ପାଣିରେ ଭାସିଲା ଚାକିରି ଆଶାୟୀଙ୍କ ଆଶା,  ଆବେଦନକାରୀଙ୍କ ସହିତ ସାଙ୍ଘାତିକ ଖେଳ

କନକ ବ୍ୟୁରୋ:  ପାଣିରେ ଭାସିଲା ଚାକିରି ଆଶାୟୀଙ୍କ ଆଶା । ଆବେଦନକାରୀଙ୍କ ସହିତ ସାଙ୍ଘାତିକ ଖେଳ । ଫର୍ମକୁ ରାସ୍ତାରେ ଫୋପାଡ଼ି ଦେଲେ, ତାହା ପୁଣି ପାଣି ବୋହି ଯାଉଥିବା ସ୍ଥାନରେ । ନା ହୋଇଛି ନିଯୁକ୍ତି, ନା ଆବେଦନ ପତ୍ର ହୋଇଛି ଭେରିଫିକେସନ ହେଲେ ଅଫିସ ବାହାରକୁ ଯାଇ ରାସ୍ତା ଉପରେ ପଡି ରହିଲା ଆବେଦନପତ୍ର । ଏଭଳି ଏକ ସାଙ୍ଘାତିକ ଚିତ୍ର ସାମ୍ନାକୁ ଆସିଛି କପ୍ତିପଦା ବ୍ଲକ ଆଇସିଡ଼ିଏସ କାର୍ଯ୍ୟାଳୟରୁ । କପ୍ତିପଦା ଶିଶୁ ବିକାଶ ଯୋଜନା କାର୍ଯ୍ୟାଳୟ ସାମ୍ନା ରାସ୍ତାରେ ପାଣି ବୋହିଯାଇଥିବା ସ୍ଥାନରେ ପଡି ରହିଥିଲା ଆବେଦନପତ୍ର । ପିଙ୍ଗୁ ବାନ୍ଦ୍ରବଣି ଅଙ୍ଗନବାଡିରେ ହେଲ୍ପର ପଦବୀ ନିମନ୍ତେ ପିଙ୍ଗୁ ଗ୍ରାମର ସୁଶ୍ରୀ ସଙ୍ଗୀତା ବିଶ୍ୱାଳ ଆବେଦନ କରିଥିଲେ ।

ଆବେଦନ ଫର୍ମ ସହିତ ସମସ୍ତ ଶିକ୍ଷାଗତ ଯୋଗ୍ୟତା ଏବଂ ଅନ୍ୟ ଦସ୍ତାବିଜ ଲଗାଇ ସେ ଆବେଦନପତ୍ରକୁ କପ୍ତିପଦା ଆଇସିଡ଼ିଏସରେ ଦେଇଥିଲେ । ଯାହାକି ୩ ଦିନ ପୂର୍ବରୁ ଆବେଦନ କାରୀଙ୍କ ଭେରିଫିକେସନ ହେବା କଥା, ହେଲେ ହୋଇପାରିନାହିଁ । କିନ୍ତୁ ଅଚାନକ କାର୍ଯ୍ୟାଳୟ ସାମ୍ନା ରାସ୍ତାରେ ତାଙ୍କ ସ୍ତ୍ରୀଙ୍କ ଆବେଦନ ପତ୍ର ରାସ୍ତାରେ ପଡ଼ିଥିବା ସଙ୍ଗୀତାଙ୍କ ସ୍ୱାମୀଙ୍କୁ ଫୋନ କରି ଜଣାଇଥିଲେ ଜଣେ ବ୍ୟକ୍ତି । ଖବର ପାଇ ତାଙ୍କ ସ୍ୱାମୀ ଘଟଣାସ୍ଥଳରେ ପହଞ୍ଚି ସଙ୍ଗୀତାଙ୍କ ଆବେଦନପତ୍ର ରାସ୍ତାରେ ଫୋପାଡ଼ି ଦିଆଯାଇଥିବା ଏବଂ ତାହାକୁ ଜଣେ ଯୁବକ ପାଇ ରଖିଥିବା ଜାଣିବାକୁ ପାଇଥିଲେ ।