କନକ ବ୍ୟୁରୋ : ଅଭିନେତା ସଲମାନ ଖାନ ଓ ନେତା ଜିଶାନ ସିଦ୍ଦିକିଙ୍କୁ ମିଳିଲା ହତ୍ୟା ଧମକ। ମୁମ୍ବାଇ ପୁଲିସର କାର୍ୟ୍ୟାଳୟକୁ କଲ୍‌ କରି ଉଭୟ ସଲମାନ ଓ ଜିଶାନ ସିଦ୍ଦିକିଙ୍କୁ ଜୀବନରେ ମାରିବାକୁ ଧମକ ଦିଆଯିବା କିଛି ଘଂଟା ପରେ ଅଭିଯୁକ୍ତକୁ ଗିରଫ କରାଯାଇଛି ।  ସୂଚନା ଅନୁସାରେ ବାନ୍ଦ୍ରା ସ୍ଥିତି ଜିଶାନଙ୍କ ଜନସମ୍ପର୍କ  କାର୍ଯ୍ୟାଳୟକୁ  ଏହି ଫୋନ୍‌ କଲ୍‌ ଆସିଛି । ଏହି ମାମଲାରେ ପୁଲିସ ଜଣେ ବ୍ୟକ୍ତିଙ୍କୁ ଗିରଫ କରିଛି । ଜଣେ ଅଜ୍ଞାତ ବ୍ୟକ୍ତି ଫୋନରେ ଜିଶାନ ସିଦ୍ଦିକି ଓ ଅଭିନେତା ସଲମାନ ଖାନଙ୍କୁ ହତ୍ୟା କରିବାକୁ ଧମକ ଦେଇଥିଲେ । ଏଥିସହ ଟଙ୍କା ମାଗିଥିଲା । ଏହା ପରଠାରୁ ଜିଶାନଙ୍କ ଘରେ ସୁରକ୍ଷା କଡ଼ା କଡ଼ି କରାଯାଇଥିଲା । ଜିଶାନ ସିଦ୍ଦିକିଙ୍କ କାର୍ଯ୍ୟାଳୟର କର୍ମଚାରୀଙ୍କ ଦ୍ୱାରା ଦିଆଯାଇଥିବା ଅଭିଯୋଗକୁ ଭିତ୍ତି କରି ନିର୍ମଲନଗର ପୁଲିସ ଷ୍ଟେସନରେ ଅଜଣା ଲୋକଙ୍କ ବିରୋଧରେ ମାମଲା ରୁଜୁ ହୋଇଛି । ପୁଲିସ ଏହି ମାମଲାରେ ନୋଏଡାରୁ ଜଣଙ୍କୁ ଗିରଫ କରିଛି । ଗିରଫ ବ୍ୟକ୍ତି ଜଣକର ବୟସ ୨୦ ବର୍ଷ ଓ ତା' ନାଁ ଗୁରଫାନ । ପୋଲିସର ସୂତ୍ର ଅନୁଯାୟୀ, ମହମ୍ମଦ ତୈୟବ ଓରଫ ଗୁରଫାନ ଦିଲ୍ଲୀର ବାସିନ୍ଦା ବୋଲି କୁହାଯାଇଛି । ନୋଏଡାରୁ ଅଭିଯୁକ୍ତକୁ ସେକ୍ଟର -୩୯ ପୁଲିସ ଷ୍ଟେସନ ଅଞ୍ଚଳରୁ ଗିରଫ କରାଯାଇଛି । ମୁମ୍ବାଇ ପୁଲିସ ଗୁରଫାନକୁ ଟ୍ରାଞ୍ଜିଟ୍ ରିମାଣ୍ଡରେ ନେଇଛି । ପ୍ରାରମ୍ଭିକ ଅନୁସନ୍ଧାନରୁ ଜଣାପଡିଛି ଯେ ଏହି ଧମକପୂର୍ଣ୍ଣ କଲ୍ କେବଳ ଟଙ୍କା ମାଗିବା ପାଇଁ କରାଯାଇଥିଲା। ତେବେ ପ୍ରତ୍ୟେକ ଏଙ୍ଗେଲକୁ ଦୃଷ୍ଟିରେ ରଖି ପୁଲିସ ଘଟଣାର ତଦନ୍ତ ଜାରି ରଖିଛି।