ମୌସୁମୀ ସାଙ୍ଗକୁ ଲଘୁଚାପ ବର୍ଷାରେ ଭାସୁଛି ଦେଶର ରାଜଧାନୀ : ସେପଟେ ମୁମ୍ବାଇରେ ମଧ୍ୟ ସମାନ ଅବସ୍ଥା

କନକବ୍ୟୁରୋ : ଦିଲ୍ଲୀରେ ପ୍ରବଳ ବର୍ଷା । ରାସ୍ତାଘାଟଠୁ ନେଇ ସ୍କୁଲ, ଘରଦ୍ବାର ସବୁଠି ପଶିଛି ବର୍ଷା ପାଣି । ଆଗାମୀ ୪ଦିନ ପାଇଁ ରାଜ୍ୟରେ ମୌସୁମୀ ବର୍ଷା ଜାରି ରହିବା ଆଶଙ୍କାରେ ୟେଲୋ ୱାର୍ଣ୍ଣିଂ ଜାରି କରାଯାଇଛି । ଲଗାଣବର୍ଷା ପରେ ଦିଲ୍ଲୀର ହାଲ୍‌ ବେହାଲ ।  କେଉଁଠି ରାସ୍ତାଘାଟ ଜାମ୍‌, ତ ପୁଣି କେଉଁଠି ବର୍ଷାରେ ବୁଡ଼ିଛି ରାଜଧାନୀ  ।  ଘରୁ ବାହାରିବା ଏକ ପ୍ରକାର ମୁସ୍କିଲ  ।  ଲଘୁଚାପ ଓ ମୌସୁମୀ ବର୍ଷାର ଡବଲ ମାଡ଼ରେ ବେହାଲ ଦେଶର ରାଜଧାନୀ ।  ସ୍କୁଲ ଭିତରେ ପଶିଛି ବର୍ଷା ପାଣି ଓ ସେଠି ବସି ରହିଛନ୍ତି କୁନିକୁନି ଛୁଆ ।

ସତେ ଯେମିତି ପିଲାମାନଙ୍କୁ ସୁରକ୍ଷା ପାଇଁ ସ୍କୁଲ ପ୍ରଶାସନର ନିଘା ନାହିଁ  । ସେପଟେ ଆଉ ଏକ ଚିତ୍ରରେ ରାଜଧାନୀ ରାସ୍ତାରେ ଦେଖିବାକୁ ମିଳିଛି । ଲୋକମାନେ ପହଁରି ପହଁରି ଯାଉଥିବା ଦେଖିବାକୁ ମିଳିଛି । ତେବେ ସଠିକ ଭାବେ ବର୍ଷା ପାଣି ନିଷ୍କାସନ ହେଉନଥିବାରୁ ପାଣି ଜମାଟ ବାନ୍ଧୁଛି ଓ ଏହାର କାରଣ ପାଇଁ ସମସ୍ୟା ବଢୁଥିବା ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି ।

ଦିଲ୍ଲୀ ପରେ ମୁମ୍ବାଇରେ ମଧ୍ୟ ସମାନ ଅବସ୍ଥା । ଦେଶର ବାଣିଜ୍ୟନଗରୀ ମୁମ୍ବାଇ ବେହାଲ ହୋଇପଡ଼ିଛି । ଯେଉଁଠି ନଜର ପଡୁଛି ସେଠି ଖାଲି ପାଣି ହିଁ ପାଣି । ରାସ୍ତାଘାଟ, ଘରଦ୍ବାର ସବୁଠି ଆଣ୍ଠୁଏଁ ପାଣି ଜମାଟ ବାନ୍ଧିଛି । ରାସ୍ତାରେ ଯାନବାହନ ଗଡ଼ିବା ବଦଳରେ ଲହରୀ ଭାଙ୍ଗୁଛି ବର୍ଷା ପାଣି । ୨୪ ଘଣ୍ଟା ଚଳଚଞ୍ଚଳ ରହୁଥିବା ମୁମ୍ବାଇ କିଛି ଘଣ୍ଟା ପାଇଁ ଠପ୍ ହୋଇପଡ଼ିଛି ।

ରବିବାର ରାତିରୁ ଆରମ୍ଭ ହୋଇଥିବା ବର୍ଷା ୩ଦିନ ହେବ ଜାରି ରହିଛି । ଦେଶର ଅଧିକାଂଶ ସ୍ଥାନରେ ବର୍ଷା ଜାରି ରହିଥିବାବେଳେ ପାହାଡ଼ିଆ ରାଜ୍ୟ ହିମାଚଳପ୍ରଦେଶ, ଉତ୍ତରାଖଣ୍ଡ ଓ ଜମ୍ମୁକାଶ୍ମୀରରେ କାଳ ସାଜିଛି ବର୍ଷା, ବନ୍ୟା ସାଙ୍ଗକୁ ଭୂସ୍ଖଳନ । ରାସ୍ତାଘାଟ ବନ୍ଦ ପଡ଼ିଛି । ସେପଟେ ଉତ୍ତର-ପୂର୍ବ ରାଜ୍ୟ ଆସାମ, ମଣିପୁର, ଅରୁଣାଚଳ ପ୍ରଦେଶରେ ଦିନକୁ ଦିନ ସମସ୍ୟା ବଢ଼ାଉଛି ଲଗାଣବର୍ଷା । ତେବେ ଜଳବାୟୁ ପରିବର୍ତ୍ତନ ପାଇଁ କିଛି ରାଜ୍ୟରେ ବର୍ଷା ଓ ଅନ୍ୟକିଛି ରାଜ୍ୟରେ ମୁଣ୍ଡଫଟା ଖରା ସାଙ୍ଗକୁ ଅସହ୍ୟ ତାତି ଅନୁଭୂତ ହେଉଛି ।