କନକ ବ୍ୟୁରୋ : ବନ୍ଧା ହେଲା ପତ୍ନୀ ହତ୍ୟାକାରୀ । ସ୍ତ୍ରୀ ଶୁଭଶ୍ରୀ ନାୟକଙ୍କୁ ଆନେସ୍ଥେସିଆ ଦେଇ ହତ୍ୟା କରିଥିଲା ଜହ୍ଲାଦ ସ୍ବାମୀ ପ୍ରଦ୍ୟୁମ୍ନ । ଘଟଣାର ପର୍ଦ୍ଦାଫାସ ହେବା ପରେ ପ୍ରଦ୍ୟୁମ୍ନ କୁମାରଙ୍କୁ ଗିରଫ କରିଛି କମିଶନରେଟ୍ ପୋଲିସ । ସ୍ତ୍ରୀ ଶୁଭଶ୍ରୀଙ୍କୁ ହତ୍ୟା କରିବାରେ ପ୍ରଦ୍ୟୁମ୍ନଙ୍କୁ ସହଯୋଗ କରିଥିବା ଦୁଇ ମହିଳାଙ୍କୁ ବି ପୋଲିସ ଗିରଫ କରିଛି । ଗତ ୨୮ ତାରିଖରେ ଭରତପୁର ଥାନା ଅଞ୍ଚଳରେ ଘଟିଥିଲା ଏହି ଘଟଣା । ରାତିରେ ଭରତପୁର ପୋଲିସ ଖବର ପାଇ ଶୁଭଶ୍ରୀଙ୍କ ମୃତଦେହ ଉଦ୍ଧାର କରିଥିଲା । ଆଉ ସେତେବେଳେ ତାଙ୍କ ହାତରେ ଦୁଇଟି ଚିହ୍ନ ଦେଖିଥିଲା ପୋଲିସ । ପୋଲିସକୁ ସନ୍ଦେହ ହେବାରୁ ମୃତଦେହର ଶବବ୍ୟବଚ୍ଛେଦ କରାଯାଇଥିଲା । ରିପୋର୍ଟରେ ଆସିଥିଲା ଚାଞ୍ଚଲ୍ୟକର ତଥ୍ୟ । ଶୁଭଶ୍ରୀଙ୍କୁ ଆନେସ୍ଥେସିଆ ଦେଇ ହତ୍ୟା କରାଯାଇଥିବା ଜଣାପଡିଥିଲା । ବଡ଼ କଥା ହେଉଛି ପ୍ରଦ୍ୟୁମ୍ନ ଜଣେ ଫାର୍ମାସିଷ୍ଟ , ଆଉ ସେ ନିଜ ସହଯୋଗୀଙ୍କୁ ନେଇ ସ୍ତ୍ରୀ ଶୁଭଶ୍ରୀଙ୍କୁ ହତ୍ୟା କରିବାକୁ ଷଡ଼ଯନ୍ତ୍ର କରିଥିଲେ । ପୋଲିସର ତଦନ୍ତ ପରେ ଏବେ ପୂରା ଘଟଣା ସାମ୍ନାକୁ ଆସିଛି ।