କନକ ବ୍ୟୁରୋ : ବିହାରରେ ସ୍ୱତନ୍ତ୍ର ଭୋଟର ତାଲିକା ସଂଶୋଧନ ପ୍ରସଙ୍ଗରେ ସଂସଦରେ ଚର୍ଚ୍ଚା ପାଇଁ ବିରୋଧୀଙ୍କ ଦାବି ଉପରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କଡ଼ା ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, "ଏଭଳି କୁତର୍କର କୌଣସି ଉତ୍ତର ନାହିଁ ।" ସେ ଆହୁରି ମଧ୍ୟ କହିଛନ୍ତି, "ଯେଉଁମାନେ ସମ୍ବିଧାନକୁ ହାତରେ ଧରି ବୁଲୁଛନ୍ତି, ସେହିମାନେ ହିଁ ସାମ୍ବିଧାନିକ ବ୍ୟବସ୍ଥାର ସବୁଠାରୁ ବେଶୀ ମଜାକ୍ ଉଡ଼ାଉଛନ୍ତି । SIR ହେଉଛି ଆମ ଦେଶର ନିର୍ବାଚନ ଆୟୋଗଙ୍କର ଏକ ବ୍ୟବସ୍ଥା ଏବଂ ଏହା ଦଶନ୍ଧି ଦଶନ୍ଧି ଧରି ଦେଶରେ ଲାଗୁ ହୋଇଆସୁଛି । ଲୋକମାନେ ନିଜର ରାଜନୈତିକ ସୁବିଧା ଏବଂ ସ୍ୱାର୍ଥ ପାଇଁ ଏହାର ବିରୋଧ କରୁଛନ୍ତି।"

Advertisment

ବିହାରରେ ସ୍ୱତନ୍ତ୍ର ଭୋଟର ତାଲିକା ସଂଶୋଧନ ପ୍ରକ୍ରିୟାକୁ ନେଇ ସଂସଦର ମୌସୁମୀ ଅଧିବେଶନରେ ବିରୋଧୀଙ୍କ ବିକ୍ଷୋଭ ପ୍ରଦର୍ଶନ ଦେଖିବାକୁ ମିଳୁଛି । ସଂସଦର 'ମକର ଦ୍ୱାର' ନିକଟରେ ଆୟୋଜିତ ଏହି ବିରୋଧ ପ୍ରଦର୍ଶନରେ କଂଗ୍ରେସ ସଂସଦୀୟ ଦଳର ମୁଖ୍ୟ ସୋନିଆ ଗାନ୍ଧୀ, କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରା, ସମାଜବାଦୀ ପାର୍ଟି, ରାଷ୍ଟ୍ରୀୟ ଜନତା ଦଳ ଏବଂ ଅନ୍ୟାନ୍ୟ ଦଳର ସାଂସଦମାନେ ସାମିଲ ହୋଇଥିଲେ । ବିରୋଧୀ ସାଂସଦମାନେ ଏକ ବଡ଼ ବ୍ୟାନର ମଧ୍ୟ ଧରିଥିଲେ, ଯେଉଁଥିରେ ଲେଖାଥିଲା, 'SIR- ଗଣତନ୍ତ୍ର ଉପରେ ପ୍ରହାର' । ସେମାନେ 'SIR ଫେରାଇ ନିଅ' ବୋଲି ନାରା ମଧ୍ୟ ଦେଇଥିଲେ । ବିରୋଧୀ ସାଂସଦଙ୍କ ଦାବି ହେଉଛି ଯେ ଏହି ବିଷୟରେ ସଂସଦରେ ଆଲୋଚନା ହେବା ଉଚିତ୍।