍ଭ ହୋଇଥିବା ଯୁଦ୍ଧ ଏବେ ଲେବାନନର ହିଜବୁଲ୍ଲା ଏବଂ ସିଧାସଳଖ ଇରାନ ପର୍ଯ୍ୟନ୍ତ ବ୍ୟାପିଛି । ମଧ୍ୟପ୍ରାଚ୍ୟ ହେଉଛି ବିଶ୍ୱର ଶକ୍ତି (ତୈଳ) ସମ୍ପଦର କେନ୍ଦ୍ର। ଯଦି ଏହି ଅଞ୍ଚଳରେ ଏକ ପୂର୍ଣ୍ଣାଙ୍ଗ ଯୁଦ୍ଧ ହୁଏ, ତେବେ ବିଶ୍ୱ ଅର୍ଥନୀତି ସମ୍ପୂର୍ଣ୍ଣ ଭୁଶୁଡ଼ି ପଡ଼ିବ। ଏହି ସଂଘର୍ଷରେ ଆମେରିକା ଏବଂ ରୁଷ-ଚୀନ ପକ୍ଷ ଭିନ୍ନ ଭିନ୍ନ ହୋଇଥିବାରୁ ଏହା ବିଶ୍ୱଯୁଦ୍ଧର ରୂପ ନେବାର ଯଥେଷ୍ଟ ସମ୍ଭାବନା ରହିଛି ।

ଅଧିକ ପଢନ୍ତୁ:  ଅସଲ ରଙ୍ଗ ଦେଖାଇଲେ ଟ୍ରମ୍ପ! ଭେନେଜୁଏଲା ତେଲ ଉପରେ କବ୍ଜା କରିବା ପରେ ଚଲାଇଛନ୍ତି ମନମାନି

ଇତିହାସ ସାକ୍ଷୀ ଅଛି ଯେ ଯୁଦ୍ଧ କେବେ ବି ଶାନ୍ତି ଆଣିପାରେ ନାହିଁ, ଏହା କେବଳ ବିନାଶ ଆଣିଥାଏ। ଆଜିର ସମୟରେ ଯଦି ଏକ ପୂର୍ଣ୍ଣାଙ୍ଗ ତୃତୀୟ ବିଶ୍ୱଯୁଦ୍ଧ ହୁଏ, ତେବେ ପରମାଣୁ ଅସ୍ତ୍ରର ପ୍ରଭାବରେ ପୃଥିବୀରୁ ମାନବଜାତିର ଚିହ୍ନବର୍ଣ୍ଣ ମଧ୍ୟ ରହିବ ନାହିଁ। ଆଲବର୍ଟ ଆଇନଷ୍ଟାଇନ କହିଥିଲେ, "ତୃତୀୟ ବିଶ୍ୱଯୁଦ୍ଧ କେଉଁ ଅସ୍ତ୍ରରେ ଲଢ଼ାଯିବ ମୁଁ ଜାଣେନି, କିନ୍ତୁ ଚତୁର୍ଥ ବିଶ୍ୱଯୁଦ୍ଧ ବାଡ଼ି ଏବଂ ପଥରରେ ଲଢ଼ାଯିବ।" ଅର୍ଥାତ୍ ତୃତୀୟ ବିଶ୍ୱଯୁଦ୍ଧ ସବୁକିଛି ଶେଷ କରିଦେବ।
ତେଣୁ, ବିଶ୍ୱର ନେତୃତ୍ୱ ନେଉଥିବା ଦେଶମାନଙ୍କୁ କୂଟନୀତି ଏବଂ ଆଲୋଚନା ମାଧ୍ୟମରେ ସମସ୍ୟାର ସମାଧାନ କରିବାକୁ ପଡ଼ିବ। ନଚେତ୍, ଏହି କିସ୍ତିରେ ଚାଲିଥିବା ଯୁଦ୍ଧ କେତେବେଳେ ମହାବିନାଶର ରୂପ ନେବ, ତାହା କେହି କହିପାରିବେ ନାହିଁ। ମାନବଜାତିକୁ ବଞ୍ଚାଇବା ପାଇଁ ଶାନ୍ତି ହିଁ ଏକମାତ୍ର ବିକଳ୍ପ ।