ଶ୍ମଶାନ ଗୃହ ନିର୍ମାଣ କଲେ ହେଲେ କଲେନି ରାସ୍ତା : ଶବଦାହ ନହେବାରୁ ଜଙ୍ଗଲ ପାଲଟିଲାଣି ଶ୍ମଶାନ

କନକବ୍ୟୁରୋ : ସାଧାରଣ ଲୋକଙ୍କ ସୁବିଧା ନିମନ୍ତେ ଅନ୍ତିମ ସଂସ୍କାରର ସୁବିଧା ପାଇଁ ପ୍ରତ୍ୟେକ ଗାଁରେ ପ୍ରଶାସନ ତରଫରୁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ  କରାଯାଇଛି  ।  ନୂତନ ପକ୍କା ଘର ଶ୍ମଶାନ ଗୃହ ନିର୍ମାଣ ହୋଇଛି । ହେଲେ ନିର୍ମାଣ ହେବା ପରେ କାହା କାମରେ ଆସୁନି ଏହି ଶ୍ମଶାନ  ।   ଅନ୍ତିମ ସଂସ୍କାରର ସୁବିଧା ପାଇଁ ଗାଁରେ ଗାଁରେ ତିଆରି ହୋଇଛି ଶ୍ମଶାନ ଗୃହ । ହେଲେ ଏହା ବର୍ଷ ବର୍ଷ ହେଲା ବ୍ୟବହାର ନହୋଇ ଭୂତକୋଠିରେ ପରିଣତ ହେଲାଣି   ।  ତେବେ ଏଠାରେ ପ୍ରଶ୍ନ ଉଠୁଛି କାହା ସ୍ବାର୍ଥରେ ଖର୍ଚ୍ଚ ହୋଇଛି ଲକ୍ଷାଧିକ ଟଙ୍କା  ।  ନିମ୍ନମାନର କାମ କରି ଠିକାଦାର ଛୁ’ ମାରିଥିବା ବେଳେ ଶ୍ମଶାନ ଯିବାକୁ ବାଟ ନାହିଁ  ।

ଫଳରେ ବ୍ୟବହାର ନହୋଇ ଜଙ୍ଗଲ ପାଲଟିଗଲାଣି  । ସରୀସୃପଙ୍କ ବାସସ୍ଥଳ ପାଲଟିଛି  । ଅନାବନା ଘାସରେ ଭର୍ତ୍ତି ହୋଇଛି ଶ୍ମଶାନ ପରିସର  ।  ରାଜ୍ୟର ଅନେକ ସ୍ଥାନରେ ଏଭଳି ସମସ୍ୟା ଥିବା ବେଳେ ପିପିଲି ତେଇଶିପୁର ପଂଚାୟତର ନିର୍ମଳା ଓ ତେଇଶିପୁର ଗାଁରୁ ଆସିଛି ଏଭଳି ଅଭିଯୋଗ  ।  ୨୦୨୨-୨୩ ରେ ଶ୍ମଶାନ ନିର୍ମାଣ ହୋଇଛି  ।  ଗୋଟିଏ ଗୋଟିଏ ଶ୍ମଶାନ ପାଇଁ ଖର୍ଚ୍ଚ ହୋଇଛି ୩-୫ ଲକ୍ଷ ଟଙ୍କା  ।  ଗୃହ ନିର୍ମାଣ ପୂର୍ବରୁ ଉପଯୁକ୍ତ ଭାବେ ଯୋଜନା କରାଯାଇନଥିବାରୁ ଏଭଳି ସମସ୍ୟା ସୃ‌ଷ୍ଟି ହୋଇଛି ।  ଅନ୍ୟପଟେ ବିଡିଓଙ୍କ ସହ ଆଲୋଚନା କରି ଖୁବ୍‌ଶୀଘ୍ର ସମସ୍ୟାର ସମାଧାନ କରାଯିବ ବୋଲି କହିଛନ୍ତି ପିପିଲି ବିଧାୟକ  ।