ବଢ଼ିଲା ‘ସମର୍ଥ’ର ସମସ୍ୟା;ଆର୍ଥିକ କାରବାର ନେଇ ଖୋଳତାଡ଼

କନକ ବ୍ୟୁରୋ :ସମ୍ବଲପୁରର ବହୁଚର୍ଚ୍ଚିତ ସମର୍ଥ ଅନୁ୍ଷ୍ଠାନର ଆର୍ଥିକ କାରବାର ନେଇ ଖୋଳତାଡ଼ ଆରମ୍ଭ ହୋଇଛି । ସରକାରୀ ଓ ବେସରକାରୀ ଅନୁଦାନ ନେଇ ପୁଲିସ ଓ ସାମାଜିକ ସୁରକ୍ଷା ବିଭାଗ ତଦନ୍ତ ଆରମ୍ଭ କରିଛନ୍ତି । 

ଦିବ୍ୟାଙ୍ଗ ଅନ୍ତେବାସୀଙ୍କୁ ନିର୍ଯାତନା ଅଭିଯୋଗରେ ଗିରଫ ହୋଇ ଜେଲ୍ ଯାଇଥିବା ସମର୍ଥ ଅନୁଷ୍ଠାନର ସମ୍ପାଦକ ହରିଶ ଚନ୍ଦ୍ର ଦାସ କେଉଁଠୁ କେତେ ଟଙ୍କା ଅନୁଦାନ ପାଇଥିଲେ ? ତା’ର ସୁବିନିଯୋଗ ହୋଇଛି କି ନାହିଁ ? ନା ଅନିୟମିତତା ହୋଇଛି? ଏସବୁର ଖୋଳତାଡ଼ ଆରମ୍ଭ ହୋଇଛି। ପୁଲିସ ଓ ସାମାଜିକ ସୁରକ୍ଷା ବିଭାଗ ସରକାରୀ ଅନୁଦାନ ଖର୍ଚ୍ଚର ଖୋଳତାଡ଼ ଆରମ୍ଭ କରିଛନ୍ତି । ବିଭାଗୀୟ ଅଧିକାରୀ ତନ୍ନତନ୍ନ କରି ଯାଞ୍ଚ କରୁଛନ୍ତି । 

ସମର୍ଥ ଅନୁଷ୍ଠାନ ସରକାରଙ୍କ ପକ୍ଷରୁ ୨୦୨୩ ମସିହାରେ ପତ୍ରସଂଖ୍ୟା ୨୯୦୮ ଅନୁଯାୟୀ ୬ ଲକ୍ଷ ଟଙ୍କା ଓ ପତ୍ରସଂଖ୍ୟା ୭୯୩୧ ଅନୁଯାୟୀ ସେହିବର୍ଷ ୧୨ ଲକ୍ଷ ଟଙ୍କା, ୨୦୨୪ରେ ପତ୍ରସଂଖ୍ୟା ୨୮୯୪ ଅନୁଯାୟୀ ୧୨ ଲକ୍ଷ ଓ ସେହିବର୍ଷ ପତ୍ରସଂଖ୍ୟା ୬୫୭୦ ଅନୁଯାୟୀ ୭ ଲକ୍ଷ ୨୦ ହଜାର ଟଙ୍କା ଅନୁଦାନ ପାଇଛି। କେବଳ ସରକାରୀ ନୁହେଁ, ବେସରକାରୀ ଅନୁଦାନ ବି ପାଇଛି ସମର୍ଥ ଅନୁଷ୍ଠାନ । ଏସବୁର ଖୋଳତାଡ଼ ଆରମ୍ଭ ହୋଇଛି ।