ରାସ୍ତା ସାରା ଖାଲଖମାରେ ଭର୍ତ୍ତି, ବର୍ଷା ଦିନରେ ପାଣି ଜମି ଘଟୁଛି ଦୁର୍ଘଟଣା

କନକ ବ୍ୟୁରୋ: ଯୁଆଡ଼େ ଚାହିଁବ ଖାଲ ଆଉ ଖାଲ । ମୁନ୍ଦାଏ ବର୍ଷାରେ ବେହାଲ ସ୍ଥିତି । ଏପରି  ଅବସ୍ଥା ବରୀ ରାସ୍ତାର  ।  ଖାଲ ଖମାରେ ପାଣି ଭର୍ତ୍ତି ହୋଇଥିବା ବେଳେ ଯାତ୍ରୀ ମାନେ କିଭଳି ଦୟନୀୟ ଅବସ୍ଥାରେ ଯାଉଛନ୍ତି । ରାସ୍ତାଟି ବରୀ ମାଉଣ୍ଡ ଠାରୁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଓ ବରୀ ଥାନାକୁ ଯାତାୟାତର ମୁଖ୍ୟ ରାସ୍ତା । ପ୍ରତିଦିନ ହଜାର ହଜାର ଲୋକ ଯାତାୟାତ କରିଥାନ୍ତି । ହେଲେ ରାସ୍ତା ଭଲ ନଥିବାରୁ ଲୋକେ ବହୁ ସମସ୍ୟାର ସମ୍ମୁଖୀନ ହେଉଛନ୍ତି । ଲୋକଙ୍କ ଅଭିଯୋଗ ପାଇ ୨୪ କୋଟି ବ୍ୟୟ ଅଟକଳରେ ରାସ୍ତା ନିର୍ମାଣ ଆରମ୍ଭ ହୋଇଛି । ହେଲେ କିଛି ମାସ ହେବ ରାସ୍ତାରୁ ପୁରୁଣା ପିଚୁ ଖୋଳି ଦେଇ ଠିକାଦାର ଛୁ’ ମାରିଛି । ବ୍ଲକର ମୁଖ୍ୟ ରାସ୍ତା ହୋଇଥିଲେ ମଧ୍ୟ ଲୋକେ ଯିବାକୁ ଭୟ କରୁଛନ୍ତି ।

ଆମ୍ବୁଲାନ୍ସ ସେବା ଓ ଅଗ୍ନିଶମ ବିଭାଗ ଗାଡ଼ି ଯାତାୟାତରେ ବାଧା ସୃଷ୍ଟି ହେଉଛି ।  ରାସ୍ତା ନିର୍ମାଣ ଅତି ନିମ୍ନମାନର ହୋଇଥିବାରୁ ଖୁବ୍‌ ଜଲଦି ପିଚୁ ଉଠିଯାଇଛି । ପତଳା ବାଲି ମାଟି ପକା ଯାଇଥିବାର ଲୋକେ ଅଭିଯୋଗ କରିଥିଲେ ମଧ୍ୟ କୌଣସି ବିଭାଗୀୟ ଅଧିକାରୀ ଶୁଣିନଥିଲେ । ଏବେ ବର୍ଷାରେ ସବୁ ବାଲି ମାଟି ରାସ୍ତା ଧୋଇଯାଇଛି । ସବୁଠୁ ବଡ଼କଥା ହେଲା ରାସ୍ତାକାମ ବେଳେ କୌଣସି ସୂଚନା ଫଳକ ମଧ୍ୟ ଲାଗିନି । ଏଥିପ୍ରତି ଦୃଷ୍ଟି ଦେଇ ତୁରନ୍ତ ରାସ୍ତା ତିଆରି କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି ।  ରାସ୍ତା କାମ ଅଧାରେ ପଡ଼ିଥିବା ବେଳେ ଖୁବଶୀଘ୍ର ଏହାର ମରାମତି କରାଯାଇପାରିଲେ ବହୁ ଲୋକ ଉପକୃତ ହୋଇପାରିବେ ।