ଚୋରି ଲୁଚାଇବାକୁ କୋଇଲାରେ ଲଗାଇଲେ ନିଆଁ ; କାର୍ଯ୍ୟାନୁଷ୍ଠାନରୁ ବର୍ତ୍ତିବାକୁ ଯାଇ କମ୍ପାନି ଏଭଳି କରିଥିବା ସନ୍ଦେହ

କନକ ବ୍ୟୁରୋ : ରାତାରାତି କୋଇଲା ସ୍ଥାନାନ୍ତର, ନିଆଁ ଲଗାଇ ଚୋରି ଲୁଚାଇବା ଉଦ୍ୟମ । ହେମଗିରି କନିକା ସ୍ଥିତ ଏସିବି କୋଲ ୱାସେରୀ ଦ୍ବାରା ହଜାର ହଜାର ଟନ୍‌ ବେଆଇନ କୋଇଲା ଗଚ୍ଛିତ ଘଟଣାରେ ଆଜି ମଧ୍ୟ ରାଜସ୍ବ ବିଭାଗ ଏବଂ ପୁଲିସର ତନାଘନା ଜାରି ରହିଛି । ରାତାରାତି କୋଇଲା ଅନ୍ୟତ୍ର ଚାଲାଣ କରି କମ୍ପାନି କୋଇଲା ଚୋରିକୁ ଲୁଚାଇବା ପାଇଁ ଉଦ୍ୟମ କରିଛି । ପାହାଡ ଭଳି ଗଦା ହୋଇଥିବା କୋଇଲାରୁ  ବହୁ ପରିମାଣର କୋଇଲା ଅନ୍ୟତ୍ର ସ୍ଥାନାନ୍ତର କରିଦିଆଯାଇଛି । କେବଳ ସ୍ଥାନାନ୍ତର କରାଯାଇଛି ତାହା ନୁହେଁ କୋଇଲାରେ କାଠ ପକାଇ ନିଆଁ ମଧ୍ୟ ଲଗାଇ ଦିଆଯାଇଛି ।

ବଡ ଧରଣର ଫାଇନ ଏବଂ କାର୍ଯାନୁଷ୍ଠାନରୁ ବର୍ତ୍ତିବାକୁ କମ୍ପାନୀ ଏପ୍ରକାର ପଦକ୍ଷେପ ନେଇଥିବା ସନ୍ଦେହ କରାଯାଉଛି । ଗତ କାଲି ଖଣି ବିଭାଗ ୧୦ ହଜାର ଟନ କଞ୍ଚା  କୋଇଲା ଜବତ କରିଥିଲା । ହଜାର ହଜାର ଟନ୍‌ ବିଶୋଧିତ କୋଇଲା ଯେଉଁ ସ୍ଥାନରେ ଗଚ୍ଛିତ ରହିଥିଲା ସେହି ସ୍ଥାନରେ ଆଜି ପ୍ରଶାସନ ଏବଂ ଖଣି ବିଭାଗ ଚଢ଼ାଉ କରିବାର ଅଛି ତେବେ ତା ପୂର୍ବରୁ ଆର୍ୟନ୍ କୋଲ ବେନିଫିକେଶନ କମ୍ପାନି ଚୋରି ଲୁଚାଇବା ଉଦ୍ୟମ କରିଛି ।