କନକ ବ୍ୟୁରୋ: ପୁରୀ ଅନ୍ନପୂର୍ଣ୍ଣା ରଙ୍ଗମଞ୍ଚ ଏବେ ବି ସେଇ ଟିଣ ଘରେ ଚାଲିଛି । ନା ଦର୍ଶକ ବସିବା ପାଇଁ ଅନୁକୂଳ ପରିବେଶ ଅଛି ନା ମଞ୍ଚକୁ ଦିଆଯାଇଛି ନୂଆରୂପ । ଗତବର୍ଷ ଅବଢ଼ା ଯୋଜନାରେ ଏହାକୁ ସାମିଲ କରିବା ପାଇଁ  ଘୋଷଣା ହେଲା । କିନ୍ତୁ କିଛି ବି ହେଲାନାହିଁ । କନକ ନ୍ୟୁଜରେ ଏହି ଖବର ପ୍ରସାରଣ ପରେ ରଙ୍ଗମଞ୍ଚର ନବୀକରଣ ପାଇଁ ସଂସ୍କୃତି ବିଭାଗରେ ପ୍ରସ୍ତାବ ରଖିଥିଲେ ପୁରୀ ବିଧାୟକ ସୁନୀଲ ମହାନ୍ତି ।

Advertisment

 ଏବେ ଏହି ଥିଏଟରକୁ ନୂଆରୂପ ଦେବାକୁ ସରକାର ପ୍ରସ୍ତାବ ରଖିଛନ୍ତି । ଏଥିପାଇଁ ୧୫ କୋଟି ଟଙ୍କା ଖର୍ଚ୍ଚ ହେବ । ନୂଆଢାଞ୍ଚାରେ ଭୂତଳ ପାର୍କିଂ ସହ ପ୍ରଥମ ମହଲାରେ ଅନ୍ନପୂର୍ଣ୍ଣା ଥିଏଟର ଓ ଦ୍ୱିତୀୟ ମହଲାରେ ଫିଲ୍ମ ହଲ୍ ରହିବ। ସମସ୍ତ ଆଧୁନିକ ବ୍ୟବସ୍ଥା କରିବା ପ୍ରସ୍ତାବ ରହିଛି । ବାହାର ନିର୍ମାଣରେ ସଂସ୍କୃତି ଓ ଐତିହ୍ୟର ଛାପ ରଖିବା ପାଇଁ ଅନୁରୋଧ କରିଛନ୍ତି ବିଧାୟକ l ଏଥିପାଇଁ ଡିପିଆର ପ୍ରସ୍ତୁତ କରାଯାଉଛି । ଯାହାକୁ ପୁରୀବାସୀ ସ୍ୱାଗତ କରିଛନ୍ତି । ୧୯୩୬ ମସିହାରେ ପ୍ରତିଷ୍ଠା ହୋଇଥିଲା ପୁରୀ ଅନ୍ନପୂର୍ଣ୍ଣା ରଙ୍ଗମଞ୍ଚ। ସମୟକ୍ରମେ ଅସଜଡ଼ା ହୋଇ ପଡ଼ିଥିଲା ।  ଏବେ ନୂଆରୂପ ପାଇବାକୁ ଯାଉଛି ।