ଶ୍ରାବଣ ସରିଲା ହେଲେ ଶୁଖିଲା ପଡ଼ିଛି ଭୂଇଁ , ଟାଣ ଖରାରେ ପୋଡ଼ିଗଲାଣି ତଳି

କନକ ବ୍ୟୁରୋ : ଓଡ଼ିଆ ପରମ୍ପରା ଅନୁସାରେ ଅକ୍ଷୟ ତୃତୀୟାଠାରୁ ଚାଷ କାମ ଆରମ୍ଭ ହୋଇ ଗହ୍ମାପୂର୍ଣ୍ଣିମାରେ ଖରିଫ ଚାଷ କାମ ଶେଷ ହୋଇଥାଏ । ହେଲେ ଜଳବାୟୁ ପରିବର୍ତ୍ତନ ଯୋଗୁଁ ଏବେ ବି ଅନେକ ଜିଲ୍ଲାରେ ଚାଷ କାମ ଆରମ୍ଭ ହୋଇନାହିଁ । ଚାଷ ଜମି ଫାଟି ଆଁ କରିଥିବା ବେଳେ ଚିନ୍ତାରେ ପଡ଼ିଛି ଚାଷୀ । ଉପକୂଳରୁ ଉପାନ୍ତ ସବୁଠି ସ୍ଥିତି ସମାନ । 

ଚାଷ ପାଇଁ ଆବଶ୍ୟକତା ଅନୁସାରେ ବର୍ଷା ନହେବାରୁ ଗଞ୍ଜାମ ଜିଲ୍ଲାରେ ହେକ୍ଟର ହେକ୍ଟର ଚାଷ ଜମି ଶୁଖିଲା ପଡ଼ିଛି । ଜମି ଫାଟି ଆଁ କରିଥିବା ବେଳେ ଅନେକ ସ୍ଥାନରେ ତଳି ପୋଡ଼ିଗଲାଣି। ମୌସୁମୀର ଲୁଚକାଳି ଖେଳ ଭିତରେ ବଳି ପଡ଼ୁଛନ୍ତି ଚାଷୀ । ଗଞ୍ଜାମର ଜୀବନ ରେଖା କୁହାଯାଉଥିବା ଋଷିକୂଲ୍ୟା ନଦୀ ଶୁଖିଲା ପଡ଼ିଛି । ଗଜପତି ଜିଲ୍ଲାରେ ମଧ୍ୟ ସମାନ ସ୍ଥିତି । ସ୍ୱଳ୍ପ ବୃଷ୍ଟିପାତ ସାଙ୍ଗକୁ ପ୍ରଚଣ୍ଡ ଖରା ଚାଷ କାମରେ ବ୍ୟାହତ ସୃଷ୍ଟି କରିଛି । କେବଳ ଖାଲୁଆ ଅଂଚଳରେ ଧାନ ରୁଆ ହୋଇଥିବା ବେଳେ ଅନେକ ସ୍ଥାନରେ ଚାଷ କାମ ଆରମ୍ଭ ହୋଇନାହିଁ । 

ବର୍ଷା ଅଭାବରୁ ପୁରୀ ଜିଲ୍ଲାରେ ମଧ୍ୟ ଅନେକ ଚାଷ ଜମି ପଡ଼ିଆ ପଡ଼ିଛି । ପମ୍ପସେଟ୍‌ରେ ପାଣି ମଡ଼ାଇ ତଳି ରୋଇଥିଲେ ଚାଷୀ । ତା’ ବି ଜଳିଗଲାଣି । ଜଳସେଚନ ବିଭାଗ ପକ୍ଷରୁ କେନାଲ ପାଣି ଯୋଗାଇଦେବାକୁ ଅସ୍ତରଙ୍ଗ ଓ କାକଟପୁର ଅଂଚଳର ଚାଷୀ ଦାବି କରିଛନ୍ତି । କଟକ ଜିଲ୍ଲା ଆଠଗଡ଼ ଅଞ୍ଚଳରେ ଚାଷ କାମ ମଧ୍ୟ ବାଧାପ୍ରାପ୍ତ ହୋଇଛି । କେଉଁଠି ବିଲ ଫାଟି ଆଁ କରିଛି ତ ପୁଣି କେଉଁଠି ଜମି ଅଧାରୁଆ ହୋଇଛି । କେନାଲରେ ପାଣି ନାହିଁ, କି ଉଠା ଜଳସେଚନ ଥାଇ ବି ଚାଷୀଙ୍କ କାମରେ ଆସୁନି । ସରକାର ଚାଷୀଙ୍କ ପାଇଁ ଅନେକ ଯୋଜନା କରୁଥିବା ଡିଣ୍ଡିମ ପିଟୁଛନ୍ତି । ବର୍ଷା ଅଭାବ ସମୟରେ ଚାଷ କାମ କିପରି ହେବ। ସେନେଇ ସୁବ୍ୟବସ୍ଥା କରାଗଲେ ଚାଷୀ ଉପକୃତ ହୋଇପାରନ୍ତେ ।