କନକ ବ୍ୟୁରୋ : ଭାଙ୍ଗିଲା ଜମ୍ଭୀର ନଦୀର ବନ୍ଧ । ଏକର ଏକର ଚାଷ ଜମି ଜଳମଗ୍ନ । ମୟୂରଭଞ୍ଜ ରାସଗୋବିନ୍ଦପୁର ବ୍ଲକ କଡ଼ାମପୁର ଠାରେ ନଦୀବନ୍ଧ ଭାଙ୍ଗିଛି । ପ୍ରବଳ ବର୍ଷା ଯୋଗୁଁ ନଦୀର ଜଳସ୍ତର ବୃଦ୍ଧି ପାଇ ବନ୍ଧ ଭାଙ୍ଗିଯାଇଛି । କଡ଼ାମପୁର, ବଧି, ପଥରଚାଟିଆ, ଭାଇରଙ୍ଗୀ, ରାଘବପୁର, ହାଣ୍ଡିଧୂଆ ଗାଁର ଚାଷ ଜମି ଜଳମଗ୍ନ ହୋଇଯାଇଛି । ବନ୍ଧ ଭାଙ୍ଗିବାରୁ ଭୟଭୀତ ଅଛନ୍ତି ସ୍ଥାନୀୟ ଅଞ୍ଚଳର ଲୋକ ।  

Advertisment

ଇବ୍ ନଦୀରେ ପ୍ରଥମ ବନ୍ୟା । କ୍ରମାଗତ ଭାବେ ଗତକାଲି ଠାରୁ ବଢ଼ୁଛି ନଦୀର ଜଳସ୍ତର । ଉପରମୁଣ୍ଡରେ ପ୍ରବଳ ବର୍ଷା ଯୋଗୁଁ ବନ୍ୟା ପରିସ୍ଥିତି ସୃଷ୍ଟି ହୋଇଛି । ରାଣୀବଗିଚା, ଗୁଆଲାପଡ଼ା ସହ ବିଭିନ୍ନ ଅଞ୍ଚଳରେ ଜଳବନ୍ଦୀ ସ୍ଥିତି ସୃଷ୍ଟି ହୋଇଛି । ପିଏଚଡି ପମ୍ପ ହାଉସରେ ପାଣି ପଶିବାରୁ ଜଳଯୋଗାଣ ବାଧାପ୍ରାପ୍ତ ହୋଇଛି । ଛତିଶଗଡ଼ର ସମଡମା ଆନିକଟର ଗେଟ୍‌ ଖୋଲିଦେବାରୁ ଏପଟେ ଜଳବନ୍ଦୀ ପରିସ୍ଥିତି ସୃଷ୍ଟି ହୋଇଛି ।    

ବିପଦ ସଙ୍କେତ ଅତିକ୍ରମ କଲା ଜଳକା ନଦୀର ଜଳସ୍ତର । ନଦୀର ମଥାନୀଠାରେ ବିପଦ ସଙ୍କେତ ୬ ଦଶମିକ ୫୦ ମିଟର । ସକାଳ ୭ଟା ସୁଦ୍ଧା ଜଳସ୍ତର ବୃଦ୍ଧି ପାଇ ୬ ଦଶମିକ ୮୦ ମିଟରରେ ପ୍ରବାହିତ ହେଉଛି । ଯାହା ଫଳରେ ଉତ୍ତର ଓଡ଼ିଶାରେ ବନ୍ୟା ପରିସ୍ଥିତି ସୃଷ୍ଟି ହୋଇଛି ।

ରାଜ୍ୟରେ ଜାରି ରହିଛି ପ୍ରବଳ ବର୍ଷା । ଆଜି ବି ରାଜ୍ୟରେ ପ୍ରବଳ ବର୍ଷା ନେଇ ଆକଳନ କରିଛି ପାଣିପାଗ ବିଭାଗ । ଫଳରେ ମହାନଦୀ ସମେତ ବ୍ରାହ୍ମଣୀ ଓ ବୁଢାବଳଙ୍ଗ ନଦୀର ଜଳସ୍ତର ବଢୁଛି । ରାଜ୍ୟରେ ସମ୍ଭାବ୍ୟ ବନ୍ୟାର ମୁକାବିଲା ପାଇଁ ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ରାଜୀବ ଭବନରେ ଜରୁରୀ ବୈଠକ କରିଛନ୍ତି । ଜଳସମ୍ପଦ ବିଭାଗର ବରିଷ୍ଠ ଅଧିକାରୀ ଓ ଅନ୍ୟ ବିଭାଗର ଅଧିକାରୀଙ୍କ ସହ ଆଲୋଚନା କରିଛନ୍ତି । ପ୍ରବଳ ବର୍ଷା କାରଣରୁ ମହାନଦୀ ଓ ବ୍ରାହ୍ମଣୀରେ ବନ୍ୟା ଆଶଙ୍କା ଥିବାରୁ ଆଗୁଆ ପ୍ରସ୍ତୁତି କରିବାକୁ ନିର୍ଦ୍ଦେଶ ଦେଇଛନ୍ତି ମନ୍ତ୍ରୀ ।    

ମହାନଦୀର ଉପର ମୁଣ୍ଡରେ ପ୍ରବଳ ବର୍ଷା ଯୋଗୁ ହୀରାକୁଦର ଜଳସ୍ତର ବଢିଛି । ଡ୍ୟାମ୍‌କୁ ପ୍ରତି ସେକେଣ୍ଡରେ ଜଳଭଣ୍ଡାରକୁ ୪ ଲକ୍ଷ ୨୭ ହଜାର ୫୬୬ କ୍ୟୁସେକ୍ ଜଳ ପ୍ରବେଶ କରୁଛି । ଏବେ ହୀରାକୁଦ ବନ୍ଧରେ ୨୦ଟି ଗେଟ୍ ଖୋଲାଯାଇଛି । ଜଳଭଣ୍ଡାରର ଜଳସ୍ତର ବୃଦ୍ଧି ପାଇ ୬୧୦ ଫୁଟ୍‌ରେ ପହଞ୍ଚିଛି । ପ୍ରତି ସେକେଣ୍ଡରେ ଜଳଭଣ୍ଡାରରୁ ୩ ଲକ୍ଷ ୩୫ ହଜାର ୭୦୩ କ୍ୟୁସେକ୍ ଜଳ ନିଷ୍କାସିତ ହେଉଛି । ବେଲଗାଁ, ଖଇରାମାଳ, ବରମୂଳରେ ଜଳସ୍ତର ବୃଦ୍ଧି ପାଇବାରେ ଲାଗିଛି । ତିନି ଦିନ ପୂର୍ବରୁ ହୀରାକୁଦର ମାତ୍ର ୨ଟି ଗେଟ୍‌ ଖୋଲାଥିଲା । କିନ୍ତୁ ଦୁଇ ଦିନ ହେଲା ପ୍ରବଳ ବର୍ଷା ଯୋଗୁ ଅଧିକ ଗେଟ୍‌ ଖୋଲାଯାଇଛି ।