ଖତମ ହେଲା ସୁନା ଚୋରର ଖେଳ, ସିସିଟିଭିରେ କଏଦ ଦେଲା ଚୋରି କରି ଖସିଯାଉଥିବାର ଦୃଶ୍ୟ, ଭୁବନେଶ୍ୱରରେ ଖେଳାଇଛି ଆତଙ୍କ

କନକ ବ୍ୟୁରୋ : ଲୁଟେରା ରାଜା ପ୍ରଫୁଲ୍ଲ ନାୟକର ଖେଳ ଖତମ, ବହୁ ଛକାପଞ୍ଝା ପରେ ଲୁଟେରା ଜଣକୁ ଗିରଫ କରିଛି କମିସନରେଟ୍ ପୁଲିସ୍ । ଅଭିଯୁକ୍ତ ପ୍ରଫୁଲ୍ଲ ସହ ସହଯୋଗୀ ଫିରୋଜ ମଧ୍ୟ ଗିରଫ ହୋଇଛି । ଏୟାରଫିଲ୍ଡ ଥାନା ଅଞ୍ଚଳରେ ଚେନ୍ ଲୁଟ ପରେ ମହିଳାଙ୍କ ମୃତ୍ୟୁ ଘଟଣାରେ ଏମାନଙ୍କ ସମ୍ପୃକ୍ତି ଥାଇପାରେ ବୋଲି ସନ୍ଦେହ କରାଯାଉଛି । ଖୁବଶୀଘ୍ର ଏହି ଦୁଇ ଅଭିଯୁକ୍ତଙ୍କୁ ରିମାଣ୍ଡରେ ନେଇ ଅଧିକ ଖୋଳତାଡ଼ କରିବାକୁ ପୁଲିସ ଯୋଜନା କରିଛି। 

ପ୍ରଫୁଲ୍ଲ, ଯିଏ ଆଖି ପିଛୁଲାକେ ମହିଳାଙ୍କ ବେକରୁ ସୁନା ଝାମ୍ପି ଫେରାର ହୋଇଯାଏ । ସୁନା ଝାମ୍ପି ଆତଙ୍କ ଖେଳାଉଥିଲା ଏହି ଅଭିଯୁକ୍ତ, ବେକରୁ ସୁନା ଝାମ୍ପି କଳା ପଲସରରେ ଛୁ ମାରୁଥିଲା।  କଳା ପଲସରରେ ଆତଙ୍କ ଖେଳାଇ ଖୀପ୍ର ବେଗରେ ଖସିଯାଉଛନ୍ତି ଅପରାଧୀ । ଏହି ଅପରାଧୀକୁ ସହଯୋଗ କରୁଥିଲା ସାଥି ଫିରୋଜ, ଦୁଇ ଅପରାଧୀ କମିଶନରେଟ ପୁଲିସ ହାତରେ ଧରାପଡ଼ିବା ପରେ ସାମ୍ନାକୁ ଆସିଛି ଚାଞ୍ଚଲ୍ୟକର ତଥ୍ୟ । 

ସେପଟେ ଏୟାରଫିଲ୍ଡ ଥାନା ଅଞ୍ଚଳରେ ମହିଳାଙ୍କ ବେକରୁ ସୁନା ଝାମ୍ପିବା ସମୟରେ ମହିଳାଙ୍କ ମୃ୍ତ୍ୟୁ ହୋଇଥିଲା। ଏହି ଘଟଣାରେ ପ୍ରଫୁଲ୍ଲ ଓ ଫିରୋଜଙ୍କ ଲିଙ୍କ୍ ଥିବା ଅନୁମାନ କରୁଛି ପୁଲିସ । ଦୁଇ ସିସିଟିଭି ଭିଜୁଆଲରେ ଉଭୟଙ୍କ ଅପରେସନର ଶୈଳୀ ଏକା ଭଳି ଲାଗୁଥିବାରୁ ଅଭିଯୁକ୍ତଙ୍କୁ ରିମାଣ୍ଡରେ ଆଣି ପଚରାଉଚରା କରୁଛି ପୁଲିସ ।  ଦୀର୍ଘ ଦିନ ଧରି ଭୁବନେଶ୍ବରରେ ଅପରାଧୀ ମାନେ ଏବେ ଉପରମୁହାଁ ହେଉଛନ୍ତି । ଅପରାଧୀ ଦମନ ପାଇଁ ପୁଲିସ ଧରପଗଡ଼ ଆରମ୍ଭ କରିବା ସହ ୪୮ ଘଣ୍ଟାରେ ୧୫ ଅପରାଧୀଙ୍କୁ ଗିରଫ କରି କୋର୍ଟ ଚାଲଣ କରିଛି ।

କିଛି ଦିନ ହେଲା ଅପରାଧୀଙ୍କ ଉତ୍ପାତ ଦେଖିବାକୁ ମିଳୁଛି, କେଉଁଠି ହାଣୁଛନ୍ତି ତ କେଉଁଠି ସୁନା ଝାମ୍ପି ଫେରାର ହେଉଛନ୍ତି। ଅପରାଧୀଙ୍କୁ ବାନ୍ଧି ଜେଲ ପଠାଇବା ପୁଲିସ ପାଇଁ ମୁଣ୍ଡ ବିନ୍ଧାର କାରଣ ପାଲଟିଛି ।