ପ୍ରଶାସନରେ ଅଦଳବଦଳ, ସରକାର ହେବ ଗତିଶୀଳ : ଆଗକୁ ସଙ୍ଗଠନ ଓ ସରକାରର ବଦଳିବ କାୟାକଳ୍ପ !

କନକ ବ୍ୟୁରୋ : ଦୀର୍ଘ କିଛି ଦିନ ହେବ ପ୍ରଶାସନିକ ଉଦାସୀନତା ସରକାରଙ୍କୁ ଅକଳରେ ପକାଉଥିଲା । ହେଲେ ପ୍ରଶାସନକୁ ଚଳଚଞ୍ଚଳ କରିବାକୁ ଏବେ ଅଣ୍ଟା ଭିଡ଼ିଛନ୍ତି ସରକାର । ଗତକାଲି ଆଇଏଏସ ସ୍ତରରେ ବଡ଼ ଧରଣର ଅଦଳବଦଳରୁ ଏହାର ସଂକେତ ମିଳିଛି ।  ଅଧା ଓଡ଼ିଶାର ଜିଲ୍ଲାପାଳ ବଦଳିଛନ୍ତି । ବଡ଼ ବଡ଼ ବିଭାଗରେ ନୂଆ ମୁଖିଆଙ୍କୁ ଦାୟିତ୍ବ ମିଳିଛି । ସୂଚନା ଓ ଲୋକସମ୍ପର୍କ ବିଭାଗର ସଚିବ ଭାବେ ହେମନ୍ତ ଶର୍ମାଙ୍କ କାନ୍ଧରେ ସରକାରଙ୍କ ଛବି ସୁଧାରିବାର ଗୁରୁ ଦାୟିତ୍ବ ରହିଛି ।  ୩ ମହାନଗର ନିଗମରେ କମିଶନରଙ୍କୁ ବଦଳି କରିଛନ୍ତି ସରକାର । ଚଞ୍ଚଳ ରାଣାଙ୍କୁ ବିଏମସି କମିଶନର ଭାବେ ଦାୟିତ୍ବ ମିଳିଛି । ମୋଟ ୪୯ ଜଣ ଆଇଏଏସଙ୍କୁ ଅଦଳବଦଳ କରି ଝୁଣ୍ଟି ପଡିଥିବା ବ୍ୟବସ୍ଥାକୁ ଏବେ ରକେଟ ବେଗରେ ଲୋକଙ୍କ ପାଖରେ ପହଞ୍ଚାଇବାକୁ ଲକ୍ଷ୍ୟ ରଖିଛନ୍ତି ସରକାର । ଆଉ ନୂଆ ଟିମରେ ୟଙ୍ଗ୍ ଅଫିସରଙ୍କୁ ସାମ୍ନାକୁ ଆଣିଛନ୍ତି । ଏହାସହ ସରକାରୀ ଓକିଲ ନିଯୁକ୍ତି ପ୍ରକିୟା ନେଇ ବାଟ ଫିଟିଛି ।  

ଆଇଏଏସ ସ୍ତରରେ ପରିବର୍ତ୍ତନ ପରେ ଆଗକୁ ଆଇପିଏସ ସ୍ତରରେ ବ୍ୟାପକ ପରିବର୍ତ୍ତନ ହେବାକୁ ଯାଉଛି । ଆଇନଶୃଙ୍ଖଳାରେ ସୁଧାର ଆଣିବାକୁ ନୂଆ ଟିମ୍ ବାଛୁଛନ୍ତି ମୋହନ । କେବଳ ପ୍ରଶାସନ ନୁହେଁ ସରକାର ଓ ସଙ୍ଗଠନରେ ମଧ୍ୟ ଦେଖିବାକୁ ମିଳିବ ନୂଆ ଚେହେରା ।  ବିଜେପି ମୁଖିଆ ଦିଲ୍ଲୀ ଗସ୍ତରୁ ଫେରିବା ପରେ ନିଜର ନୂଆ ଟିମ୍ ବାଛିବେ ।  ନିଗମ ଓ ବୋର୍ଡ ପାଇଁ ତାଲିକା ମଧ୍ୟ ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି । ଏସବୁ ଭିତରେ ସମସ୍ତଙ୍କ ନଜର ଅଟିକିଛି ମନ୍ତ୍ରୀମଣ୍ଡଳର ସମ୍ପ୍ରସାରଣ ଉପରେ ।  ଯେଉଁଥିରେ ଖୁବଶୀଘ୍ର ମୋହର ମାରିପାରନ୍ତି ମୋହନ । ପ୍ରଶାସନ, ସରକାର, ସଙ୍ଗଠନ । ସବୁଠି ପରିବର୍ତ୍ତନ କରି ନୂଆ ଟିମକୁ ନେଇ ଆଗକୁ ବଢିବାକୁ ନୀଳନକ୍ସା ପ୍ରସ୍ତୁତ କରୁଛନ୍ତି ମୋହନ ସରକାର ।