କନକ ବ୍ୟୁରୋ : ବଲାଙ୍ଗୀର ଜିଲ୍ଲା ଟିଟିଲାଗଡ଼ରେ ଉତ୍କଟ ଦାରିଦ୍ର୍ୟ । ମାତ୍ର ୨୦ ହଜାର ଟଙ୍କାରେ ଶିଶୁକନ୍ୟାକୁ ବିକିଦେଲେ ବାପା ମା’ । ଟିଟିଲାଗଡ଼, ପାଇକମାଳ ପୁଲିସ ଓ ଜିଲ୍ଲା ଶିଶୁ ମଙ୍ଗଳ ଅଧିକାରୀଙ୍କ ଦ୍ବାରା ଉଦ୍ଧାର ହେଲା ଶିଶୁ । ଟିଟିଲାଗଡ଼ ବ୍ଲକ ବାଗଡ଼େର ଗାଁରେ ଶିଶୁ କନ୍ୟା ବିକ୍ରି ଅଭିଯୋଗ ଆସିଥିଲା । ବିକ୍ରି ଶିଶୁ ବରଗଡ଼ ଜିଲ୍ଲା ପାଇକମାଳରୁ ଉଦ୍ଧାର ହେବା ପରେ ସାମ୍ନାକୁ ଆସିଛି ଶିଶୁ ବିକ୍ରି ପଛର କରୁଣ କାହାଣୀ । 

Advertisment

ବାଗଡ଼େର ଗାଁର ନୀଳ ରଣାଙ୍କ ପୂର୍ବରୁ ୪ଟି ଝିଅ ଅଛନ୍ତି । ପଞ୍ଚମ ସନ୍ତାନଟି ପୁଣି ଝିଅ ହେବା ସହ ତା'ଭରଣପୋଷଣ କରିବା କଷ୍ଟକର ହୋଇପଡ଼ିଛି । ତେଣୁ ଶିଶୁକନ୍ୟାଟିକୁ ବିକ୍ରି କରିଦେଇଥିବା ସ୍ୱୀକାର କରିଛନ୍ତି ବାପା ମା '। ରହିବା ପାଇଁ ଭଲ ଘର ନାହିଁ । ଝାଟିମାଟି ଘରେ ଦୁଇଓଳି ଦିମୁଠା ଦାନା ପାଇଁ ସଂଘର୍ଷ କରୁଛି ଏହି ପରିବାର । ଏଭଳି ସ୍ଥିତିରେ ଥିବା ପରିବାରର ନାଁ ରାସନକାର୍ଡ ତାଲିକାରୁ ବି କଟିଯାଇଛି । କୁହାଯାଉଛି, ଅଭାବ ଅନଟନ ପରିବାରକୁ ଏପରି ଚରମ ନିଷ୍ପତ୍ତି ନେବାକୁ ବାଧ୍ୟ କରିଛି । ଗରିବଙ୍କ ପାଇଁ ମାଳମାଳ ଯୋଜନା ହେଉଛି। ସମସ୍ତଙ୍କ ପେଟକୁ ଦାନା ଓ ମୁଣ୍ଡ ଉପରେ ଛାତ ଯୋଗାଇ ଦେଉଥିବା ନେଇ ସରକାର ଡିଣ୍ଡିମ ପିଟୁଛନ୍ତି । ହେଲେ ଏଠି ମାତ୍ର ୨୦ ହଜାର ଟଙ୍କାରେ ଶିଶୁବିକ୍ରି ହେଉଛି । ଏହାଠୁ ଦୁର୍ଭାଗ୍ୟଜନକ ଓ ଲଜ୍ଜାଜନକ ଘଟଣା ଆଉ କ’ଣ ହୋଇପାରେ ।