ସାପକୁ ମାରିଲେ ଝିଅକୁ କାଟୁଛି ! ମୟୂରଭଞ୍ଜ ଉଦଳାର ସର୍ପକନ୍ୟାଙ୍କୁ ନେଇ ଚାଞ୍ଚଲ୍ୟ

କନକ ବ୍ୟୁରୋ : ବିଜ୍ଞାନ ଯୁଗରେ ଅନ୍ଧବିଶ୍ୱାସ । ଝିଅ ପାଲଟୁଛି ସର୍ପକନ୍ୟା । ସାପ ଭଳି ଗର୍ଜନ କରୁଛି ଆଉ ମାଟିରେ ଗଡୁଛି । ହାତକୁ ସାପ ଫଣା ଭଳି କରି ଗୁହାରି କରୁଛି । ଏଭଳି ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଉଦଳା ବ୍ଲକ ଚକରାପାଳ ଗାଁରେ । ରବୀନ୍ଦ୍ର ସିଂଙ୍କ ଘର କାନ୍ଥରେ ନାଗ ସାପ ଦେଖାଯିବା ପରେ ସ୍ନେକ୍‌ ହେଲ୍ପଲାଇନ୍‌ ସଦସ୍ୟଙ୍କୁ ଖବର ଦେଇଥିଲେ ଗାଁଲୋକେ । ଉଦ୍ଧାରକାରୀ ଟିମ୍‌ ପହଞ୍ଚି ସାପକୁ ଧରିବାକୁ ଚେଷ୍ଟା କରିବା ସମୟରେ ରବୀନ୍ଦ୍ରଙ୍କ ଝିଅ ମିନାକ୍ଷୀ ଅଚାନକ ସାପ ଭଳି ଗର୍ଜନ କରିଥିଲେ । ଭୂଇଁରେ ଲୋଟି ପଡି ସାପ ଫଣା ଟେକିଥିଲେ । 

ମତେ ମାର ନାହିଁ, ମତେ ନିଅ ନାହିଁ, ମୁଁ ଯିବି ନାହିଁ କହି ଚିତ୍କାର କରିଥିଲେ । ଏହାକୁ ଦେଖିବା ପରେ ତାଜୁବ ହୋଇଯାଇଥିଲେ ଗାଁ ଲୋକେ । ଦିନକ ପୂର୍ବରୁ ପରିବାର ଲୋକେ ସାପକୁ ଦେଖି ବାଡ଼ିରେ ମାରିଥିଲେ କିନ୍ତୁ ସାପ ଟି ଖସି ପଳାଇଥିଲା । ଆଉ ଏହାପରେ ମୀନାକ୍ଷୀଙ୍କ ଦେହରେ ଆଘାତ ଚିହ୍ନ ଦେଖିବାକୁ ମିଳିଥିଲା । ପ୍ରାୟ ୨ ବର୍ଷ ହେବ ତାଙ୍କ ଦେହରେ ଏଭଳି ସାପ ଲାଗୁଥିବା କହିଛନ୍ତି ପରିବାର ଲୋକେ । ତେବେ ଏହା ଅନ୍ଧବିଶ୍ୱାସ ନା ଏହା ପଛରେ କିଛି କାରଣ ରହିଛି ତାହାର କାରଣ ଜାଣିବାକୁ ଚାହୁଛନ୍ତି ଗ୍ରାମବାସୀ ।