ପଖାଳରେ ଭରପୂର ଅଛି ରୋଗ ପ୍ରତିରୋଧକ ଶକ୍ତି, ବୈଜ୍ଞାନିକ ବି ମାନିଥିଲେ ପଖାଳର ଉପକାରିତା

ଜାଣିଛନ୍ତି କି । ପଖାଳରେ ଭରପୂର ଅଛି ରୋଗ ପ୍ରତିରୋଧକଶକ୍ତି । ଅବଶ୍ୟ ଏହା ଜାଣିବା ପୂର୍ବରୁ କାହିଁ କେବେରୁ ଓଡ଼ିଆ ଖାଆନ୍ତି ପଖାଳ । ହେଲେ କରୋନା କାଳରେ ଯେବେ ପୂରା ବିଶ୍ବ ଘାଂଟି ହେଉଥିଲା । ସେହି ସମୟରେ ପଖାଳର ଉପକାରିତାକୁ ନେଇ ଆସିଥିଲା ଏକ ରିପୋର୍ଟ । ଯେଉଁଥିରେ କୁହାଯାଇଥିଲା କି, ପଖାଳରେ ଭରପୂର ରହିଛି ରୋଗ ପ୍ରତିରୋଧକ ଶକ୍ତି । ଯାହା ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିଲା ।

ଭୁବନେଶ୍ବର ଏମ୍ସ କରିଥିଲା ଖୁଲାସା

୨ ବର୍ଷ ଗବେଷଣା ପରେ ଆସିଥିଲା ରିପୋର୍ଟ

ବଳିଥିବା ଭାତକୁ ପାଣି ପୂରାଇ ଦେଲେ ହୋଇଯିବ ପଖାଳ । ତିଆରି କରିବାରେ ନାଁ ଟଙ୍କା ଖର୍ଚ୍ଚ କରିବାକୁ ପଡ଼େ ନା ଝିଞ୍ଜଟ ଥାଏ । କେବଳ ପାଣି ଟିକିକ ଯାହା ଦରକାର । ପଖାଳ କେବଳ ପାଟି କି ପେଟକୁ ଶାନ୍ତ କରେ ତାହା ନୁହେଁ ବରଂ ଶରୀରର ରୋଗ ପ୍ରତିରୋଧକ ଶକ୍ତି ବି ବଢାଏ । କରୋନା ହେବା ପରେ ସାଧାରଣରେ ଶରୀରରେ ଇମ୍ୟୁନିଟି କମିଗଲା । ସମସ୍ତଙ୍କ ମନରେ ଚିନ୍ତା ପଶିଲା ଇମ୍ୟୁନିଟି ବଢିବ କେମିତି । ହେଲେ ଦେଖିଲା ବେଳକୁ ଆମରି ରୋଷେଇ ଘରେ ଲୁଚି ବସିଥିଲା ଇମ୍ୟୁନିଟି । ବାସି ପଖାଳ ଓ ତୋରାଣିରେ ଶରୀରକୁ ଏତେ ପରିମାଣରେ ରୋଗ ପ୍ରତିରୋଧକ ଶକ୍ତି ଯୋଗାଏ ଯେ ଏହା କରୋନାରୁ ବର୍ତ୍ତିବାରେ ସାହାଯ୍ୟ କରେ। ବୋଧହୁଏ ସେଇଥି ଲାଗି ଗାଁ ଗଣ୍ଡାର ଲୋକ ଖାସ କରି ଆଦିବାସୀମାନଙ୍କ ପାଖ ପଶିନଥିଲା କରୋନା । ପଖାଳରେ ଥିବା ଅଣୁଜୀବ ଶ୍ୱେତସାରର ସରଳୀକରଣ ଦ୍ୱାରା ସର୍ଟ ଚେନ୍ ଫ୍ୟାଟି ଏସିଡ୍ ତିଆରି କରେ । ଯାହାକି ମଣିଷକୁ ସୁସ୍ଥ ରଖିବା ସହ ରୋଗ ପ୍ରତିରୋଧକ ଶକ୍ତି ବଢ଼ାଇବାରେ ଅନେକାଂଶରେ ସାହାଯ୍ୟ କରେ ।

ନିଇତି ତୋରାଣି ପିଉଥିଲେ

ବଢିବ ଇମ୍ୟୁନିଟି ପାଓ୍ୱାର

ଏମ୍ସ ପକ୍ଷରୁ ଦିଆଯାଇଥିବା ରିପୋର୍ଟରେ ସ୍ପଷ୍ଟ କରାଯାଇଥିଲା କି, ଯେଉଁମାନେ ନିଇତି ପଖାଳ କିମ୍ବା ତୋରାଣି ପିଅନ୍ତି ସେମାନଙ୍କର ଇମ୍ୟୁନିଟି ପାୱାର ବଢେ । ବାସି ପଖାଳରେ ଥିବା ସର୍ଟ ଚେନ୍ ଫ୍ୟାଟି ଏସିଡ୍‌ର ପ୍ରଦାହରୋଧୀ ବା ଆଣ୍ଟି-ଇନ୍‌ଫ୍ଲେମାଟୋରୀ ଗୁଣ ରହିଛି । ତୋରାଣିରେ ଥିବା ଲୋବାସିଲସ୍ ଜୀବାଣୁ ଶରୀରରେ ଇମ୍ୟୁନୋଗ୍ଲୋବୁଲିନ୍ କ୍ଷରଣରେ ସହାୟକ ହୁଏ, ଯାହାକି ଫୁସଫୁସ୍‌ ଓ ଅନ୍ତଃନଳୀ ସଂକ୍ରମଣକୁ ରୋକିଥାଏ । ଖାଲି ଏତିକି ନୁହେଁ ପଖାଳ ଅପପୁଷ୍ଟି ରୋକିବାକୁ ଏବଂ ଗର୍ଭବତୀ ମହିଳାଙ୍କ ଭ୍ରୁଣର ବିକାଶ ପାଇଁ ଖୁବ୍ ଉପକାରୀ । ତେବେ ଗବେଷକଙ୍କ କହିବା କଥା, ସଜ ନୁହେଁ କେବଳ ବାସି ପଖାଳ ଓ ତୋରାଣିରେ ହିଁ ଏହି ଗୁଣ ରହିଛି।

ପଖାଳ ଯେ ଦେହ ଲାଗି କେତେ ଜରୁରୀ ତାହା ଓଡ଼ିଆଙ୍କଠୁ ଆଉ ଅଧିକ କିଏ ବା ଜାଣେ । ସେଇଥି ଲାଗି ତ ଓଡ଼ିଆ କିଛି ଖାଉ କି ନଖାଉ…କଂସେ ପଖାଳ ଓ ଢୋକେ ତୋରାଣି ନିଶ୍ଚୟ ପିଉଥିବ । ସତରେ ଆମେ ଓଡ଼ିଆ, ଭାରି ବଢିଆ…