ଫେବ୍ରୁଆରୀ ଦ୍ବିତୀୟ ସପ୍ତାହରୁ ଅସହ୍ୟ ତାତି । ବଲାଙ୍ଗୀରରେ ଉପରମୁହାଁ ପାରଦ ।

କନକ ବ୍ୟୁରୋ :  ଆଗରୁ ମାର୍ଚ୍ଚ ମାସରୁ ବଲାଙ୍ଗୀରରେ ଗରମ ଅନୁଭୂତ ହେଉଥିଲା। ହେଲେ ଏବେ ଜଳବାୟୁ ପରିବର୍ତ୍ତନ ଯୋଗୁଁ ଫେବ୍ରୁଆରୀରୁ ଖରାରେ ସିଝୁଛନ୍ତି ବଲାଙ୍ଗୀର ବାସୀ। ଜିଲ୍ଲାରେ ବର୍ଷା, ଶୀତ ସେମିତି ଅନୁଭୂତ ହେଉନାହିଁ । ବର୍ଷକରୁ ୪ ମାସ ଛାଡ଼ି ଦେଲେ ବାକି ସବୁବେଳେ ଗରମ ହେଉଛି। ଯାହା ସାଧାରଣ ଜୀବନଯାପନକୁ ପ୍ରଭାବିତ କରୁଛି ।

ପାନୀୟ ଜଳ ସମସ୍ୟା ଓ ମନ ଇଚ୍ଛା ବିଦ୍ୟୁତ କାଟ ଯୋଗୁଁ ବଲାଙ୍ଗୀରବାସୀଙ୍କ ଆଉଟପାଉଟ୍ ହେଉଥିବା ଦେଖିବାକୁ ମିଳିଛି । ବଲାଙ୍ଗୀର ଜିଲ୍ଲାଟି ଭୌଗଳିକ ଦୃଷ୍ଟିକୋଣରୁ ଏକ ଶୁଷ୍କ ଓ ମାଳ ଅଞ୍ଚଳ। ପୂର୍ବରୁ ଏଠାରେ ବହୁ ପରିମାଣର ଗଛ ଥିଲା। ତାପମାତ୍ରା ବଢ଼ୁଥିଲେ ମଧ୍ୟ ଲୋକ ହଇରାଣ ହେଉନଥିଲେ। ହେଲେ ଏବେ ସହରୀକରଣ ନାଁରେ ଗଛ କଟା ଚିନ୍ତାର କାରଣ ହୋଇଛି।